ന്യൂഡൽഹി: വിവോ സബ് ബ്രാൻഡായ ഐക്യൂഒഒയുടെ പുതിയ സ്മാർട്ട്ഫോൺ ഇസഡ്11 വ്യാഴാഴ്ച ഇന്ത്യൻ വിപണിയിൽ അവതരിപ്പിക്കും. ഇസഡ്11എക്സ്, ഇസഡ്11 ലൈറ്റ് മോഡലുകൾക്ക് പിന്നാലെ ഈ ശ്രേണിയിലെ ഏറ്റവും കരുത്തുറ്റ മോഡലായാണ് മിഡ് റേഞ്ച് വിഭാഗത്തിൽ ഇസഡ്11 എത്തുന്നത്. ആമസോൺ, ഐക്യൂഒഒ ഇന്ത്യ സ്റ്റോർ, മറ്റ് റീട്ടെയിൽ ഔട്ട്ലെറ്റുകൾ എന്നിവിടങ്ങളിൽ ഫോൺ ലഭ്യമാകും.
അറോറ ഗ്രീൻ, സെലേഷ്യൽ ബ്ലൂ നിറങ്ങളിലാണ് ഫോൺ എത്തുന്നത്. 3ഡി കർവ്ഡ് ഡിസൈനും 6.8 ഇഞ്ച് 3ഡി കർവ്ഡ് അമോലെഡ് ഡിസ്പ്ലേയുമാണ് പ്രധാന സവിശേഷത. 1.5കെ റെസല്യൂഷൻ, 144 ഹെർട്സ് റിഫ്രഷ് റേറ്റ്, 5,000 നിറ്റ്സ് പീക്ക് ബ്രൈറ്റ്നെസ് എന്നിവ ഡിസ്പ്ലേയിൽ ലഭിക്കും. ഹൊറിസോണ്ടൽ ക്യാമറ ബാറിൽ രണ്ട് സെൻസറുകൾക്കൊപ്പം എൽഇഡി റിങ് ലൈറ്റും നൽകിയിട്ടുണ്ട്.
മീഡിയടെക് ഡൈമെൻസിറ്റി 7500 ടർബോ പ്രോസസറാണ് ഫോണിന് കരുത്തേകുന്നത്. 7,050 എംഎഎച്ച് ബാറ്ററിയാണ് മറ്റൊരു പ്രധാന സവിശേഷത. ആൻഡ്രോയിഡ് 16 അടിസ്ഥാനമാക്കിയുള്ള ഒറിജിൻ ഒഎസ് 6ലാണ് ഫോൺ പ്രവർത്തിക്കുക. സർക്കിൾ ടു സെർച്ച്, എഐ ക്യാപ്ഷൻസ് തുടങ്ങിയ ഫീച്ചറുകളും ഉൾപ്പെടുത്തിയിട്ടുണ്ട്. 40,000 രൂപയിൽ താഴെയായിരിക്കും ഫോണിന്റെ വിലയെന്നാണ് പ്രതീക്ഷ.