ആലപ്പുഴ: വിഷുദിന ആശംസ പങ്കുവച്ച മന്തിക്കടയുടെ പോസ്റ്ററുമായി ബന്ധപ്പെട്ട വിവാദത്തില് ചേര്ത്തലയില് ഹോട്ടല് ഉടമ അറസ്റ്റില്. ചേര്ത്തലയിലെ മെഹര് മന്തിക്കട ഉടമകളിലൊരാളായ ഹര്ഷാദിനെയാണ് പൊലീസ് അറസ്റ്റ് ചെയ്തത്. ഇയാളെ പിന്നീട് ജാമ്യത്തില് വിട്ടയച്ചു.
ശ്രീകൃഷ്ണന്റെ ചിത്രത്തിന് മുന്നില് കുഴിമന്തി വെച്ചാണ് പോസ്റ്റര് തയ്യാറാക്കിയത്. സംഭവത്തില് മതവികാരം വ്രണപ്പെടുത്തിയെന്ന വകുപ്പില് പൊലീസ് കേസെടുത്തിരുന്നു. ആലപ്പുഴയിലെ അഭിഭാഷകന്റെ പരാതിയിലാണ് കേസെടുത്തത്. കലാപം ഉണ്ടാക്കുക എന്ന ഉദ്ദേശ്യത്തോടെ മനഃപൂര്വമോ ദുരുദ്ദേശ്യപരമോ ആയ പ്രകോപനത്തിനാണ് കേസ് രജിസ്റ്റര് ചെയ്തിരിക്കുന്നത്.
അതേസമയം, പോസ്റ്റര് വിവാദത്തില് ഖേദം പ്രകടിപ്പിച്ച് ഉടമ രംഗത്തെത്തിയിരുന്നു. പുറത്തുനിന്നുള്ള ആളെ കൊണ്ടാണ് ചെയ്യിച്ചിരുന്നതും തന്റെ അറിവോടെയല്ലെന്നുമാണ് ഉടമയുടെ വിശദീകരണം. വിവാദമായ പോസ്റ്റര് സോഷ്യല് മീഡിയയില് പ്രചരിപ്പിച്ചിട്ടില്ലെന്നും പകരം മറ്റൊരു പോസ്റ്റര് തയ്യാറാക്കിയിരുന്നതായും ഉടമ വിഡിയോയില് പറയുന്നു. വിവാദത്തിന് പിന്നാലെ ഹോട്ടലിന് പൊലീസ് സംരക്ഷണം ഒരുക്കിയിട്ടുണ്ട്.
സ്ഥലത്ത് സംഘപരിവാര് സംഘടനകള്പ്രതിക്ഷേധയോഗം നടത്തുന്നുണ്ട്. സംഭവം വിവാദമായിട്ടും ഹിന്ദുധര്മ്മം മുറിവേറ്റ സംഭവത്തില് സാധാരണ ഇത്തരം സംഭവങ്ങളില് ഇടപെട്ടുപ്രതിഷേധിക്കുന്ന സംഘടനകളും വ്യക്തികളും പ്രതിഷേധിച്ചില്ലെന്നത് ആയുധമാക്കുകയാണ് സംഘപരിവാര്. കൃത്യമായ ഇരട്ടത്താപ്പാണിതെന്നും ഇതിനെതിരെയാണ് പ്രതിഷേധിക്കേണ്ടതെന്നും സംഘ പരിവാര് സോഷ്യല് മീഡിയ ഹാന്ഡിലുകള് ചൂണ്ടിക്കാട്ടുന്നു.
