ന്യൂഡെല്‍ഹി. 2025 ജൂണില്‍ അഹമ്മദാബാദിലുണ്ടായ എയർ ഇന്ത്യ ഫ്ലൈറ്റ് 171 അപകടത്തിന്റെ അന്തിമ അന്വേഷണ റിപ്പോർട്ട് പൈലറ്റിന്റെ നടപടികളിലേക്ക് വിരല്‍ ചൂണ്ടിയേക്കാമെന്ന് ഇറ്റാലിയൻ മാധ്യമ റിപ്പോർട്ട് സൂചിപ്പിച്ചത് വലിയ ചർച്ചകള്‍ക്ക് വഴിവെച്ചിരിക്കുകയാണ്
ഔദ്യോഗികമായി ഇത്തരം നിഗമനങ്ങളൊന്നും ഇതുവരെ സ്ഥിരീകരിച്ചിട്ടില്ല. ‘കൊറിയറെ ഡെല്ല സെറ’ (Corriere della Sera) പ്രസിദ്ധീകരിച്ച റിപ്പോർട്ട് പ്രകാരം, പൈലറ്റുമാരില്‍ ഒരാള്‍ രണ്ട് എഞ്ചിൻ ഫ്യൂവല്‍ സ്വിച്ചുകളും ബോധപൂർവം ഓഫ് ചെയ്തതാണ് ബോയിംഗ് 787 ഡ്രീംലൈനർ തകരാൻ കാരണമെന്ന് ഇന്ത്യൻ അന്വേഷണ ഉദ്യോഗസ്ഥർ അന്തിമ റിപ്പോർട്ടില്‍ വ്യക്തമാക്കാൻ തയാറെടുക്കുകയാണെന്ന് ചൂണ്ടിക്കാട്ടുന്നു.
പടിഞ്ഞാറൻ വ്യോമയാന വൃത്തങ്ങളെയും ഇന്ത്യൻ-യുഎസ് അന്വേഷകർ തമ്മിലുള്ള ചർച്ചകളെയും ഉദ്ധരിച്ചാണ് ഇറ്റാലിയൻ പത്രം ഈ വാർത്ത നല്‍കിയത്. രണ്ട് എഞ്ചിനുകളുടെയും പവർ ഒരേസമയം നഷ്ടപ്പെട്ടതിന് സാങ്കേതിക തകരാറുകള്‍ ഒന്നും തന്നെ കണ്ടെത്താനായിട്ടില്ലെന്ന് ഈ വൃത്തങ്ങള്‍ അവകാശപ്പെടുന്നു.
റിപ്പോർട്ടിലെ അവകാശവാദങ്ങള്‍
2025 ജൂണ്‍ 12ന് അഹമ്മദാബാദില്‍ നിന്ന് പറന്നുയർന്ന ഉടൻ തന്നെ ഫ്യൂവല്‍ സ്വിച്ചുകള്‍ ഓഫ് ചെയ്തതാണ് അപകടകാരണമെന്ന് റിപ്പോർട്ട് പറയുന്നു. യുഎസില്‍ നടത്തിയ സിമുലേറ്റർ പരിശോധനകളില്‍ സാങ്കേതിക തകരാർ മൂലം രണ്ട് എഞ്ചിനുകളും ഇത്തരത്തില്‍ നിലയ്ക്കുന്ന സാഹചര്യം സൃഷ്ടിച്ചിട്ടില്ല. അതിനാല്‍ മനുഷ്യ ഇടപെടല്‍ മാത്രമാണ് ഏക സാധ്യതയെന്ന് റിപ്പോർട്ട് ചൂണ്ടിക്കാട്ടുന്നു.
