തൃശ്ശൂരിൽ വോട്ടിന് കിറ്റ് വിതരണം നടത്തിയ സംഭവത്തിൽ
തൃശ്ശൂർ വെസ്റ്റ് പോലീസ് കേസെടുത്തു.
തെരഞ്ഞെടുപ്പ് കമ്മീഷന്റെ പരാതിയിലാണ് കേസ്
ഇന്നലെ ആണ് തൃശ്ശൂർ മണ്ഡലത്തിലെ ഒളരിയിലെ സൂപ്പർ മാർക്കറ്റിൽ കിറ്റ് വിതരണം ചെയ്തത് .
ബിജെപി നേതാക്കളുടെ നിർദ്ദേശപ്രകാരം വോട്ടിന് വേണ്ടി കിറ്റ് വിതരണം ചെയ്തതാണെന്നാണ് എൽഡിഎഫിന്റെ പരാതി.
തമിഴ്നാട് നിയമസഭാ തിരഞ്ഞെടുപ്പിലേക്ക് മല്‍സരിക്കുന്ന തമിഴക വെട്രി കഴകം (ടിവികെ) അധ്യക്ഷൻ വിജയ് നാമനിർദേശ പത്രികയ്ക്കൊപ്പം സമർപ്പിച്ച സത്യവാങ്മൂലത്തിൽ ഗുരുതര പിഴവ്. പെരുമ്പൂര്‍, തിരുച്ചിറപ്പളളി ഈസ്റ്റ് എന്നീ രണ്ട് മണ്ഡലങ്ങളിലാണ് വിജയ് മല്‍സരിക്കുന്നത്. പെരമ്പൂരില്‍ സമര്‍പ്പിച്ച സത്യവാങ്മൂലത്തില്‍ നല്‍കിയ വിവരങ്ങളില്‍ നിന്ന് വ്യത്യസ്തമായിരുന്നു തിരുച്ചിറപ്പളളി ഈസ്റ്റില്‍ സമര്‍പ്പിച്ച സത്യവാങ്മൂലത്തില്‍ താരം രേഖപ്പെടുത്തിയിരുന്നത്. തെറ്റ് തിരിച്ചറിഞ്ഞതോടെ വിജയ് പുതിയ സത്യവാങ്മൂലം സമര്‍പ്പിച്ചു.
ഗുരുതര പിഴവാണ് സംഭവിച്ചതെങ്കിലും പത്രികസമർപ്പണം നാളെ പൂർത്തിയാകാനിരിക്കെ, കഷ്ടിച്ചാണ് താരം പിഴവില്‍നിന്ന് തലയൂരിയത്. പ്രായം, ക്രിമിനല്‍ കേസുകളുടെ എണ്ണം, സ്വത്ത് വിവരങ്ങള്‍ എന്നിവയിലായിരുന്നു അപാകതകള്‍ ഉണ്ടായിരുന്നത്. പെരമ്പൂരില്‍ പത്രികയ്ക്കൊപ്പം സമര്‍പ്പിച്ച സത്യവാങ്മൂലത്തില്‍ പ്രായം 52 എന്നായിരുന്നു വിജയ് രേഖപ്പെടുത്തിയിരുന്നത്. കഴിഞ്ഞ തിങ്കളാഴ്ചയാണ് പെരമ്പൂർ വിജയ് പത്രിക സമര്‍പ്പിച്ചത്. ഈ സത്യവാങ്മൂലത്തില്‍ തനിക്കെതിരെ ക്രിമിനല്‍ കേസുകള്‍ ഇല്ലെന്നും താരം അവകാശപ്പെട്ടിരുന്നു.
