കൊല്ലം: കേരളാ പോലീസിന്റെ സംസ്ഥാന വ്യാപക ലഹരിവിരുദ്ധ ക്യാമ്പയിനായ ഓപ്പറേഷന് തൂഫാന്: ദി നാര്ക്കോ ഹണ്ട് പദ്ധതിയുടെ ഭാഗമായി നടത്തിയ പരിശോധനയില് ചവറ പോലീസ് സ്റ്റേഷന് പരിധിയില് വീണ്ടും ലഹരി വേട്ട. ഡാന്സാഫ് സംഘവും ചവറ പോലീസും സംയുക്തമായി നടത്തിയ പരിശോധനയില് 13.480 ഗ്രാം എംഡിഎംഎ യുമായി യുവാവ് പിടിയിലായി. ചവറ കുളങ്ങര ഭാഗം ഉമേഷ് ഭവനം വീട്ടില് ഉമേഷ് ലാല്(37) ആണ് അറസ്റ്റിലായത്.
ഇയാളില് നിന്ന് വില്പനയ്ക്കായി സൂക്ഷിച്ചിരുന്ന 13.480 ഗ്രാം എംഡിഎംഎ പോലീസ് പിടിച്ചെടുത്തു. ഇതോടെ ഒരാഴ്ചയ്ക്കുള്ളില് കൊല്ലം സിറ്റി പരിധിയില് 5 കേസുകളിലായി 43.74 ഗ്രാം എംഡിഎംഎ ആണ് കൊല്ലം സിറ്റി ഡാന്സാഫ് സംഘം പിടികൂടിയത്.
കഴിഞ്ഞ ദിവസം 1.05 ഗ്രാം എം.ഡി.എം.എ യുമായി മുഹമ്മദ് ഷഫീഖ് എന്ന യുവാവ് ചവറ പോലീസിന്റെ പിടിയിലായിരുന്നു. ഇയാളെ വിശദമായി ചോദ്യം ചെയ്യ്തതില് നിന്നും ലഭിച്ച വിവരത്തിന്റെ അടിസ്ഥാനത്തില് നടത്തിയ അന്വേഷണത്തിനും തുടര്പരിശോധനയ്ക്കുമൊടുവിലാണ് ഉമേഷ് ലാലിനെ അറസ്റ്റ് ചെയ്തത്. ആഡംബര ജീവിതം നയിക്കുന്നതിനായി ബാംഗ്ലൂരില് നിന്നും കുറഞ്ഞ വിലയ്ക്ക് മയക്ക് മരുന്ന് വാങ്ങി ചവറയിലും സമീപ പ്രദേശങ്ങളിലുമുള്ള സ്കൂള്-കോളേജ് വിദ്യാര്ത്ഥികള്ക്കും യുവാക്കള്ക്കും ഉയര്ന്ന വിലയില് വിതരണം നടത്തി വരികയായിരുന്നു പ്രതി.
ലഹരിമരുന്ന് ശൃംഖലകള്ക്കെതിരെ കൊല്ലം സിറ്റി പോലീസ് ശക്തമായ നടപടികള് തുടരുമെന്നും, ലഹരിമരുന്ന് വില്പ്പന, ഉപയോഗം, കടത്ത് എന്നിവ സംബന്ധിച്ച വിവരങ്ങള് പൊതുജനങ്ങള് പോലീസിനെ അറിയിക്കണമെന്നും കൊല്ലം സിറ്റി പോലീസ് കമ്മീഷണര് ഹേമലത.എം. അറിയിച്ചു.