ന്യൂഡൽഹി: കുടുംബ ബജറ്റിന് കൂടുതൽ ഭാരമായി സവാള വില കുതിക്കുന്നു. ഡൽഹിയിൽ ചില്ലറ വില കിലോയ്ക്ക് 62 രൂപ വരെയെത്തി. കരിഞ്ചന്ത, പൂഴ്ത്തിവെപ്പ്, അമിത ലാഭമെടുക്കൽ എന്നിവയാണ് വിലക്കയറ്റത്തിന് കാരണമെന്നാണ് കേന്ദ്രസർക്കാരിന്റെ ആരോപണം. വില പിടിച്ചുനിർത്താൻ സർക്കാർ ഇടപെടൽ ശക്തമാക്കി.
സർക്കാർ നിശ്ചയിച്ച കേന്ദ്രങ്ങളിലും മൊബൈൽ വാനുകളിലൂടെയും കിലോയ്ക്ക് 35 രൂപ നിരക്കിൽ സവാള വിൽക്കുമെന്ന് ഉപഭോക്തൃകാര്യ, ഭക്ഷ്യ-പൊതുവിതരണ മന്ത്രാലയം അറിയിച്ചു. ഡൽഹിയുൾപ്പെടെയുള്ള പ്രധാന നഗരങ്ങളിൽ നാഫെഡ്, എൻസിസിഎഫ് റീട്ടെയിൽ ഔട്ട്ലെറ്റുകൾ, കേന്ദ്രീയ ഭണ്ഡാർ എന്നിവ വഴിയാണ് സബ്സിഡി നിരക്കിൽ സവാള ലഭ്യമാക്കുക.
സവാള വില ഉയരുന്നതിന് ഇടനിലക്കാരാണ് പ്രധാനമായും ഉത്തരവാദികളെന്ന് കേന്ദ്ര കൃഷിമന്ത്രി ശിവരാജ് സിങ് ചൗഹാൻ പറഞ്ഞു. കർഷകർക്ക് ന്യായമായ വില ലഭിക്കുന്നതിനൊപ്പം ഉപഭോക്താക്കൾക്ക് താങ്ങാവുന്ന നിരക്കിൽ സവാള ലഭ്യമാക്കുകയാണ് സർക്കാരിന്റെ ലക്ഷ്യമെന്നും അദ്ദേഹം വ്യക്തമാക്കി. ഉത്സവ സീസണിലെ ആവശ്യകത നിറവേറ്റാൻ രാജ്യത്ത് ആവശ്യത്തിന് സവാള ലഭ്യമാണെന്നും കയറ്റുമതി നിരോധനം പരിഗണിക്കുന്നില്ലെന്നും മന്ത്രി പറഞ്ഞു.
വിപണിയിലെ ലഭ്യത വർധിപ്പിക്കുന്നതിനായി ബഫർ സ്റ്റോക്കിലുള്ള സവാള ഘട്ടംഘട്ടമായി വിപണിയിലെത്തിക്കുകയാണ് സർക്കാർ. റെയിൽ, റോഡ് മാർഗങ്ങളിലൂടെ പ്രധാന ഉപഭോഗ കേന്ദ്രങ്ങളിലേക്ക് സവാള എത്തിക്കും. വില നിയന്ത്രണത്തിന്റെ ഭാഗമായി ഏകദേശം 800 ടൺ സവാള സർക്കാർ ഔട്ട്ലെറ്റുകളിലൂടെ കിലോയ്ക്ക് 35 രൂപ നിരക്കിൽ വിൽക്കും.
അതേസമയം, കർഷകർക്ക് ലഭിക്കുന്ന വിലയും ചില്ലറ വിപണിയിലെ വിലയും തമ്മിൽ വലിയ അന്തരമുണ്ടെന്ന് കർഷക സംഘടനകൾ ആരോപിച്ചു. സവാള വില കുത്തനെ ഇടിഞ്ഞപ്പോൾ മഹാരാഷ്ട്രയിലെ കർഷകരിൽനിന്ന് സർക്കാർ നേരത്തെ സംഭരിച്ചിരുന്നുവെന്നും ചൗഹാൻ പറഞ്ഞു. കർഷകർ തങ്ങളുടെ സ്റ്റോക്കിന്റെ ഭൂരിഭാഗവും വിറ്റഴിച്ചതോടെയാണ് ചില്ലറ വില 60 രൂപയിലേക്കും അതിനു മുകളിലേക്കും ഉയർന്നതെന്നും അദ്ദേഹം വ്യക്തമാക്കി. അന്തിമ വിലയിൽ കർഷകർക്ക് ന്യായമായ വിഹിതം ലഭിക്കുന്നുണ്ടോയെന്ന് പരിശോധിക്കുമെന്നും മന്ത്രി അറിയിച്ചു.
പല വിപണികളിലും സവാളയുടെ ചില്ലറ വില നേരത്തെ കിലോയ്ക്ക് 35 രൂപയോളമായിരുന്നത് ഇപ്പോൾ 60–65 രൂപ വരെയായി ഉയർന്നിട്ടുണ്ട്. വിലക്കയറ്റം നിയന്ത്രിക്കാൻ സർക്കാർ വിപണിയിലെ ഇടപെടൽ കൂടുതൽ ശക്തമാക്കാനാണ് തീരുമാനം.