കൊല്ലം: ശാസ്താംകോട്ടയിൽ ദളിത് യുവാവിനെ പോലീസ് സംഘം ക്രൂരമായി മർദിച്ചെന്ന പരാതിയിൽ കുറ്റക്കാരായ പോലീസ് ഉദ്യോഗസ്ഥർക്കെതിരെ അടിയന്തരവും ശക്തവുമായ നടപടി സ്വീകരിക്കണമെന്ന് കൊടിക്കുന്നിൽ സുരേഷ് എംപി ആവശ്യപ്പെട്ടു. നിയമം സംരക്ഷിക്കേണ്ട പോലീസ് തന്നെ ഒരു ദളിത് യുവാവിനെതിരെ അതിക്രമം നടത്തിയെന്ന ആരോപണം അതീവ ഗൗരവമുള്ളതാണെന്നും സംഭവത്തിൽ സമഗ്രമായ അന്വേഷണം നടത്തി കുറ്റക്കാർക്കെതിരെ കർശന നടപടി ഉറപ്പാക്കണമെന്നും അദ്ദേഹം പറഞ്ഞു.
പോക്സോ കേസ് പ്രതിയായ സഹോദരനെ അന്വേഷിച്ചെത്തിയ പോലീസ് സംഘം 23കാരനായ യുവാവിനെ കാറിൽ കയറ്റിക്കൊണ്ടുപോയി ക്രൂരമായി മർദിച്ചെന്ന ആരോപണം ഞെട്ടിക്കുന്നതാണ്. യുവാവിന്റെ ജനനേന്ദ്രിയത്തിന് ഗുരുതരമായി പരിക്കേൽക്കുന്ന തരത്തിൽ മർദനം നടന്നുവെന്ന ആരോപണവും പുറത്തുവന്നിട്ടുണ്ട്. സംഭവത്തിന്റെ മുഴുവൻ വസ്തുതകളും പുറത്തുകൊണ്ടുവരാൻ സ്വതന്ത്രവും നിഷ്പക്ഷവുമായ അന്വേഷണം നടത്തണം.
ഒരു കുറ്റകൃത്യവുമായി ബന്ധപ്പെട്ട അന്വേഷണത്തിന്റെ പേരിൽ മറ്റൊരാളെ നിയമവിരുദ്ധമായി മർദിക്കാനും പീഡിപ്പിക്കാനും പോലീസിന് അധികാരമില്ല. പ്രത്യേകിച്ച് ഒരു ദളിത് യുവാവിനെതിരെ പോലീസ് അധികാരം ദുരുപയോഗം ചെയ്തിട്ടുണ്ടെങ്കിൽ അത് അതീവ ഗൗരവത്തോടെ കാണേണ്ട വിഷയമാണ്. പോലീസ് സേനയിലെ ആരും നിയമത്തിന് അതീതരല്ല.
സംഭവത്തിൽ ആരോപണവിധേയരായ ഉദ്യോഗസ്ഥർക്കെതിരെ അടിയന്തരമായി വകുപ്പുതല നടപടിയെടുക്കണം. അന്വേഷണം പൂർത്തിയാകുന്നതുവരെ ആരോപണവിധേയരായ ഉദ്യോഗസ്ഥരെ ക്രമസമാധാന ചുമതലയിൽ നിന്ന് മാറ്റിനിർത്തുകയും വേണം. കുറ്റം തെളിയുന്ന പക്ഷം അവരെ സർവീസിൽ നിന്ന് പുറത്താക്കുന്നതുൾപ്പെടെയുള്ള ഏറ്റവും കർശനമായ നടപടി സ്വീകരിക്കണം.
പോലീസ് സേനയിൽ രാഷ്ട്രീയ താൽപര്യങ്ങൾക്കനുസരിച്ച് പ്രവർത്തിക്കുന്ന വിഭാഗങ്ങളോ സെല്ലുകളോ ഉണ്ടെന്ന ആരോപണവും സർക്കാർ ഗൗരവമായി പരിശോധിക്കണം. സർക്കാർ നയത്തിനും നിയമവാഴ്ചയ്ക്കും വിരുദ്ധമായി പ്രവർത്തിക്കുന്ന പോലീസുകാരെ ക്രമസമാധാന ചുമതലകളിൽ തുടരാൻ അനുവദിക്കരുത്. പോലീസിന്റെ രാഷ്ട്രീയവത്കരണം അവസാനിപ്പിച്ച് നിയമത്തിനും ഭരണഘടനയ്ക്കും ജനങ്ങളുടെ അവകാശങ്ങൾക്കും വിധേയമായി സേന പ്രവർത്തിക്കുന്നുവെന്ന് സർക്കാർ ഉറപ്പാക്കണം.
പരാതി ലഭിച്ചിട്ടും യഥാസമയം നടപടി സ്വീകരിക്കാതിരുന്ന ഉദ്യോഗസ്ഥരുടെ പങ്കും അന്വേഷണവിധേയമാക്കണം. ദളിത് യുവാവിന് നീതി ഉറപ്പാക്കുന്നതിനൊപ്പം സംഭവത്തിൽ ഉത്തരവാദികളായ മുഴുവൻ ഉദ്യോഗസ്ഥരെയും നിയമത്തിന് മുന്നിൽ കൊണ്ടുവരണം.
പോലീസിന്റെ കസ്റ്റഡിയിലോ ചോദ്യം ചെയ്യലിനിടയിലോ ഒരു പൗരനും ക്രൂരമായ മർദനത്തിന് ഇരയാകുന്ന സാഹചര്യം അനുവദിക്കാനാവില്ല. അധികാരത്തിന്റെ മറവിൽ മനുഷ്യാവകാശ ലംഘനം നടത്തുന്നവരെ സംരക്ഷിക്കുന്ന നിലപാട് സർക്കാർ സ്വീകരിച്ചാൽ അത് ഗുരുതരമായ പ്രത്യാഘാതങ്ങൾക്ക് ഇടയാക്കും. ശാസ്താംകോട്ട സംഭവത്തിൽ നീതി ഉറപ്പാക്കാൻ സർക്കാർ അടിയന്തരമായി ഇടപെടണമെന്നും കൊടിക്കുന്നിൽ സുരേഷ് എംപി ആവശ്യപ്പെട്ടു.