എന്നാൽ, 3 ദിവസത്തിന് ശേഷം തിരുച്ചിറപ്പള്ളി ഈസ്റ്റിൽ സമർപ്പിച്ച പത്രികയിൽ 2 കേസുകളുണ്ടെന്നു രേഖപ്പെടുത്തി. തിരുച്ചിറപ്പളളിയില്‍ സമര്‍പ്പിച്ച സത്യവാങ്മൂലത്തില്‍ പ്രായം 51 എന്നാണ് രേഖപ്പെടുത്തിയിരുന്നത്. ഈ അപാകതകള്‍ക്ക് പുറമെ സ്വത്ത് വിവരങ്ങളിലും തെറ്റ് സംഭവിച്ചു. 115.13 കോടി രൂപയുടെ സ്ഥാവര സ്വത്തുക്കളാണ് സത്യവാങ്മൂലത്തില്‍ രേഖപ്പെടുത്തിയിരുന്നതെങ്കിലും പിന്നീട് ഇത് തിരുത്തി 220.15 കോടി എന്നാക്കുകയായിരുന്നു.
ശാസ്താംകോട്ട:
മുതുപിലാക്കാട്
രഞ്ജിത്ത് ഭവനിൽ
വേണുഗോപാലപിള്ള
(69) നിര്യാതനായി. സംസ്ക്കാരം ഇന്ന്
രാത്രി 8 ന്.
ഭാര്യ:ലതിക കുമാരിയമ്മ
മകൻ:രഞ്ജിത്ത് കുമാർ(റിട്ട. ആർമി )
മരുമകൾ:ശ്രീപ്രിയ(വി ആർ എം എൽ പി എസ് പള്ളിശ്ശേരിക്കൽ).
തിരുവനന്തപുരം: നിയമസഭാ തെരഞ്ഞെടുപ്പ് പ്രചാരണത്തിന് എന്‍ഡിഎ ക്യാമ്പില്‍ ആവേശമാകാന്‍ ഇന്ന് കൂടുതല്‍ ദേശീയ നേതാക്കള്‍ കേരളത്തിലേക്ക്. കേന്ദ്ര ആഭ്യന്തര മന്ത്രി അമിത് ഷാ, ധനമന്ത്രി നിര്‍മ്മല സീതാരാമന്‍ എന്നിവര്‍ പ്രചാരണം നടത്തും. കോഴിക്കോട്, എറണാകുളം, തിരുവനന്തപുരം ജില്ലകളിലാണ് അമിത് ഷായുടെ പ്രചാരണ പരിപാടികള്‍ നടക്കുക. തിരുവനന്തപുരത്ത് പ്രവാസികളുമായി അമിത്ഷാ കൂടിക്കാഴ്ച നടത്തും. തൃശ്ശൂരും പാലക്കാടുമാണ് മന്ത്രി നിര്‍മ്മല സീതാരാമന്‍ എത്തുക.
പ്രധാനമന്ത്രി നരേന്ദ്രമോദി കഴിഞ്ഞ ദിവസം കേരളത്തിലുണ്ടായിരുന്നു. കേരളത്തില്‍ കോണ്‍ഗ്രസ്സും ഇടതുപക്ഷവും അഴിമതിയും വര്‍ഗീയതയും പരത്തുന്നു എന്ന് നരേന്ദ്ര മോദി കടന്നാക്രമിച്ചു. അയ്യപ്പന്റെ സ്വര്‍ണം മോഷ്ടിച്ചു. തീവ്രവാദ ശക്തികള്‍ക്ക് ഒപ്പം വോട്ടിന് വേണ്ടി നില്‍ക്കുകയാണ് കോണ്‍ഗ്രസ്. കേരളത്തില്‍ ബിജെപി തരംഗം ഉണ്ടെന്നും സഞ്ജു സാംസണെ പോലെ മികച്ച പ്രകടനം കാഴ്ചവെക്കണം എന്നും പ്രവര്‍ത്തകരോട് മോദി പറഞ്ഞു.
തിരുവനന്തപുരം: വര്‍ക്കലയില്‍ വിദ്യാര്‍ഥിനി കടലില്‍ തിരയില്‍പ്പെട്ട് മരിച്ചു. അവധിയാഘോഷിക്കാന്‍ വര്‍ക്കലയിലെത്തിയ ഒഡിഷ സ്വദേശിനി പ്രിയങ്ക സാഹോ (19) ആണ് മരിച്ചത്.
