തിരുവനന്തപുരം . മലപ്പുറത്തെ മഴക്കെടുതി ദുരന്തത്തില് മരിച്ചവരുടെ വീടുകളില്പോകാന് ചാർട്ടേഡ് വിമാനത്തിൽ യാത്ര നടത്തിയതിന് ആരാണ് പണം മുടക്കിയതെന്ന് പറയാതെ മുഖ്യമന്ത്രി വി. ഡി. സതീശൻ ഒഴിഞ്ഞുമാറി. ഇതു സംബന്ധിച്ച മാധ്യമപ്രവത്തകരുടെ ചോദ്യത്തിൽ അസംതൃപ്തനായ സതീശൻ മലപ്പുറം യാത്ര സർക്കാർ ചെലവിലല്ലെന്നും, ആരാണ് പണം മുടക്കിയത് എന്ന് പറയുന്നത് എന്തിനാണെന്നും ചോദിച്ചു. മലപ്പുറത്ത് വലിയ അപകടം ഉണ്ടായി.
പോയില്ലെങ്കിൽ 6 പേര് മരിച്ചിട്ടും പോകാത്തതെന്താണെന്ന് ചോദിക്കും. മുഖ്യമന്ത്രി തിരിഞ്ഞു നോക്കിയില്ലെന്ന് പറയും. പരിചയക്കാരൻ വിമാനം അറേഞ്ച് ചെയ്തു തന്നു. അതിലെന്ത് തെറ്റാണ്. മലയാളി ആയ ഒരാൾ അറേഞ്ച് ചെയ്ത ഫ്ലൈറ്റിലാണ് പോയത്. ഇനിയും പോകും. അതിൽ എന്താണ് തെറ്റ്. പിണറായിയും ഉമ്മൻ ചാണ്ടിയും പോയിട്ടുണ്ട്. പിണറായി ആരുടെ വിമാനത്തിൽ പോയി എന്ന് ഞാൻ പ്രതിപക്ഷത്തുള്ളപ്പോൾ ഞാൻ ചോദിച്ചില്ല. വിമാനം അറേഞ്ച് ചെയ്യുന്നവർ ഔദാര്യം കൈപറ്റുന്നവരല്ല. അങ്ങനെ സഹായിക്കുന്ന ഒരു സര്ക്കാരുമല്ല ഇവിടുള്ളത്. ഇനിയും ഞാൻ പോകുമെന്നും ആരാണ് പണം മുടക്കിയതെന്ന് പറയാനുദ്ദേശിക്കുന്നില്ലെന്നും സതീശൻ പറഞ്ഞു.
മന്ത്രിമാര് വിദേശത്ത് പോയത് എന്റെ അനുമതിയോടെയാണ്. ആയിരക്കണക്കിന് വിദേശ മലയാളി അസോസിയേഷനുകളുണ്ട്. അവരുടെ ക്ഷണം സ്വീകരിച്ച് പോയി മറ്റു നാടുകളിലെ കാര്യങ്ങള് അവര് പഠിച്ചുവരട്ടെയെന്നും സതീശന് പറഞ്ഞു. കെഎം ഷാജി ഉപയോഗിച്ച കാര് വര്ക്ഷോപ്പിലായി. പകരം സുഹൃത്തിന്റെ കാറില്പോയത് അനുമതിയോടെയാണ്. അത് അല്പസമയം കൂടുതലായിപ്പോയി എന്നൊക്കെ പറഞ്ഞ് വിവാദമുണ്ടാക്കുന്നവര് ചിന്തിക്കണം.
