കൈക്കൂലികേസിൽ അറസ്റ്റ് ചെയ്യപ്പെട്ട് റിമാൻഡിന് ശേഷം പുറത്ത് ഇറങ്ങിയ കേസിൽ പ്രതിയായ മോട്ടോർ വെഹിക്കിൾ ഇൻസ്പെക്ടറെ ജയിലിന് പുറത്ത് ഷാൾ അണിയിച്ച് സ്വീകരിച്ചു. വെഹിക്കിൾ ഇൻസ്പെക്ടറായ കെ.ജി ബിജുവിനെ ആണ് ഡ്രൈവിങ് സ്കൂൾ ഉടമകളും ജീവനക്കാരും ചേര്‍ന്ന് ഷാളണിയിച്ച് സ്വീകരിച്ചത്. കോട്ടയം ജില്ലാ ജയിലിൽ റിമാൻഡിലായിരുന്നു ബിജു. സ്വീകരണത്തിന്റെ ദൃശ്യങ്ങള്‍ പുറത്തുവന്നു.  

ചേർത്തലയിൽ നിന്ന് ഒരു മാസം മുമ്പാണ് 2600 രൂപ കൈക്കൂലി വാങ്ങുന്നതിന് ഇടയിൽ കെ ജി ബിജുവിനെ പിടികൂടിയത്.  തണ്ണീർമുക്കം സ്വദേശിയായ ഡ്രൈവിംഗ് സ്കൂൾ ഉടമയുടെ ഭർത്താവിന്‍റെ പരാതിയിലാണ് വിജിലൻസ് ഇയാളെ കുടുക്കിയത്. ഏജന്റ് പരാതിക്കാരനിൽ നിന്ന് കൈപ്പറ്റിയ തുക, ബിജുവിന്റെ ചേർത്തലയിലെ വീട്ടിലെത്തി കൈമാറുന്നതിനിടെയാണ് വിജിലൻസ്  ഇരുവരെയും കൈയോടെ പിടികൂടിയത്. 


ബിജു കഴിഞ്ഞ ആറു വർഷമായി  വിജിലൻസിന്റെ കർശന നിരീക്ഷണത്തിലായിരുന്നു. അറസ്റ്റിലായ സമയത്ത് തന്നെ, ബിജുവിനെ ഉദ്യോഗസ്ഥ പകയുടെ പേരിൽ കുടുക്കിയതാണെന്ന് ആരോപിച്ച് ചില ഡ്രൈവിംഗ് സ്കൂൾ ഉടമകൾ രംഗത്തെത്തിയിരുന്നു. റിട്ടയർമെന്റിന് രണ്ടുമാസം ബാക്കി നിൽക്കെയാണ് ഇയാളെ പിടികൂടിയത്. ആലപ്പുഴയിൽ നിന്നടക്കം ബസ്സിലെത്തിയ ആളുകളാണ് പ്രതിയെ സ്വീകരിക്കാനായി ജയിലിന് മുന്നിൽ കാത്തുനിന്നത്.

പശ്ചിമേഷ്യൻ സംഘർഷത്തെ തുടർന്ന് നിർത്തിവച്ച വിമാന സർവീസുകൾ പൂർണ തോതിൽ പുനഃരാരംഭിച്ചില്ല. കരിപ്പൂരിൽ 28 വിമാനങ്ങൾമാത്രമാണ് ഇന്നലെ സർവീസ് നടത്തിയത്. 13 സർവീസുകൾ റദ്ദാക്കി. ഗൾഫ് നാടുകളിൽനിന്നുള്ള 21 സർവീസും തിരിച്ചുള്ള 19 സർവീസുമാണ് റദ്ദാക്കിയത്.

കണ്ണൂർ വിമാനത്താവളത്തിൽനിന്ന്‌ അന്താരാഷ്ട്ര സർവീസ്‌ അഞ്ചാം ദിവസവും മുടങ്ങി. ചൊവ്വ 13 വിമാനമാണ്‌ റദ്ദാക്കിയത്. അബുദാബി, ദുബായ്, ദോഹ, ഫുജൈറ, ഷാർജ സർവീസുകളാണിത്‌. ബുധനാഴ്ചത്തെ വിമാനങ്ങളും റദ്ദാക്കിയതായി അധികൃതർ അറിയിച്ചു. പശ്ചിമേഷ്യയിലെ യുദ്ധസാഹചര്യത്തിൽ ശനി മുതൽ 49 സർവീസാണ്‌ മുടങ്ങിയത്‌.

