കോട്ടയത്ത് മഴക്കെടുതി: എൻ.ഡി.ആർ.എഫ് രക്ഷാപ്രവർത്തനം ഊർജിതം; 215 പേരെ മാറ്റിപ്പാർപ്പിച്ചു
കനത്ത മഴയിലും പ്രളയസമാനമായ സാഹചര്യത്തിലും കോട്ടയം ജില്ലയിൽ രക്ഷാപ്രവർത്തനം ഊർജിതമാക്കി ദേശീയ ദുരന്ത നിവാരണ സേന (NDRF). അർക്കോണം 04-ാം ബറ്റാലിയനിലെ ഇൻസ്പെക്ടർ അരുൺ കുമാർ ചൗഹാന്റെ നേതൃത്വത്തിലുള്ള 30 അംഗ സംഘമാണ് രാപ്പകലില്ലാതെ ജനങ്ങൾക്ക് കാവലായി രംഗത്തുള്ളത്.
എറണാകുളത്തുനിന്നും കോട്ടയത്ത് എത്തിയ ഈ പ്രത്യേക സംഘം, വിജയാപുരം വില്ലേജിലെ ഇറഞ്ഞാൽ, ലില്ലിക്കൽ എന്നീ ദുരിതബാധിത പ്രദേശങ്ങളിൽ നടത്തിയ മിന്നൽ രക്ഷാപ്രവർത്തനത്തിലൂടെ 215 പേരെയാണ് സുരക്ഷിതമായി മാറ്റിപ്പാർപ്പിച്ചത്. വെള്ളം കയറിയ വീടുകളിൽ ഒറ്റപ്പെട്ടുപോയ കൈക്കുഞ്ഞുങ്ങൾ ഉൾപ്പെടെയുള്ളവരെ സ്വന്തം ജീവൻ പോലും പണയം വെച്ച് എൻ.ഡി.ആർ.എഫ് ജവാന്മാർ സുരക്ഷിത സ്ഥാനങ്ങളിലെത്തിച്ചു.
ആശ്വാസമായി നിസ്വാർത്ഥ സേവനം: യാതൊരുവിധ ആശങ്കകൾക്കും ഇടനൽകാതെ, ഓരോ മനുഷ്യനെയും ചേർത്തുപിടിച്ചുള്ള ഇവരുടെ സേവനം ജനങ്ങൾക്ക് വലിയൊരു ആശ്വാസമാണ് പകർന്നുനൽകുന്നത്.
മഴ ശക്തമായി തുടരുന്ന സാഹചര്യത്തിൽ കോട്ടയം ജില്ലയിലെ പ്രൊഫഷണൽ കോളജുകൾ ഉൾപ്പെടെയുള്ള എല്ലാ വിദ്യാഭ്യാസ സ്ഥാപനങ്ങൾക്കും, അങ്കണവാടികൾ, ട്യൂഷൻ സെന്ററുകൾ, സ്പെഷൽ ക്ലാസുകൾ എന്നിവയ്ക്കും ജില്ലാ കളക്ടർ അവധി പ്രഖ്യാപിച്ചിട്ടുണ്ട്.
ജില്ലയിൽ മഴക്കെടുതി രൂക്ഷമായി തുടരുകയാണ്. നിലവിൽ 141 റിലീഫ് ക്യാമ്പുകളിലായി 2383 കുടുംബങ്ങളിലെ 6416 പേരാണ് സുരക്ഷിതരായി കഴിയുന്നത്.
ജാഗ്രതാ നിർദ്ദേശം:
- അപകടസാധ്യതകൾ ഒഴിവാക്കുന്നതിന്റെ ഭാഗമായി വെള്ളം കെട്ടിനിൽക്കുന്ന സ്ഥലങ്ങളിലും നദികളുടെയും തോടുകളുടെയും സമീപത്തേക്കും പോകരുതെന്ന് അധികൃതർ കർശന നിർദ്ദേശം നൽകിയിട്ടുണ്ട്.
- വെള്ളം കെട്ടിനിൽക്കുന്ന റോഡുകളിലൂടെ വാഹനങ്ങളിലോ നടന്നുപോയോ ഉള്ള യാത്രകൾ അതീവ അപകടകരമാണെന്നും ജാഗ്രത പാലിക്കണമെന്നും ജില്ലാ ഭരണകൂടം അറിയിച്ചു.
ജനങ്ങളുടെ ജീവനും സ്വത്തിനും സംരക്ഷണം ഉറപ്പാക്കാൻ എൻ.ഡി.ആർ.എഫ് ടീമും സന്നദ്ധപ്രവർത്തകരും ജില്ലാ ഭരണകൂടത്തോടൊപ്പം സദാ കർമ്മനിരതരായി രംഗത്തുണ്ട്.
