ജറുസലേം: ഇസ്രയേലിൽ പുതിയ സഖ്യസർക്കാർ രൂപീകരിക്കാൻ നിലവിലെ പ്രധാനമന്ത്രി ബെഞ്ചമിൻ നെതന്യാഹുവിനെയും തന്റെ ഭരണസഖ്യത്തിൽ ഉൾപ്പെടുത്താൻ തയ്യാറാണെന്ന് പ്രതിപക്ഷ നേതാവ് ഗാഡി ഐസൻകോട്ട്. സർക്കാർ രൂപീകരിക്കാൻ അറബ് പാർട്ടികളുടെ പിന്തുണ ഒഴിവാക്കുന്നതിൻ്റെ ഭാഗമായാണ് ഈ നീക്കം. ജറുസലേമിലെ പ്രസിഡന്റിന്റെ വസതിയിൽ നടന്ന ചടങ്ങിൽ സംസാരിക്കവെ നെതന്യാഹുവിന്റെ സഖ്യകക്ഷിയും തീവ്രവലതുപക്ഷ ധനകാര്യ മന്ത്രിയുമായ ബെസലേൽ സ്മോട്രിച്ചിനെയും ഒപ്പം കൂട്ടാൻ തയ്യാറാണെന്ന് ഗാഡി ഐസൻകോട്ട് വ്യക്തമാക്കി.
“ഐക്യത്തിനുള്ള സമയമാണിതെന്ന് ലിക്വിഡ് പാർട്ടിയുടെയും റിലീജിയസ് സീയോണിസ്റ്റ് പാർട്ടിയുടെയും അംഗങ്ങൾ യഥാർത്ഥത്തിൽ വിശ്വസിക്കുന്നുണ്ടെങ്കിൽ, എന്റെ നേതൃത്വത്തിലുള്ള സർക്കാരിനെയും ഞാൻ മുന്നോട്ടുവെച്ച തത്വങ്ങളെയും പിന്തുണയ്ക്കാതിരിക്കാൻ അവർക്കാവില്ല,” എന്ന് ഐസൻകോട്ട് പറഞ്ഞു. തിരഞ്ഞെടുപ്പിൽ നെതന്യാഹുവിന്റെ പ്രധാന എതിരാളിയായി മത്സരിച്ച ഗാഡി ഐസൻകോട്ടിന് പുതിയ സർക്കാർ രൂപീകരിക്കാൻ ആറാഴ്ചത്തെ സമയമാണ് ലഭിച്ചിട്ടുള്ളത്. ഇസ്രയേലി ജനതയുടെ മുഴുവൻ താല്പര്യങ്ങൾ സംരക്ഷിച്ചുകൊണ്ട് പ്രവർത്തിക്കുമെന്നും സമൂഹത്തിലെ എല്ലാ വിഭാഗങ്ങളെയും പ്രതിനിധീകരിക്കുമെന്നും അദ്ദേഹം പറഞ്ഞു.
അതേസമയം, നവംബർ 3-ന് നടന്ന യു.എസ് ഇടക്കാല തെരഞ്ഞെടുപ്പിൽ ജയിച്ച ഡെമോക്രാറ്റിക് പാർട്ടി ഇസ്രയേലിന് സൈനിക സഹായം നൽകുന്നതിനെ എതിർക്കുന്നുവെന്നും, അതിനാൽ തന്നെ ഇസ്രയേൽ വലിയ അനിശ്ചിതത്വങ്ങൾ നേരിടുന്നുണ്ടെന്നും പ്രസിഡന്റ് ഹെർസോഗ് മുന്നറിയിപ്പ് നൽകി. അമേരിക്കയിലെ പുതിയ രാഷ്ട്രീയ സാഹചര്യങ്ങൾ ചൂണ്ടിക്കാണിച്ച്, ഇസ്രയേലിന് ഇപ്പോൾ ശക്തവും സ്ഥിരതയുള്ളതുമായ ഒരു സർക്കാരാണ് ആവശ്യമെന്ന് ഹെർസോഗ് കൂട്ടിച്ചേർത്തു. 2015 മുതൽ 2019 വരെ ഇസ്രയേൽ സൈനിക തലവനായിരുന്ന ഐസൻകോട്ട്, ഗാസ യുദ്ധത്തിന്റെ ആദ്യ എട്ട് മാസങ്ങളിൽ നെതന്യാഹുവിന്റെ വാർ കാബിനറ്റിൽ നിരീക്ഷകനായിരുന്നു. ഒക്ടോബർ 27-ന് നടന്ന ഇസ്രയേൽ തെരഞ്ഞെടുപ്പിൽ ഐസൻകോട്ടിന്റെ നാല് പാർട്ടികളുടെ സഖ്യം 48 സീറ്റുകളും നെതന്യാഹുവിന്റെ വലതുപക്ഷ സഖ്യം 53 സീറ്റുകളുമാണ് നേടിയത്. ഭൂരിപക്ഷത്തിന് 61 സീറ്റുകൾ ആവശ്യമാണെന്നിരിക്കെ ഇരുവിഭാഗത്തിനും കേവലഭൂരിപക്ഷം തികയ്ക്കാനായില്ല.
പലസ്തീൻ പൗരന്മാരെ പ്രതിനിധീകരിക്കുന്ന അറബ് കക്ഷികൾ റെക്കോർഡ് നേട്ടത്തോടെ 19 സീറ്റുകൾ നേടി. ഐസൻകോട്ടിനെ പ്രധാനമന്ത്രിസ്ഥാനത്തേക്ക് ഇവർ പിന്തുണച്ചെങ്കിലും, അറബ് പാർട്ടികളുമായി ചേർന്ന് സർക്കാരുണ്ടാക്കാൻ ഐസൻകോട്ട് തയാറായിട്ടില്ല. തീവ്ര അൾട്രാ-ഓർത്തഡോക്സ് പാർട്ടികളായ ‘യുണൈറ്റഡ് തോറ ജൂഡായിസം’, ‘ഷാസ്’ എന്നിവയുടെ പിന്തുണ ഉറപ്പാക്കാനായാൽ ഐസൻകോട്ടിന് കേവലഭൂരിപക്ഷമായ 61 സീറ്റുകൾ തികയ്ക്കാനും സർക്കാരുണ്ടാക്കാനും സാധിക്കും.
