മത്തിക്ക് വീണ്ടും പൊന്നു വിലയാകും. എല് നിനോ വില്ലനാകും. സംസ്ഥാനത്ത് മത്തി ലഭ്യത കുറയുമെന്ന മുന്നറിയിപ്പുമായി സിഎംഎഫ്ആര്ഐ. സമുദ്ര ഉഷ്ണതരംഗങ്ങള്ക്ക് കാരണമാകുന്ന എല് നിനോ പ്രതിഭാസം അടുത്ത വര്ഷം മത്തിയുടെ ലഭ്യതയെ പ്രതികൂലമായി ബാധിക്കുമെന്ന് സിഎംഎഫ്ആര്ഐ വ്യക്തമാക്കുന്നു. ഒക്ടോബര്-നവംബര് മാസങ്ങളില് ശക്തിപ്പെടുമെന്ന് കരുതുന്ന എല് നിനോയുടെ പ്രത്യാഘാതം ഇന്ത്യന് മഹാസമുദ്രത്തില് അടുത്ത വര്ഷം ഏപ്രില് മേയ് മാസങ്ങളില് പ്രകടമാകുമെന്നാണ് കേന്ദ്ര സമുദ്ര മല്സ്യ ഗവേഷണ സ്ഥാപനം മുന്നറിയിപ്പ് നല്കുന്നത്. കടലിലെ താപതരംഗങ്ങളും താപവ്യതിയാനങ്ങളും മത്തി ഉള്പ്പെടെയുള്ള ചെറിയ ഉപരിതല മല്സ്യങ്ങളെയാണ് ഏറ്റവും കൂടുതല് ബാധിക്കുന്നത്. രാജ്യത്താകെ സമുദ്രമല്സ്യ ലഭ്യതയില് ഇടിവുണ്ടാകാന് സാധ്യതയുണ്ട്. തുടര്ച്ചയായ സമുദ്രതാപനം പവിഴപ്പുറ്റുകളുടെ നാശത്തിനും അതുവഴി ചെമ്പല്ലി പോലെ പവിഴപ്പുറ്റുകളെ ആശ്രയിച്ചു കഴിയുന്ന മല്സ്യങ്ങളുടെ സ്വാഭാവിക പ്രജനനത്തെയും ലഭ്യതയെയും ബാധിക്കുമെന്നും സിഎംഎഫ്ആര്ഐ പഠനം പറയുന്നു.