ന്യൂഡൽഹി: അൾട്രോസ് ഹാച്ച്‌ബാക്കിൽ ഒരു ഓട്ടോമാറ്റിക് ഗിയർബോക്സ് ഓപ്ഷൻ വാഗ്ദാനം ചെയ്യാൻ ഒരുങ്ങുകയാണ് ടാറ്റാ മോട്ടോഴ്‌സ് എന്നാണ് റിപ്പോർട്ടുകൾ.
മാർച്ച്‌ 21ന് വാഹനം ലോഞ്ച് ചെയ്യുമെന്നാണ് ഓട്ടോ കാർ ഇന്ത്യ റിപ്പോർട്ട് ചെയ്യുന്നത്. അൾട്രോസ് ഡിസിടിയുടെ ബുക്കിംഗ് 21,000 രൂപയ്ക്ക് നിലവിൽ നടക്കുന്നുണ്ട്. പുതിയ യൂണിറ്റ് 86 പിഎസ് പവറും 113 എൻഎം ടോർക്കും പുറപ്പെടുവിക്കുന്ന 1.2 എൽ നാച്ചുറലി ആസ്പിറേറ്റഡ് പെട്രോൾ എഞ്ചിനാണ് വാഹനത്തിന്റെ ഹൃദയം. പെട്രോൾ ഓട്ടോമാറ്റിക് കോംബോ എക്‌സ് ടി, എക്‌സ് ഇസെഡ്, എക്‌സ് ഇസെഡ് പ്ലസ് എന്നിങ്ങനെ മൂന്ന് വകഭേദങ്ങളിൽ ലഭിക്കും. കൂടാതെ ഓപ്പറ ബ്ലൂ, ആർക്കേഡ് ഗ്രേ, ഡൗൺടൗൺ റെഡ്, ഹാർബർ ബ്ലൂ, അവന്യൂ വൈറ്റ് എന്നിങ്ങനെ അഞ്ച് നിറങ്ങളിലും ലഭിക്കും.
നിലവിൽ, അൾട്രോസ് ഹാച്ച്‌ബാക്ക് മോഡൽ ലൈനപ്പ് 1.2എൽ ഐ ടർബോ പെട്രോൾ, 1.5എൽ ഡീസൽ എഞ്ചിനുകൾക്കൊപ്പം യഥാക്രമം 110പിഎസ്, 90പിഎസ് എന്നിവ നൽകുന്നു. ഡീസൽ വേരിയന്റുകളിൽ മാനുവൽ ഗിയർബോക്സ് വരുന്നത് തുടരും. വിലയുടെ കാര്യത്തിൽ, ടാറ്റ അൾട്രോസ് ഓട്ടോമാറ്റിക് മോഡലുകൾ അതിന്റെ മാനുവൽ എതിരാളികളേക്കാൾ അൽപ്പം പ്രീമിയം ആയിരിക്കും. 8.07 ലക്ഷം മുതൽ 9.42 ലക്ഷം രൂപ വരെ (എല്ലാം എക്സ്ഷോറൂം) വിലയുള്ള മാനുവൽ പതിപ്പുകളേക്കാൾ ഏകദേശം ഒരു ലക്ഷം രൂപ വില കൂടുതലായിരിക്കുമെന്നാണ് പ്രതീക്ഷിക്കുന്നത്.
