കൊച്ചി. കാര്‍ തടഞ്ഞ യാത്രക്കാരെ ഭീഷണിപ്പെടുത്തിയ സ്വകാര്യ ബസ് ജീവനക്കാരന്‍ വീണ്ടും അറസ്റ്റില്‍. മോഷണക്കേസ് പ്രതിയായ കണ്ണൂര്‍ സ്വദേശി മുഹമ്മദ് അന്‍സാറിനെയാണ് പൊലീസ് കസ്റ്റഡിയിലെടുത്തത്. പൊലീസുകാരെ ആക്രമിച്ചതിലടക്കം പ്രതിക്കെതിരെ ജാമ്യമില്ലാ വകുപ്പ് ചുമത്തി കേസെടുത്തതിന് പിന്നാലെയാണ് അറസ്റ്റ്.
സിനിമ സ്‌റ്റൈലില്‍ കാര്‍ തടഞ്ഞിട്ട് മുന്നില്‍ കയറിയുള്ള നില്‍പ്പ് മുഹമ്മദ് അന്‍സാറിന് പതിവാണ്. നിരത്തിലൂടെ ലക്കും ലഗാനുമില്ലാതെ അമിത വേഗതയില്‍ പായുന്ന ബസിനെതിരെ ആരെങ്കിലും പ്രതികരിച്ചാല്‍ മുഹമ്മദ് അന്‍സാറിന്റെ രീതി ഇതാണ്. സിഗരറ്റും കത്തിച്ച് കാറ് തടഞ്ഞിട്ട് അസഭ്യവര്‍ഷവും ഭീഷണിയും. കുടുംബവുമായി സഞ്ചരിച്ച പ്രവാസിയുടെ കാര്‍ തടഞ്ഞിട്ട് കാട്ടിയ അതിക്രമം കഴിഞ്ഞ ദിവസം ദൃശ്യങ്ങള്‍ സഹിതം പുറത്തുവന്നിരുന്നു. ഓഗസ്റ്റ് ഒന്‍പതിന് നടന്ന അതിക്രമത്തില്‍ ശനിയാഴ്ച നോര്‍ത്ത് പൊലീസ് മുഹ്‌മ്മദ് അന്‍സാറിനെ അറസ്റ്റ് ചെയ്തു. ബസില്‍ നിന്ന് പിടികൂടാനുള്ള ശ്രമത്തിനിടെ എസ്‌ഐയുടെ മുഖത്തിടിച്ച പ്രതി പുറത്തേക്ക് തള്ളിയിടുകയും ചെയ്തു.പണിപ്പെട്ട് പിടികൂടി സ്റ്റേഷനിലെത്തിച്ചെങ്കിലും എസ്എച്ച്ഒ സ്റ്റേഷന്‍ ജാമ്യം നല്‍കി വിട്ടയച്ചു. പൊലീസിന്റെ കൃത്യ നിര്‍വഹണം തടസപ്പെടുത്തിയതിനും മര്‍ദിച്ചതിനും കേസെടുക്കാമെന്നിരിക്കെ പ്രതിയോട് കാട്ടിയത് മൃദുസമീപനം. നോര്‍ത്ത് പൊലീസിനെതിരെ വ്യാപക വിമര്‍ശനം ഉയര്‍ന്നതിന് പിന്നാലെയാണ് മുഹമ്മദ് അന്‍സാറിനെതിരെ കൂടുതല്‍ വകുപ്പുകള്‍ ചുമത്തി കേസെടുത്തത്. ഇതിന് പുറമെ കാര്‍ തടഞ്ഞ് ഭീഷണിപ്പെടുത്തിയതിന് മറ്റൊരു പരാതി കൂടി ലഭിച്ചു.
കഴിഞ്ഞ മാസം 22ന് പടമുഗളിലും സമാനമായി ഇയാള്‍ കാര്‍ തടഞ്ഞ് യാത്രക്കാരെ ഭീഷണിപ്പെടുത്തി. ഇതിന്റെ ദൃശ്യങ്ങള്‍ സഹിതം ലഭിച്ച പരാതിയില്‍ തൃക്കാക്കര പൊലീസാണ് കേസെടുത്തത്. വഴി തടഞ്ഞതിനും അസഭ്യം വിളിച്ചതിനുമാണ് കേസ്. മുഹ്‌മ്മദ് അന്‍സാര്‍ ചില്ലറക്കാരനല്ലെന്ന് കൊച്ചി സിറ്റി പൊലീസിന്റെ അന്വേഷണത്തില്‍ വ്യക്തമായി. 2024ല്‍ ചേവായൂര്‍ പൊലീസ് സ്റ്റേഷന്‍ പരിധിയില്‍ നിന്ന് സ്‌കൂട്ടര്‍ മോഷ്ടിച്ച കേസില്‍ മുഹമ്മദ് അന്‍സാര്‍ പ്രതിയാണ്. ഇതേ കണ്ണൂര്‍ റെയില്‍വെ സ്‌റ്റേഷനില്‍ പ്രാര്‍ഥിക്കാന്‍ കയറിയ യാത്രക്കാരന്റെ ബാഗ മോഷ്ടിച്ചതിനും ഇയാള്‍ പിടിയിലായി. 2023ല്‍ ട്രെയിനിനുള്ളില്‍വെച്ച് യാത്രക്കാരന്റ മൊബൈല്‍ ഫോണ്‍ കവര്‍ന്ന കേസിലും മുഹമ്മദ് അന്‍സാര്‍ പ്രതിയാണ്. ഇത്തരത്തില്‍ ക്രിമിനല്‍ പശ്ചാത്തലമുള്ളവരാണ് കൊച്ചിയിലെ സ്വകാര്യ ബസ് ജീവനക്കാരിലേറെയും. സ്വകാര്യ ബസ് ജീവനക്കാരുടെ അതിക്രമവും ഗുണ്ടായിസവും പതിവായിട്ടും പൊലീസിന്റെ അയഞ്ഞ സമീപനത്തില്‍ വ്യാപക അമര്‍ഷമുണ്ട്.
