തിരുവനന്തപുരം: കെഎസ്ആര്ടിസി ജീവനക്കാര്ക്കും പെന്ഷന്കാര്ക്കും രണ്ട് ഗഡു ഡിഎ (ക്ഷാമബത്ത), ഡിആര് (ക്ഷാമാശ്വാസം) എന്നിവ അനുവദിച്ചു. ജീവനക്കാരുടെ ഡിഎയിലും പെന്ഷന്കാരുടെ ഡിആറിലും ഏഴ് ശതമാനം വര്ദ്ധനവാണ് ഇതോടെ ഉണ്ടാകുന്നത്.
ഇതിനാവശ്യമായ 10 കോടി രൂപ അധിക സഹായമായി കോര്പറേഷന് അനുവദിച്ചതായി ധനമന്ത്രി കെഎന് ബാലഗോപാല് അറിയിച്ചു. 2022 ജനുവരി മുതല് സാമ്പത്തിക ആനുകൂല്യം ലഭ്യമാകുന്ന തരത്തിലാണ് കെഎസ്ആര്ടിസിയില് ശമ്പള പരിഷ്കരണം നടപ്പിലാക്കിയത്.
ഇതിന്റെ തുടര്ച്ചയായാണ് ഇപ്പോള് രണ്ട് ഗഡുക്കള് കൂടി അനുവദിക്കാന് സര്ക്കാര് തീരുമാനിച്ചത്. കോര്പറേഷന്റെ സാമ്പത്തിക പ്രതിസന്ധികള്ക്കിടയിലും ജീവനക്കാരുടെ ക്ഷേമം മുന്നിര്ത്തി സര്ക്കാര് വലിയ പിന്തുണയാണ് നല്കുന്നത്. ഈ സാമ്പത്തിക വര്ഷം മാത്രം ഇതുവരെ 1,574 കോടി രൂപയാണ് സര്ക്കാര് സഹായമായി കെഎസ്ആര്ടിസിക്ക് നല്കിയത്.
ഇതില് 1,439 കോടി രൂപ പ്രത്യേക സഹായമായും പുതിയ ബസുകള് വാങ്ങുന്നതടക്കമുള്ള മൂലധന ചെലവുകള്ക്കായി 135 കോടി രൂപയും കൈമാറി. ബജറ്റില് വകയിരുത്തിയ 1035 കോടി രൂപയ്ക്ക് പുറമെ 539 കോടി രൂപ അധിക സഹായമായും നല്കി. ഇടതുപക്ഷ സര്ക്കാര് അധികാരത്തില് വന്ന ശേഷം ഇതുവരെ ആകെ 9,015 കോടി രൂപയാണ് കെഎസ്ആര്ടിസിയുടെ നിലനില്പ്പിനും വികസനത്തിനുമായി അനുവദിച്ചത്.