കുന്നത്തൂർ:ജലജീവൻ മിഷൻ്റെ ഭാഗമായി കുന്നത്തൂർ-കരുനാഗപ്പള്ളി നിയോജക മണ്ഡലങ്ങളിലെ 6 പഞ്ചായത്തുകളെ ഉൾപ്പെടുത്തി 125 കോടി ചെലവിൽ നടപ്പാക്കുന്ന സംയോജിത ശുദ്ധജല പദ്ധതിയുടെ ജലശുദ്ധീകരണ പ്ലാൻ്റ് നിർമ്മാണം തടഞ്ഞ് നാട്ടുകാർ പ്രതിഷേധിച്ചു.കുന്നത്തൂർ ഞാങ്കടവിൽ കല്ലടയാറ്റിൽ തടയണ സ്ഥാപിച്ച് വെള്ളം പമ്പ് ചെയ്ത് അമ്പുവിളയിൽ നിർമ്മിക്കുന്ന ടാങ്കിൽ എത്തിച്ച ശുദ്ധീകരിച്ച ശേഷം വിതരണം ചെയ്യാനാണ് പദ്ധതിയുടെ ലക്ഷ്യം.എന്നാൽ ഇതിൻ്റെ ഭാഗമായി പൈപ്പ് ഇടാനായി കുന്നത്തൂർ പഞ്ചായത്തിലെ കിഴക്കൻ മേഖലയായ ഐവർകാലയിലെ മുഴുവൻ റോഡുകളും  വെട്ടിപ്പൊളിച്ചതാണ് ജനങ്ങൾക്ക് വിനയായത്.ഐവർകാലയിലെ പ്രധാനപ്പെട്ടതും അപ്രധാനവുമായ മുഴുവൻ റോഡുകളും വാട്ടർ അതോറിറ്റി കുളം തോണ്ടിയിരിക്കയാണ്.കളിക്കലഴികത്ത് ജംഗ്ഷൻ,അമ്പുവിള റോഡ്,പ്ലാമുക്ക് തുടങ്ങിയ ഭാഗങ്ങളിൽ കൂടി കാൽനടയാത്ര പോലും അപ്രാപ്യമാണ്.പാതയോരത്ത് കൂറ്റൻ
പൈപ്പുകൾ അലക്ഷ്യമായി കൂട്ടിയിട്ടിരിക്കുന്നത് അപകടങ്ങൾക്കും കാരണമാകുന്നു.മാസങ്ങളായി ഇത്തരം
പൈപ്പുകളിൽ കാട്ടുപന്നികൾ വസിക്കുന്നതായും പ്രദേശവാസികൾ പറയുന്നു.പൊടി ശല്യവും അതിരൂക്ഷമാണ്.മേഖലയിൽ ജനങ്ങൾ ഒറ്റപ്പെട്ട അവസ്ഥയിലാണ്.അപകടങ്ങൾ പതിവായിട്ടും ജനങ്ങൾ ദുരിതം പേറി കഴിയാൻ തുടങ്ങിയിട്ടും മാസങ്ങൾ ഏറെയായെങ്കിലും റോഡുകൾ സഞ്ചാരയോഗ്യമാക്കാൻ അധികൃതർ തയ്യാറായിരുന്നില്ല.തുടർന്ന് നാട്ടുകാർ പ്രതിഷേധവുമായി എത്തിയതോടെ
ബ്ലോക്ക് – ഗ്രമ പഞ്ചായത്ത് പ്രസിഡൻ്റുമാർ,മറ്റ് ജനപ്രതിനിധികൾ എന്നിവരുടെ സാന്നിധ്യത്തിൽ വാട്ടർ അതോറിറ്റി എൻജിനിയറുമായി ചർച്ച നടത്തുകയുണ്ടായി.ജലം നിറച്ച് പരിശോധന നടത്തി ഫെബ്രുവരി ആദ്യ ആഴ്ചയിൽ പൈപ്പ് ഇടീൽ പൂർത്തികരിക്കുമെന്നും,തുടർന്ന് റോഡ് ടാറിങ് നടത്തുമെന്നുമായിരുന്നു ലഭിച്ച ഉറപ്പ്.ഇതിനായി നബാഡിൽ നിന്നും ഉടനടി പണം ലഭ്യമാകുമെന്നും അറിയിച്ചിരുന്നു.എന്നാൽ മാസങ്ങൾ പലത് പിന്നിട്ടിട്ടും നൽകിയ ഉറപ്പുകളിൽ ഒന്നു പോലും പാലിക്കാൻ അധികൃതർ തയ്യാറായില്ലെന്ന് നാട്ടുകാർ പറയുന്നു.നിരവധി തവണ കോവൂർ കുഞ്ഞുമോൻ എംഎൽഎയ്ക്ക് നേരിട്ട് പരാതി നൽകിയെങ്കിലും നടപടി ഉണ്ടായില്ല.മാത്രമല്ല പ്രതിഷേധം ഭയന്ന് പൊട്ടിപ്പൊളിഞ്ഞ റോഡുകൾ അവശേഷിക്കുന്ന ഐവർകാലയിലേക്ക് എംഎൽഎ എത്താറില്ലെന്നും ആക്ഷേപമുണ്ട്.ഈ സാഹചര്യത്തിലാണ് കുന്നത്തൂർ അമ്പുവിളയിലെ ജലശുദ്ധീകരണ പ്ലാൻ്റ് നിർമ്മാണം ജനപ്രതിനിധികളും പ്രദേശവാസികളും ചേർന്ന് തടഞ്ഞത്.ആർവൈഎഫ് സംസ്ഥാന പ്രസിഡൻ്റ് ഉല്ലാസ് കോവൂർ ഉദ്ഘാടനം ചെയ്തു.പഞ്ചായത്ത് അംഗങ്ങളായ പി.അനിൽകുമാർ,ടി.കെ പുഷ്പകുമാർ,ആക്ഷൻ കൗൺസിൽ കൺവീനർ രാജേഷ്കുമാർ,ഹരീന്ദ്രകുമാർ, ജയൻ.എസ്,ദേവരാജൻ നായർ എന്നിവർ പ്രസംഗിച്ചു.

