കൊച്ചി: വറുത്ത മീനിന് ഉപ്പും രുചിയും കുറവാണെന്ന് പറഞ്ഞ് ഹോട്ടലുടമ ഷെഫിനെ കത്തി കൊണ്ട് വെട്ടിപ്പരുക്കേല്പ്പിച്ചു. അങ്കമാലി കറുകുറ്റിയിലെ ‘മീന്വിലാസം’ ഹോട്ടലിലെ ഷെഫും കൊല്ലം സ്വദേശിയുമായ റിയാസിനാണ് വെട്ടേറ്റത്. സംഭവത്തില് ഹോട്ടലിലെ നാല് ഉടമകളില് ഒരാളായ മലപ്പുറം സ്വദേശി മുഹമ്മദ് ഉവൈസിനെതിരെ അങ്കമാലി പൊലീസ് കേസെടുത്തു. അനധികൃതമായി തടഞ്ഞുവെച്ച് മര്ദിക്കുകയും മാരകായുധം ഉപയോഗിച്ച് വെട്ടിപ്പരിക്കേല്പ്പിക്കുകയും ചെയ്തതിനാണ് കേസ്.
ഞായറാഴ്ച രാത്രി പത്തു മണിയോടെയാണ് സംഭവം. ഹോട്ടലിലെത്തിയ ഉടമകളിലൊരാളായ മുഹമ്മദ് ഉവൈസ് കഴിക്കാനായി ഫിഷ് ഫ്രൈ ഓര്ഡര് ചെയ്തിരുന്നു. തുടര്ന്ന് ഷെഫായ റിയാസ് മീന് വറുത്ത് എത്തിച്ചു നല്കി. എന്നാല് ഭക്ഷണം കഴിച്ചുനോക്കിയ ഉടമ മീനിന് രുചിയില്ലെന്നും ആവശ്യത്തിന് ഉപ്പില്ലെന്നും റിയാസിനെ മേശയ്ക്കരുകിലേക്ക് വിളിച്ചുവരുത്തി അറിയിച്ചു. ഹോട്ടലിലെ ഫ്രീസര് കേടായതുകൊണ്ടാണ് മീനിന്റെ ഗുണനിലവാരം കുറഞ്ഞതെന്ന് മറുപടി നല്കി. പലതവണ ആവശ്യപ്പെട്ടിട്ടും ഫ്രീസര് നന്നാക്കാന് ഉടമസ്ഥര് തയാറായില്ലെന്നും റിയാസ് പറഞ്ഞു. ഇതോടെ തര്ക്കം രൂക്ഷമായി. പ്രകോപിതനായ ഉവൈസ് റിയാസിനെ മര്ദിക്കുകയുമായിരുന്നു. ‘റിയാസിന്റെ പിറകെ ചെന്ന് ഷര്ട്ടിന്റെ കുത്തിന് പിടിച്ച് പുറകോട്ടു തള്ളുകയും അടുക്കളയിലെ മേശയിലുണ്ടായിരുന്ന കത്തിയെടുത്ത് വെട്ടിയെന്നും തവിയെടുത്ത് തല്ലിയെന്നുമാണ് എഫ്ഐആറില് ഉള്ളത്.
ആക്രമണത്തില് റിയാസിന്റെ കൈയ്ക്ക് ആഴത്തില് മുറിവേറ്റിട്ടുണ്ട്. ഉടന് തന്നെ ആശുപത്രിയില് പ്രവേശിപ്പിച്ച റിയാസിനെ പ്രാഥമിക ചികിത്സയ്ക്ക് ശേഷം ഡിസ്ചാര്ജ് ചെയ്തു. പരിക്ക് ഗുരുതരമല്ലെന്നാണ് വിവരം. മലപ്പുറം സ്വദേശികളായ നാലുപേരുടെ ഉടമസ്ഥതയിലുള്ളതാണ് ഈ ഹോട്ടല്. സംഭവത്തില് അങ്കമാലി പൊലീസ് കേസെടുത്ത് വിശദമായ അന്വേഷണം ആരംഭിച്ചിട്ടുണ്ട്. ഹോട്ടലിലെ സിസിടിവി ദൃശ്യങ്ങള് ഉള്പ്പെടെ ശേഖരിച്ചാണ് പൊലീസ് അന്വേഷണം പുരോഗമിക്കുന്നത്.