തിരുവനന്തപുരം വിമാനത്താവളത്തിൽനിന്ന് ബുധനാഴ്‌ച 27 വിമാനസർവീസ്‌ റദ്ദാക്കി. തിരുവനന്തപുരത്തുനിന്ന് വിവിധ ഗൾഫ്‌ രാജ്യങ്ങളിലേക്ക്‌ പുറപ്പെടേണ്ട 13 സർവീസും വരേണ്ട 14 സർവീസും ഉൾപ്പെടെയാണിത്‌. ചൊവ്വാഴ്‌ച തിരുവനന്തപുരത്തുനിന്ന്‌ പുറപ്പെടേണ്ട 15 സർവീസ്‌ റദ്ദാക്കിയിരുന്നു. ഒമാൻ എയറിന്റെ മസ്‌ക്കറ്റിൽനിന്നുള്ള വിമാനം രാവിലെ എത്തി തിരിച്ചുപോയി. എയർ അറേബ്യയുടെ അബുദബിയിലേക്കുള്ള സർവീസ്‌ വൈകിട്ട്‌ 4.30 നും പുറപ്പെട്ടു. തിങ്കളാഴ്ച 28 സർവീസുകൾ റദ്ദാക്കിയിരുന്നു.


കൊച്ചി വിമാനത്താവളത്തിൽനിന്ന്‌ ചൊവ്വാഴ്ച പുറപ്പെടേണ്ടിയിരുന്ന 21 സർവീസ് റദ്ദാക്കി. കൊച്ചിയിലേക്കുള്ള 20 വിമാനവുംറദ്ദാക്കി. അബുദാബിയിലേക്കുള്ള ഏഴും ഷാർജ, കുവൈത്ത് എന്നിവിടങ്ങളിലേക്ക് മൂന്നുവീതവും ദോഹ, ബഹ്‌റൈൻ, ദുബായ് എന്നിവിടങ്ങളിലേക്ക് രണ്ടുവീതവും ജിദ്ദ, ദമാം എന്നിവിടങ്ങളിലേക്ക് ഓരോസർവീസുമാണ് റദ്ദാക്കിയത്.

തൃശൂര്‍: മോഷണക്കേസില്‍ യുവതി അറസ്റ്റില്‍. പ്രശ്‌ന പരിഹാരത്തിനായി പൂജാരിയുടെ വീട്ടില്‍ എത്തിയ യുവതിയാണ് 12 പവനോളം വരുന്ന സ്വര്‍ണാഭരണങ്ങള്‍ കവര്‍ന്നത്. പൂജാരിയുടെ ഭാര്യയുടെ ആഭരണങ്ങളാണ് ഇവര്‍ മോഷ്ടിച്ചത്. പൂജാരിയായ കൊടകര മറ്റത്തൂര്‍ മൂലംകുടം സ്വദേശി അജേഷ് എന്നയാളുടെ വീട്ടില്‍ പ്രശ്‌ന പരിഹാരത്തിനായി എത്തിയ പറക്കാട്ടുകര സ്വദേശിനി മണ്ണാംപറമ്പില്‍ വീട്ടില്‍ സൂര്യ (26)യാണ് മോഷണം നടത്തിയത്. യുവതിയെ തൃശൂര്‍ റൂറല്‍ പോലീസ് അറസ്റ്റ് ചെയ്തു.
കഴിഞ്ഞമാസം 16ന് ആയിരുന്നു സംഭവം. പൂജാരിയുടെ വീട്ടിലെ ബെഡ്‌റൂമിലെ അലമാരക്കുള്ളില്‍ ബാഗില്‍ സൂക്ഷിച്ചിരുന്ന 12 പവനോളം തൂക്കം വരുന്നതും ഏകദേശം 12 ലക്ഷത്തിലധികം വില വരുന്നതുമായ സ്വര്‍ണാഭരണങ്ങളാണ് മോഷണം പോയത്. യുവതി പ്രശ്‌നപരിഹാരത്തിനായി ഇടക്കിടെ പൂജാരിയുടെ വീട്ടില്‍ വരാറുണ്ട്. ഈ പരിചയം മുതലാക്കിയാണ് പൂജാരി അടുക്കളയിലേക്ക് മാറിയ സമയത്ത് യുവതി തന്ത്രപൂര്‍വം അലമാരയില്‍ നിന്ന് സ്വര്‍ണാഭരണങ്ങള്‍ അടിച്ചുമാറ്റിയത്.
മോഷ്ടിച്ച സ്വര്‍ണാഭരണങ്ങള്‍ കൊടകരയിലെ ഫിനാന്‍സ് കമ്പനിയില്‍ വിറ്റു. കിട്ടിയ പണം കൊണ്ട് പ്രതി പുതിയ സ്വര്‍ണാഭരണങ്ങളും വീട്ടിലേക്ക് പുതിയ ഗൃഹോപകരണങ്ങളും വാങ്ങി. പണയത്തില്‍ ആയിരുന്ന സ്വന്തം ആഭരണങ്ങള്‍ തിരിച്ചെടുത്തു. ആര്‍ഭാട ജീവിതം നയിക്കുന്നതിനിടെയാണ് പൊലീസിന്റെ വലയിലായത്.