ശാസ്താംകോട്ട:ഭരണിക്കാവിലെ ട്രാഫിക് പരിഷ്ക്കരണവുമായി ബന്ധപ്പെട്ട് ട്രാഫിക് റെഗുലേറ്ററി കമ്മിറ്റി യോഗത്തിലെടുത്ത തീരുമാനങ്ങൾ നടപ്പാക്കുന്നത് സംബന്ധിച്ച് 13ന് പകൽ രണ്ടിന് താലൂക്ക് ഓഫീസ് കോൺഫറൻസ് ഹാളിൽ സംയുക്തയോഗം ചേരാൻ താലൂക്ക് വികസന സമിതി യോഗത്തിൽ തീരുമാനം.ബ്ലോക്ക് – ഗ്രാമ പഞ്ചായത്ത് പ്രസിഡൻ്റുമാർ,കുന്നത്തൂർ തഹസീൽദാർ,കൊല്ലം എൻഫോഴ്സ്മെൻ്റ് ആർടിഒ, ശാസ്താംകോട്ട ഡിവൈഎസ്പി,കുന്നത്തൂർ ജെആർടിഒ,കെഎസ്ആർടിസി കരുനാഗപ്പള്ളി,പ്രൈവറ്റ് ബസ് ഓണേഴ്സ് അസോസിയേഷൻ ഭാരവാഹികൾ,വ്യാപാരി വ്യവസായി പ്രതിനിധികൾ എന്നിവരെ ഉൾപ്പെടുത്തി യോഗം ചേരാൻ ശാസ്താംകോട്ട പഞ്ചായത്ത് സെക്രട്ടറിയെ ചുമതലപ്പെടുത്തി.

