കൊച്ചി: സി.ജെ. റോയിയുടെ മരണത്തിനിടയാക്കിയ കാരണമെന്താണെന്ന് അറിയില്ലായെന്നും ഇതുസംബന്ധിച്ച അന്വേഷണം നടക്കുകയാണെന്നും എംഡി ടി.എ. ജോസഫ്. കോണ്‍ഫിഡന്റ് ഗ്രൂപ്പുമായി ബന്ധപ്പെട്ട ഇടങ്ങളില്‍ സാധാരണ പരിശോധനകള്‍ മാത്രമാണ് നടന്നത്. പരിശോധനയുമായി ബന്ധപ്പെട്ട് ആദായ നികുതി വകുപ്പ് ഉദ്യോഗസ്ഥര്‍ ബുദ്ധിമുട്ടിച്ചിട്ടില്ലെന്നും മറിച്ചുള്ള വാര്‍ത്തകള്‍ തെറ്റാണെന്നും അദ്ദേഹം പറഞ്ഞു. കൂടുതല്‍ കാര്യങ്ങള്‍ പറയുന്നതിന് നിയന്ത്രണങ്ങള്‍ ഉണ്ട്. കേസുമായി ബന്ധപ്പെട്ട് കൂടുതല്‍ സംസാരിക്കാനാകില്ലെന്നും എസ്ഐടിയുടെ നിയന്ത്രണമുണ്ടെന്നും അദ്ദേഹം പറഞ്ഞു.
പരിശോധനയുമായി ബന്ധപ്പെട്ട് സി ജെ റോയിയെ ഉദ്യോഗസ്ഥര്‍ ഭീഷണിപ്പെടുത്തിയെന്ന് കുടുംബം പറഞ്ഞത് ശരിയല്ല. കുടുംബത്തിന് ഇക്കാര്യങ്ങള്‍ അറിയില്ല. അവര്‍ വൈകാരികമായി പ്രതികരിച്ചത് ശരിയല്ലെന്നും അങ്ങനെ ചെയ്യരുതെന്നും പറഞ്ഞിരുന്നുവെന്നും ടി എ ജോസഫ് പറഞ്ഞു. ഇതുവരെയുള്ള എസ്ഐടി അന്വേഷണം തൃപ്തികവമാണെന്നും പരാതിയില്ലെന്നും അദ്ദേഹം പറഞ്ഞു.
