കൊച്ചിയിലെ റാഡിസൺ ബ്ലൂ ഹോട്ടലിൽ DJ പാർട്ടികൾക്ക് നിയന്ത്രണം ഏർപ്പെടുത്തിയ പൊലീസ് നടപടിയിൽ രൂക്ഷ നിരീക്ഷണങ്ങളുമായി ഹൈക്കോടതി. DJ പാർട്ടികളെ മുൻവിധിയോടെ കാണാനാകില്ലെന്നും ഇത്തരം പാർട്ടികളെ മാത്രം പ്രത്യേകമായി ലക്ഷ്യമിടുന്നത് എന്തിനാണെന്നും ഡിവിഷൻ ബെഞ്ച് ചോദിച്ചു.
ബാറുകളിൽ നൃത്തം ചെയ്യാനോ പാട്ട് കേൾക്കാനോ പാടില്ലെന്ന് പറയാനാകുമോ? നൃത്തം ചെയ്യുന്നത് മയക്കുമരുന്ന് ഉപയോഗത്തിന് കാരണമാകുമെന്ന് എങ്ങനെ പറയാനാകുമെന്നും ജസ്റ്റിസ് ദേവൻ രാമചന്ദ്രൻ ചോദിച്ചു. ഹോട്ടലിൽ മദ്യം വിളമ്പുന്നതിൽ പൊലീസിന് എതിർപ്പില്ല, എന്നാൽ DJ പാർട്ടികൾക്ക് മാത്രം നിയന്ത്രണം ഏർപ്പെടുത്തുന്നത് എന്തിനാണെന്നും കോടതി ചോദിച്ചു.
ആളുകൾ സന്തോഷിക്കാനാണ് ഇത്തരം പാർട്ടികളിൽ പങ്കെടുക്കുന്നത്. രാത്രി സിനിമയ്ക്ക് പോകുന്നതൊഴിച്ചാൽ കേരളത്തിൽ മറ്റെന്താണ് ചെയ്യാനുള്ളത്? നൈറ്റ് ലൈഫ് എങ്ങനെ നിരോധിക്കാനാകുമെന്നും കോടതി നിരീക്ഷിച്ചു. അതേസമയം, ലഹരി ഉപയോഗത്തോട് വിട്ടുവീഴ്ചയില്ലെന്നും നിയമവിരുദ്ധ പ്രവർത്തനങ്ങൾ തടയാൻ വേദികളിൽ പൊലീസിനെ വിന്യസിക്കാമെന്നും കോടതി വ്യക്തമാക്കി. ബാർ ലൈസൻസില്ലാത്ത സ്വകാര്യ സ്ഥലത്ത് DJ പാർട്ടി നടത്തുന്നതിന് പ്രത്യേക ലൈസൻസ് ആവശ്യമുണ്ടോ, ഇത്തരം പാർട്ടികൾക്ക് നിയന്ത്രണം ഏർപ്പെടുത്താൻ എന്താണ് നിയമപരമായ അടിസ്ഥാനമെന്നും വ്യക്തമാക്കാൻ സർക്കാരിനോട് കോടതി നിർദേശിച്ചു.





