ശാസ്താംകോട്ട ജംഗ്ഷനിൽ ഹൈമാസ്റ്റ് ലൈറ്റ് മറച്ചു കൊണ്ട് സ്ഥാപിച്ചിരിക്കുന്ന ബോർഡ് നീക്കം ചെയ്യാൻ പഞ്ചായത്ത് സെക്രട്ടറിയെ ചുമതലപ്പെടുത്തി.പുതിയകാവ് – ചക്കുവള്ളി റോഡിൽ കെസിടി ജംഗ്ഷനു സമീപം സ്ഥിരമായി വാഹനാപകടങ്ങൾ ഉണ്ടാകുന്നത് സംബന്ധിച്ച് വിശദ പരിശോധന നടത്തി നടപടികൾ കൈക്കൊള്ളുന്നതിന് പിഡബ്ല്യൂഡി ഓച്ചിറ റോഡ് അസി.എൻജിനീയർക്ക് നിർദ്ദേശം നൽകി.

ശൂരനാട് വടക്ക് മണലിക്കൽ പുഞ്ചയിൽ നിന്ന് അനധികൃതമായി ചെളിയെടുക്കുന്നത് സംബന്ധിച്ച് പരിശോധന നടത്തി നടപടി സ്വീകരിക്കുന്നതിന് ശൂരനാട് എസ്എച്ച്ഒയെ ചുമതലപ്പെടുത്തി.സീസ് ചെയ്ത് കാലങ്ങളായി താലൂക്കാഫീസ് വളപ്പിൽ സൂക്ഷിച്ചിരിക്കുന്ന പഴയ വാഹനങ്ങൾ നീക്കം ചെയ്യുന്നതിന് ശാസ്താംകോട്ട എസ്എച്ച്ഒയെ ചുമതലപ്പെടുത്തി.ലോറികളും ടിപ്പറുകളും അമിത വേഗതയിൽ സഞ്ചരിക്കുന്നില്ലെന്ന് ഉറപ്പ് വരുത്തുന്നതിനായി കുന്നത്തൂർ ജെആർടിഒയ്ക്ക് നിർദ്ദേശം നൽകി.താലൂക്ക് പരിധിയിലുള്ള മുഴുവൻ പഞ്ചായത്ത് കിണറുകളും വൃത്തിയാക്കുന്നതിന് എല്ലാ ഗ്രാമപഞ്ചായത്ത് സെക്രട്ടറിമാരെയും ചുമതലപ്പെടുത്തി.

താലൂക്കാശുപത്രിക്കെട്ടിട നിര്‍മ്മാണത്തിന് നടപടി സ്വീകരിക്കാത്തതില്‍പ്രതിഷേധിച്ച് കോണ്‍ഗ്രസ് അംഗം തുണ്ടില്‍ നൗഷാദ് താലൂക്ക് സഭ ബഹിഷ്കരിച്ചു.

താലൂക്ക് വികസന സമിതിയിൽ ഓഫീസ് മേധാവികൾ തന്നെ പങ്കെടുക്കണമെന്ന് താലൂക്ക് പരിധിയിലെ ഓഫീസുകൾക്ക് നിർദ്ദേശം നൽകുന്നതിനായി തഹസീൽദാരെ ചുമതലപ്പെടുത്തി.യോഗത്തിൽ കോവൂർ കുഞ്ഞുമോൻ എംഎൽഎ അധ്യക്ഷത വഹിച്ചു.വൈ.ഗ്രിഗറി,പ്രൊഫ.എസ്. അജയൻ,തുണ്ടിൽ നൗഷാദ്,കുറ്റിയിൽ നിസാം,അഡ്വ.എ.നൗഷാദ്,പുത്തൂർ സനിൽ,വിവിധ വകുപ്പ് മേധാവികർ,കുന്നത്തൂർ തഹസീൽദാർ,ഭൂരേഖാ തഹസീൽദാർ എന്നിവർ പങ്കെടുത്തു.