പൂണെ: പ്രണയബന്ധം ഒഴിവാക്കാന്‍ ശ്രമിച്ചതിനെ തുടര്‍ന്ന് ഐ.ടി ജീവനക്കാരിയെ സുഹൃത്ത് വെടിവെച്ച് കൊലപ്പെടുത്തി.
ഹിഞ്ചാവാഡിയിലെ വന്ദന ദ്വിവേദി (26) യാണ് കൊല്ലപ്പെട്ടത്. സോഫ്‌റ്റ്വെയര്‍ എഞ്ചിനീയറായ വന്ദനയെ ഹിഞ്ചെവാഡിയിലെ ലക്ഷ്മി ചൗക്കിന് സമീപമുള്ള ഹോട്ടലിലാണ് വെടിയേറ്റ് മരിച്ച നിലയില്‍ കണ്ടെത്തിയത്. ശനിയാഴ്ച രാത്രി 9.30യോടെയാണ് സംഭവം. വന്ദനയുടെ സുഹൃത്തായ ഋഷഭ് നിഗമിനെ പിസ്റ്റള്‍ സഹിതം മുംബൈയില്‍ നിന്ന് അറസ്റ്റ് ചെയ്തു.
ഉത്തര്‍പ്രദേശ് സ്വദേശികളായ ഇരുവരും 2013 മുതല്‍ പ്രണയബന്ധത്തിലായിരുന്നുവെന്നും അടുത്തിടെ ഋഷഭിനെ ഒഴിവാക്കാന്‍ വന്ദന ശ്രമിച്ചിരുന്നതായും അന്വേഷണത്തില്‍ വ്യക്തമായി.
ജനുവരി 25നാണ് ഋഷഭ് ഉത്തര്‍പ്രദേശില്‍നിന്ന് ഹിഞ്ചാവാഡിലെ ലോഡ്ജില്‍ മുറിയെടുത്തത്. അടുത്ത ദിവസം വന്ദനയും ഇവിടെയെത്തി. സി.സി.ടി.വി ദൃശ്യങ്ങളുടെ അടിസ്ഥാനത്തില്‍ നടത്തിയ തിരച്ചിലിലാണ് മുംബൈയില്‍നിന്ന് ഇയാളെ അറസ്റ്റ് ചെയ്തത്. ഇയാള്‍ക്കെതിരെ കൊലക്കുറ്റത്തിന് കേസെടുത്തിട്ടുണ്ട്. ബന്ധം ഒഴിവാക്കാന്‍ ശ്രമിച്ചതാണ് മരണകാരണം എന്നാണ് പ്രാഥമിക നിഗമനം. സംഭവത്തില്‍ അന്വേഷണം പുരോഗമിക്കുകയാണ്.
