തിരുവനന്തപുരം: തലസ്ഥാന ജില്ലയിലെ സാധാരണക്കാരുടെ ആശ്രയകേന്ദ്രമായ തിരുവനന്തപുരം മെഡിക്കല് കോളേജില് സര്ജിക്കല് റോബോട്ട് എത്തുന്നു. ധനമന്ത്രി കെ എന് ബാലഗോപാല് കഴിഞ്ഞ ദിവസം അവതരിപ്പിച്ച ബജറ്റില് മെഡിക്കല് കോളേജില് സര്ജിക്കല് റോബോട്ട് സംവിധാനം ആരംഭിക്കാന് 12 കോടി രൂപ അനുവദിച്ചിരുന്നു. ശസ്ത്രക്രിയകള് കൂടുതല് സൂക്ഷ്മതയോടെ നടത്താന് ഇതുവഴി കഴിയും.
ആര്സിസിക്ക് പിന്നാലെ മെഡിക്കല് കോളേജ് ആശുപത്രിയിലും സര്ജിക്കല് റോബോട്ട് സംവിധാനം ആരംഭിക്കാന് അധികൃതര് പ്രൊപ്പോസല് തയ്യാറാക്കി സര്ക്കാരിന് സമര്പ്പിച്ചിരുന്നു. ജനറല് സര്ജറി, സര്ജിക്കല് ഗ്യാസ്ട്രോ എന്ററോളജി, യൂറോളജി, ഗൈനക്, കാര്ഡിയോ തൊറാസിക് ആന്ഡ് വാസ്കുലാര് സര്ജറി വിഭാഗങ്ങളിലാണ് റോബോട്ടിക് സര്ജറി നടപ്പാക്കുന്നത്.
