കൊച്ചി.ഫോര്‍ട്ട് കൊച്ചിയില്‍ വിനോദസഞ്ചാരിയെ കൊള്ളയടിച്ച അക്രമി സംഘത്തിലെ മൂന്നുപേര്‍ പിടിയില്‍. കവര്‍ച്ചയ്ക്ക ശേഷം രക്ഷപ്പെട്ട പ്രതികള്‍ സിസിടിവി ദൃശ്യങ്ങള്‍ ശേഖരിച്ച നടത്തിയ അന്വേഷണത്തിലാണ് പിടിയിലായത്. അക്രമി സംഘത്തിലെ നാലാമനായി അന്വേഷണം ഊര്‍ജിതം.
ഫോര്‍ട്ട് കൊച്ചി സൗത്ത് ബീച്ചിന് സമീപം തിങ്കളാഴ്ചയാണ് ഒഡീഷ സ്വദേശി ധാരാ സിങ് പ്രധാനെ നാലംഗസംഘം കൊള്ളയടിച്ചത്. വൈകീട്ട് നാലരയ്ക്ക് പഴയ ലൈറ്റ് ഹൗസിന് സമീപത്തെ ശുചിമുറിയില്‍ വെച്ചാണ് ധാരാ സിങ് ആക്രമിക്കപ്പെട്ടത്. കേസില്‍ കൊച്ചി സ്വദേശികളായ സഹല്‍, ആദര്‍ശ്, ഷൈജു എന്നിവരാണ് പിടിയിലായത്.
ശുചിമുറിയിലെത്തിയ ധാരാ സിങിനെ സ്ഥലത്ത് തമ്പടിച്ച് നിന്ന നാലംഗ സംഘം വളഞ്ഞു. രണ്ട് പ്രതികള്‍ ചേര്‍ന്ന് ധാരാസിങ്ങിനെ ബലമായി പിടിച്ചു നിര്‍ത്തി. മൂന്നാമന്‍ ഇടത് കണ്ണില്‍ മുഷ്ടി ചുരുട്ടി ഇടിച്ചു. ഇതോടെ നിലത്തുവീണ ധാരാസിങ്ങിനെ പിന്നീട് മരത്തടികൊണ്ടാണ് പ്രതികള്‍ ആക്രമിച്ചത്. തലയ്ക്ക് പുറകിലേറ്റ അടിക്ക് പിന്നാലെ ധാരാസിങ് അബോധാവസ്ഥയിലായി. ഇതോടെ പോക്കറ്റിലുണ്ടായിരുന്ന പതിനെണ്ണായിരം രൂപയുടെ ഫോണും പണവുമായി അക്രമി സംഘം രക്ഷപ്പെട്ടു.
ശുചിമുറി പരിസരതെത്തിയവരാണ് ധാരാസിങിനെ കണ്ടെത്തുന്നതും ആശുപത്രിയിലേക്ക് മാറ്റുന്നതും. കണ്ണിലും തലയ്ക്കും ഗുരുതരമായി പരുക്കേറ്റ ധാരാസിങ് ആശുപത്രിയില്‍ നിന്നിറങ്ങി രണ്ട്ാം ദിവസമാണ് പൊലീസില്‍ പരാതി നല്‍കിയത്. തൊട്ടുപിന്നാലെ വിവിധ സ്ഥലങ്ങളില്‍ നിന്ന് സിസിടിവി ദൃശ്യങ്ങള്‍ ശേഖരിച്ച പൊലീസ് പ്രതികളെ തിരിച്ചറിഞ്ഞു. ധാരാസിങ്ങിനെ ആക്രമിച്ചതിന് ശേഷം പ്രതികള്‍ ഓടിപോകുന്നതും ഓട്ടോയില്‍ കയറി രക്ഷപ്പെടുന്നതിന്റെ ദൃശ്യങ്ങളടക്കം പൊലീസിന് ലഭിച്ചു. ഫോര്‍ട്ട്‌കൊച്ചിയിലും പരിസരത്തും ഒളിവിലായിരുന്ന പ്രതികളെ പിടികൂടി. നാലാമന്‍ ഇപ്പോളും ഒളിവിലാണ്. പിടിയിലായവര്‍ സ്ഥിരം പ്രശ്‌നക്കാരാണെന്നാണ് പൊലീസ് നല്‍കുന്ന വിവരം. ഇവര്‍ക്കെതിരെ വേറെയും കേസുകള്‍ നിലവിലുണ്ട്.
