കൊല്ലം: എക്സൈസ് വകുപ്പിന്റെ സംസ്ഥാനവ്യാപക പരിശോധനയായ ‘ഓപ്പറേഷന് തണ്ടര്’ ഭാഗമായി കൊല്ലം എക്സൈസ് സ്ക്വാഡ് നടത്തിയ റെയ്ഡില് 30 ഗ്രാം കഞ്ചാവും നിരോധിത പുകയില ഉല്പ്പന്നങ്ങളും പിടിച്ചെടുത്തു. മയ്യനാട് കൂട്ടിക്കട പീടികമുക്ക് സ്വദേശിയായ സനൂജ് (43) ആണ് പിടിയിലായത്. രഹസ്യവിവരത്തിന്റെ അടിസ്ഥാനത്തില് നടത്തിയ പരിശോധനയിലാണ് സനൂജിന്റെ വീട്ടില് ഒളിപ്പിച്ചുവെച്ചിരുന്ന കഞ്ചാവ് എക്സൈസ് സംഘം കണ്ടെത്തിയത്. അന്വേഷണത്തില് ഇയാള്ക്കെതിരെ മുമ്പും അനധികൃത മദ്യവില്പ്പന കേസ് ഉണ്ടായിരുന്നുവെന്നും, 57 കുപ്പി അനധികൃത മദ്യം കൈവശം വച്ച കേസില് നേരത്തെ പിടിയിലായിട്ടുണ്ടെന്നും എക്സൈസ് അധികൃതര് അറിയിച്ചു. മയക്കുമരുന്നും നിരോധിത പുകയില ഉല്പ്പന്നങ്ങളും എത്തിച്ചുനല്കുന്ന ശൃംഖലയെക്കുറിച്ച് കൂടുതല് അന്വേഷണം പുരോഗമിക്കുകയാണെന്ന് എക്സൈസ് അറിയിച്ചു.