കൊല്ലം: ജാര്‍ഖണ്ഡില്‍ നിന്ന് വില്‍പ്പനയ്ക്കായി 9.980 കിലോ കഞ്ചാവ് കടത്തിക്കൊണ്ടുവന്ന കേസില്‍ വെസ്റ്റ് ബംഗാള്‍ സ്വദേശി അറസ്റ്റില്‍. മുര്‍ഷിദാബാദ് സ്വദേശിയായ മോട്ടിയൂര്‍ ഷേക്കിനെ (45) ആണ് അഞ്ചു വര്‍ഷം കഠിനതടവിനും 50,000 രൂപ പിഴയൊടുക്കാനും വിധിച്ചത്.
കൊല്ലം ഫസ്റ്റ് അഡീഷണല്‍ സെഷന്‍സ് ജഡ്ജ് പി.എന്‍. വിനോദ് ഉത്തരവായത്. 2026 ഫെബ്രുവരിയിലായിരുന്നു കേസിനാസ്പദമായ സംഭവം. പുനലൂര്‍ റെയില്‍വേ സ്റ്റേഷനില്‍ പരിശോധന നടത്തി വരവേ പ്രതി ബാഗുമായി ഫ്ളൈ ഓവറിന്റെ മുകളില്‍ നില്‍ക്കുന്നത് ശ്രദ്ധയില്‍പ്പെട്ടു. രക്ഷപ്പെടാന്‍ ശ്രമിച്ച പ്രതിയെ പോലീസ് തടഞ്ഞുനിര്‍ത്തി പരിശോധിച്ചപ്പോഴാണ് 9 പൊതികളിലായി 9.980 കിലോയോളം കഞ്ചാവ് കണ്ടെത്തിയത്.
പുനലൂര്‍ റെയില്‍ പോലീസ് എസ്എച്ച്ഒ ജി.ശ്രീകുമാറിന്റെ നേതൃത്വത്തിലുള്ള പോലീസ് സംഘമാണ് പ്രതിയെ പിടികൂടിയതും കേസ് അന്വേഷിച്ച് കോടതി മുമ്പാകെ കുറ്റപത്രം സമര്‍പ്പിച്ചതും. പ്രോസിക്യുഷന് വേണ്ടി പബ്ലിക് പ്രോസിക്യൂട്ടര്‍ അഡ്വ. സിസിന്‍ ജി. മുണ്ടയ്ക്കല്‍ ഹാജരായി. പ്രോസിക്യുഷന് നടപടികള്‍ എകോപിപ്പിച്ചത് സിപിഒ പ്രേംകുമാര്‍ ആയിരുന്നു.
