സ്വകാര്യ ആശുപത്രിയിലെ ചികിത്സപ്പിഴവുമൂലം രണ്ടര വയസുകാരി മരിച്ചതായി പരാതി. വെള്ളനാട് പുനലാല്‍ ചക്കിപ്പാറ ഷാനിമ മന്‍സിലില്‍ സിദ്ദീഖ് ഫാസില ദമ്പതികളുടെ മകള്‍ ഐഷ ഫാത്തിമയാണ് മരിച്ചത്. സംഭവത്തില്‍ ആര്യനാട് പൊലീസ് കേസെടുത്തു. കാട്ടാക്കട മമല്‍ ആശുപത്രിയിലെ ചികിത്സപ്പിഴവാണ് മരണകാരണമെന്നു രക്ഷിതാക്കള്‍ ആരോപിച്ചു.

ശിശുരോഗ വിദഗ്ധനെ കാണിക്കാനായി 19ന് കാട്ടാക്കടയിലെ സ്വകാര്യ ആശുപത്രിയില്‍ എത്തിച്ചു. വസ്ത്രങ്ങളുടെ അലര്‍ജിയാണെന്നാണ് ഡോക്ടര്‍ പറഞ്ഞത്. കണ്ണാശുപത്രിയില്‍ കാണിക്കാന്‍ നിര്‍ദേശിച്ചതനുസരിച്ച് 20ന് സ്വകാര്യ കണ്ണാശുപത്രിയിലും ചികിത്സ തേടി. ഇന്നലെ ഉച്ചയ്ക്ക് 11ന് വീട്ടില്‍ വച്ചു കുഞ്ഞിന് അസ്വസ്ഥതയുണ്ടായി. തളര്‍ച്ചയും ശ്വാസതടസ്സവും കൂടിയതോടെ കാട്ടാക്കടയിലെ സ്വകാര്യ ആശുപത്രിയില്‍ എത്തിച്ചെങ്കിലും ശിശുരോഗ വിദഗ്ധന്‍ അവധിയിലായിരുന്നു. മറ്റൊരു ഡോക്ടറാണു പരിശോധിച്ചത്.



ഓക്‌സിജന്‍ നല്‍കിയശേഷം കുട്ടിക്ക് രണ്ട് കുത്തിവയ്പുകള്‍ നല്‍കി. ഇതോടെ കുട്ടിയുടെ ഹൃദയമിടിപ്പ് കൂടി, ആരോഗ്യനില വഷളായി. ഉടന്‍ തന്നെ കുട്ടിയെ മറ്റൊരു സ്വകാര്യ ആശുപത്രി കാഷ്വല്‍റ്റിയില്‍ എത്തിച്ചെങ്കിലും രക്ഷിക്കാനായില്ല. പൊലീസ് സിദ്ധിഖിന്റെ മൊഴിയെടുത്തു. ഇരട്ടക്കുട്ടികളിലൊരാളാണ് ഐഷ. കുട്ടിക്ക് ജീവന്‍രക്ഷാ മരുന്നുകളാണു നല്‍കിയതെന്നും ആരോഗ്യനില വഷളായതിനെ തുടര്‍ന്നാണ് മറ്റൊരു ആശുപത്രിയിലേക്ക് പോകാന്‍ നിര്‍ദേശിച്ചതെന്നുമാണ് ആശുപത്രി അധികൃതരുടെ വിശദീകരണം.

തിരുവനന്തപുരം ചെങ്കോട്ടുകോണത്ത് സ്കൂളിൽ തീപിടിത്തം. ട്രിവാൻഡ്രം സ്കോട്ടിഷ് സ്കൂളിലാണ് തീപിടിത്തമുണ്ടായത്. സ്കൂൾ ഗ്രൗണ്ടിൽ നിർത്തിയിട്ടിരുന്ന മൂന്ന് സ്കൂൾ ബസുകൾ പൂർണമായി കത്തിനശിച്ചു. ഒരു ബസ് ഭാഗികമായും കത്തിനശിച്ചു. തിങ്കൾ പുലർച്ചെ 2.45ഓടെയാണ് അപകടമുണ്ടായത്. തിപിടിത്തത്തിന്റെ കാരണം വ്യക്തമല്ല.


സംഭവസമയത്ത് സ്കൂളില്‍ ഒരു സെക്യൂരിറ്റി മാത്രമാണുണ്ടായിരുന്നത്. തീ ആളിപ്പടരുന്നതുകണ്ട് അയല്‍ക്കാരാണ് ഫയര്‍ഫോഴ്സില്‍ വിവരമറിയിച്ചത്. കഴക്കൂട്ടം, ചാക്ക എന്നിവിടങ്ങളില്‍ നിന്നുള്ള ഫയര്‍ഫോഴ്സ് സംഘമെത്തിയാണ് തീയണച്ചത്. തീ പൂര്‍ണമായും അണച്ചു. രണ്ട് വലിയ ബസുകളും ഒരു മിനിബസുമാണ് കത്തി നശിച്ചത്. മറ്റൊരു വലിയ ബസ് ഭാഗികമായും കത്തി.എങ്ങനെയാണ് തീപിടുത്തം ഉണ്ടായതെന്ന് ഉള്ളത് വ്യക്തമല്ല

