ഉറങ്ങുന്നതിനിടെ കാലിൽ മസിൽ കയറി വേദന അനുഭവപ്പെടുന്നത് പലരെയും അലട്ടുന്ന പ്രശ്നമാണ്. പെട്ടെന്ന് ഉണ്ടാകുന്ന ശക്തമായ വേദന കാരണം രാത്രി ഉറക്കം പോലും നഷ്ടപ്പെടാം. മസിൽ കയറിയാൽ ചില ലളിതമായ മാർഗങ്ങളിലൂടെ വേദന കുറയ്ക്കാൻ ശ്രമിക്കാം.
മസിൽ കയറുമ്പോൾ കാൽ പതുക്കെ ചലിപ്പിക്കുക എന്നതാണ് ആദ്യം ചെയ്യേണ്ടത്. സ്വയം കാൽ ചലിപ്പിക്കാൻ കഴിയുന്നില്ലെങ്കിൽ കൈകൾ ഉപയോഗിച്ച് കാലും വിരലുകളും പതുക്കെ ചലിപ്പിക്കാം. വേദന കുറയുന്നതുവരെ ഇത് തുടരാം. ബാധിച്ച ഭാഗത്ത് നേരിയ രീതിയിൽ മസാജ് ചെയ്യുന്നതും ആശ്വാസം നൽകും.
കിടക്കുന്ന രീതിക്കും പ്രാധാന്യമുണ്ട്. ഉറങ്ങുമ്പോൾ കാലിന് ചെറിയ തലയിണയുടെ പിന്തുണ നൽകുന്നത് ചിലർക്ക് ആശ്വാസകരമാണ്. രാത്രി കിടക്കുമ്പോൾ വളരെ ഇറുകിയ വസ്ത്രങ്ങൾ ഒഴിവാക്കി അയഞ്ഞ വസ്ത്രങ്ങൾ ധരിക്കുന്നതും സൗകര്യപ്രദമാണ്.
ശരീരത്തിൽ ജലാംശം കുറയുന്നതും ചിലരിൽ മസിൽ കയറുന്നതിന് കാരണമാകാം. അതിനാൽ ദിവസവും ആവശ്യത്തിന് വെള്ളം കുടിക്കുന്നത് പ്രധാനമാണ്. കാപ്പി, മദ്യം, അമിതമായ പഞ്ചസാര അടങ്ങിയ പാനീയങ്ങൾ തുടങ്ങിയവയുടെ ഉപയോഗം നിയന്ത്രിക്കുന്നതും നല്ലതാണ്.
കിടക്കുന്നതിന് മുമ്പ് ലഘുവായ കാലുകളുടെ സ്ട്രെച്ചിങ് വ്യായാമങ്ങൾ ചെയ്യുന്നത് കാലിലെ പേശികൾക്ക് ആശ്വാസം നൽകാനും രാത്രിയിലെ മസിൽ കയറ്റം കുറയ്ക്കാനും സഹായിച്ചേക്കാം.
എന്നാൽ മസിൽ കയറ്റം പതിവായി ഉണ്ടാകുകയോ, വേദന വളരെ ശക്തമായിരിക്കുകയോ, കാലിൽ വീക്കം, മരവിപ്പ്, ബലക്കുറവ് തുടങ്ങിയ ലക്ഷണങ്ങൾ ഉണ്ടാകുകയോ ചെയ്താൽ സ്വയം ചികിത്സയിൽ മാത്രം ആശ്രയിക്കരുത്. ഇത്തരം സാഹചര്യങ്ങളിൽ ഡോക്ടറുടെ നിർദേശം തേടുന്നതാണ് ഉചിതം. ചില മരുന്നുകൾ, പേശികളുടെ അമിത ഉപയോഗം, ജലാംശക്കുറവ്, മറ്റ് ആരോഗ്യപ്രശ്നങ്ങൾ എന്നിവയും ആവർത്തിച്ചുള്ള മസിൽ കയറ്റത്തിന് കാരണമാകാം.