അപകടം നടന്ന് ഒരു മാസത്തിന് ശേഷം പുറത്തുവന്ന പ്രാഥമിക റിപ്പോർട്ടില്‍ സ്വിച്ചുകള്‍ മാറ്റിയതിനെത്തുടർന്ന് എഞ്ചിൻ കരുത്ത് നഷ്ടപ്പെട്ടതായി സ്ഥിരീകരിച്ചിരുന്നു. എന്നാല്‍ എന്തുകൊണ്ടാണ് സ്വിച്ചുകള്‍ മാറ്റിയത് എന്ന് അതില്‍ വ്യക്തമാക്കിയിരുന്നില്ല. കോക്പിറ്റ് വോയ്‌സ് റെക്കോർഡറില്‍, “എന്തിനാണ് നിങ്ങള്‍ എഞ്ചിനുകള്‍ ഓഫ് ചെയ്തത്?” എന്ന് ഒരു പൈലറ്റ് ചോദിക്കുന്നതും “ഞാനല്ല അത് ചെയ്തത്” എന്ന് മറ്റേയാള്‍ മറുപടി നല്‍കുന്നതും രേഖപ്പെടുത്തിയിട്ടുണ്ടെന്നാണ് വിവരം. എഞ്ചിനുകള്‍ വീണ്ടും പ്രവർത്തിപ്പിക്കാനുള്ള ശ്രമങ്ങള്‍ പരാജയപ്പെടുകയായിരുന്നു.
റിപ്പോർട്ട് പ്രകാരം, ‘പൈലറ്റ് മോണിറ്ററിംഗ്’ ആയിരുന്ന ക്യാപ്റ്റൻ സുമീത് സബർവാളിലേക്കാണ് അന്വേഷണം നീളുന്നത്. ഫസ്റ്റ് ഓഫീസർ ക്ലൈവ് കുന്ദറാണ് ആ സമയം വിമാനം പറത്തിയിരുന്നത്. ഡാറ്റ പരിശോധനയില്‍ ആദ്യം ഇടത് എഞ്ചിനും പിന്നീട് വലത് എഞ്ചിനും ഓഫായതായി കണ്ടെത്തി. ക്യാപ്റ്റൻ ഇടതുവശത്താണ് ഇരിക്കുന്നത് എന്നത് ഇതിനോട് ചേർന്നുനില്‍ക്കുന്നു. അവസാന നിമിഷങ്ങളില്‍ ഫസ്റ്റ് ഓഫീസർ വിമാനം ഉയർത്താൻ ശ്രമിച്ചെങ്കിലും ക്യാപ്റ്റന്റെ ഭാഗത്തുനിന്നുള്ള നിയന്ത്രണങ്ങള്‍ നിഷ്ക്രിയമായിരുന്നുവെന്നും റിപ്പോർട്ട് അവകാശപ്പെടുന്നു.
പ്രതികരണങ്ങള്‍
ഇറ്റാലിയൻ റിപ്പോർട്ട് പുറത്തുവന്നതോടെ സോഷ്യല്‍ മീഡിയയില്‍ വലിയ പ്രതിഷേധമാണ് ഉയരുന്നത്. വിദേശ മാധ്യമങ്ങള്‍ പൈലറ്റുമാരെ ബലിയാടാക്കാൻ ശ്രമിക്കുകയാണെന്ന് പലരും ആരോപിച്ചു. ഇന്ത്യൻ കൊമേഴ്‌സ്യല്‍ പൈലറ്റ്‌സ് അസോസിയേഷൻ നേരത്തെ തന്നെ ഇത്തരം ആരോപണങ്ങളെ ശക്തമായി എതിർത്തിരുന്നു. പൈലറ്റുമാരുടെ ആത്മഹത്യ എന്ന തരത്തിലുള്ള ഊഹാപോഹങ്ങള്‍ ഈ തൊഴിലിനോടുള്ള അവഹേളനമാണെന്ന് അവർ വ്യക്തമാക്കി.
പാർലമെന്റില്‍ സർക്കാർ പറഞ്ഞത്
2025 ഡിസംബറില്‍ കേന്ദ്ര വ്യോമയാന മന്ത്രാലയം പാർലമെന്റില്‍ നല്‍കിയ മറുപടിയില്‍, അന്വേഷണം അന്താരാഷ്ട്ര മാനദണ്ഡങ്ങള്‍ പാലിച്ചാണ് നടക്കുന്നതെന്ന് അറിയിച്ചു. ഫ്ലൈറ്റ് റെക്കോർഡറുകള്‍ സുരക്ഷിതമാണെന്നും എയർക്രാഫ്റ്റ് ആക്സിഡന്റ് ഇൻവെസ്റ്റിഗേഷൻ ബ്യൂറോ ഒരു സ്വതന്ത്ര സ്ഥാപനമായാണ് പ്രവർത്തിക്കുന്നതെന്നും സർക്കാർ വ്യക്തമാക്കി.