സ്കൂളിലെ സിസി ക്യാമറ ദൃശ്യങ്ങളും മറ്റും പരിശോധിച്ചാൽ മാത്രമേ കൂടുതൽ വ്യക്തമാവുകയുള്ളൂ എന്ന് കഴക്കൂട്ടം പോലീസ് പറഞ്ഞു. ആരോ കത്തിച്ചതാണെന്ന് സ്കൂൾ അധികൃതർ

വലിയ ബസുകൾ എല്ലാം ഒരുമിച്ച് ആയിരുന്നു പാർക്ക് ചെയ്തിരുന്നത്.ടെമ്പോ ട്രാവലർ മറ്റൊരു സ്ഥലത്തും പാർക്ക് ചെയ്തിരുന്നു.ടെമ്പോ ട്രാവലർ ബസുകളിലേക്ക് ഇടിച്ചു കയറ്റിയ ശേഷമാണ് തീ കത്തിച്ചിരിക്കുന്നത്

തിരുവനന്തപുരം: ആറ്റുകാല്‍ ഭഗവതി ക്ഷേത്രത്തിലെ പൊങ്കാല ഉത്സവത്തിന് തിങ്കളാഴ്ച തുടക്കമാകും. വൈകിട്ട് 5.30ന് ദേവിയെ കാപ്പുകെട്ടി കുടിയിരുത്തുന്നതോടെ തോറ്റംപ്പാട്ട് തുടങ്ങും. ഓരോ ദിവസത്തെ തോറ്റംപാട്ട് കഥാഭാഗവും ചടങ്ങുകളും പരസ്പരബന്ധമുള്ളതാകും. ഉത്സവത്തിന്റെ ഒമ്പതാം ദിവസമായ മാര്‍ച്ച്‌ മൂന്നിനാണ് ആറ്റുകാല്‍ പൊങ്കാല.


തിങ്കൾ രാത്രി എട്ടിന് അംബ ഓഡിറ്റോറിയത്തില്‍ കലാപരിപാടികളുടെ ഉദ്ഘാടനം മോഹന്‍ലാല്‍ നിര്‍വഹിക്കും. ചടങ്ങില്‍ ആറ്റുകാല്‍ ഭഗവതി ക്ഷേത്രം ട്രസ്റ്റിന്റെ അംബാ പുരസ്കാരം മോഹന്‍ലാലിന് നല്‍കും. രാത്രി 10ന് നന്ദഗോവിന്ദം ഭജന്‍സിന്റെ അവതരണം. മൂന്നാം ഉത്സവമായ ബുധൻ രാവിലെ 8.45ന് കുട്ടികളുടെ കുത്തിയോട്ട വ്രതം ആരംഭിക്കും. 28ന് തോറ്റംപാട്ടില്‍ രാജ്ഞിയുടെ ചിലമ്പ് മോഷ്ടിച്ചുവെന്ന കുറ്റമാരോപിച്ച് പാണ്ഡ്യരാജാവ് കോവലനെ വധിക്കുന്ന കഥ പാടും. ഇതിന്റെ ദുഖസൂചകമായി മാര്‍ച്ച് ഒന്നിന് ക്ഷേത്ര നട രാവിലെ ഏഴിനാണ് തുറക്കുക.


പൊങ്കാല ദിവസമായ മാര്‍ച്ച് മൂന്നിന് രാവിലെ 9.45ന് പൊങ്കാലയുടെ അടപ്പുവെട്ടോടെ പൊങ്കാല ആരംഭിക്കും. പകല്‍ 2.15ന് പൊങ്കാല നിവേദ്യം. ചന്ദ്രഗ്രഹണമായതിനാല്‍ പകൽ 3.10 മുതല്‍ ഏഴ് വരെ ദര്‍ശനം ഉണ്ടാകില്ല. രാത്രി 8.30ന് കുത്തിയോട്ടവും ചൂരല്‍ക്കുത്തും നടക്കും. രാത്രി 10.45ന് പുറത്തെഴുന്നെള്ളിപ്പും നാലിന് രാവിലെ എട്ടിന് അകത്തെഴുന്നള്ളിപ്പും നടക്കും. രാത്രി 9.45ന് കാപ്പഴിപ്പ് ചടങ്ങ് നടക്കും. പുലര്‍ച്ചെ 12.45ന് നടക്കുന്ന കുരുതി തര്‍പ്പണത്തോടെ ഉത്സവം സമാപിക്കും.

കൊല്ലം അഞ്ചലിൽ പെട്രോളൊഴിച്ച് യുവാവ് ജീവനൊടുക്കാൻ ശ്രമിച്ചു. അഞ്ചൽ സ്വദേശി റഫീഖാണ് ഇന്ന് ഉച്ചയോടെ ആത്മഹത്യയ്ക്ക് ശ്രമിച്ചത്. മോഷണക്കേസിൽ ഭാര്യ റിമാൻഡിൽ കഴിയുന്നതിന്റെ വിഷമത്തിലാണ് ഇയാൾ ദേഹത്ത് പെട്രോളൊഴിച്ച് തീ കൊളുത്തിയത്. പൊലീസെത്തിയാണ് ഇയാളെ ഉടൻ ആശുപത്രിയിലേക്ക് മാറ്റിയത്. സ്വകാര്യ ബസിൽവെച്ച് കുട്ടിയുടെ സ്വർണ്ണക്കൊലുസ് മോഷ്ടിച്ച കേസിലാണ് റഫീഖിന്റെ ഭാര്യ റിമാൻഡിലായത്. പിന്നീട് ഇവരിൽനിന്ന് കൊലുസ് കണ്ടെടുത്തിരുന്നു.