ശനിയാഴ്ച വൈകീട്ട് സുഹൃത്തുക്കള്‍ക്കൊപ്പം ബീച്ചില്‍ കുളിക്കാനിറങ്ങിയപ്പോഴായിരുന്നു അപകടം. ബംഗളൂരുവില്‍ പൈലറ്റ് കോഴ്സ് വിദ്യാര്‍ഥിനിയായ പ്രിയങ്കയും സുഹൃത്തുക്കളും വെള്ളിയാഴ്ചയാണ് വര്‍ക്കലയിലെത്തിയത്. ശനിയാഴ്ച കടലില്‍ കുളിക്കുന്നതിനിടെ പ്രിയങ്കയും സുഹൃത്തുക്കളും തിരയില്‍പ്പെടുകയായിരുന്നു.
നാട്ടുകാരും മത്സ്യത്തൊഴിലാളികളും ചേര്‍ന്ന് മൂവരെയും കരയ്ക്കെത്തിച്ച് ആശുപത്രിയില്‍ എത്തിച്ചെങ്കിലും പ്രിയങ്കയുടെ ജീവന്‍ രക്ഷിക്കാന്‍ സാധിച്ചില്ല. കൂടെയുണ്ടായിരുന്ന മറ്റ് രണ്ട് യുവതികള്‍ രക്ഷപ്പെട്ടു. ഒഡിഷ ഖോര്‍ഡ സ്വദേശി ബിജയകുമാറിന്റെയും മംമ്തയുടെയും മകളാണ് പ്രിയങ്ക.
കൊച്ചി നേവൽ ബേസിലെ നേവൽ കിന്റർഗാർട്ടൻ സ്കൂളിൽ കരാർ ഒഴിവുകൾ. ഇന്ന് കൂടി ഓൺലൈനായി അപേക്ഷിക്കാം.
തസ്തിക, യോഗ്യത, ശമ്പളം:
∙ഹെഡ്മിസ്ട്രസ്: ബിരുദം/എൻടിടി ട്രെയിനിങ് സർട്ടിഫിക്കറ്റ്, ബിഎഡ്; 40,200.
∙സ്പെഷ്യൽ എജ്യുക്കേറ്റർ: സ്പെഷ്യൽ എജ്യുക്കേഷൻ ബിരുദം, ബിഎഡ് അല്ലെങ്കിൽ ബിഎഡ്, 2 വർഷ ഡിപ്ലോമ അല്ലെങ്കിൽ സ്പെഷ്യൽ എജ്യുക്കേഷനിൽ പിജി; 28,450.
ബയോഡേറ്റ navalkgk@gmail.com എന്ന ഇ–മെയിലിൽ അയയ്ക്കണം. 0484-2667050.
കോഴിക്കോട്: കോഴിക്കോട് കുന്നമംഗലത്തെ പടക്ക നിർമ്മാണ കേന്ദ്രത്തിൽ ഉണ്ടായ പൊട്ടിത്തെറിയിൽ രണ്ടുപേർ മരിച്ചു. വീട്ടുടമസ്ഥനും ബന്ധുവുമാണ് മരിച്ചത്. കുന്നമംഗലം കുരുക്കത്തൂരിലാണ് സംഭവം.
വിഷു ആഘോഷത്തിന്റെ ഭാഗമായി വീട് വാടകക്കെടുത്ത് പടക്ക നിർമ്മാണത്തിൽ ഏർപ്പെടുന്നതിനിടെയാണ് അപകടം ഉണ്ടായതെന്നാണ് വിവരം. നാലു പേർക്ക് പരിക്കേറ്റതായും റിപ്പോർട്ടുണ്ട്.
പരിക്കേറ്റ മൂന്നു പേരുടെ നില ഗുരുതരമാണെന്നാണ് സൂചന. ഇവര്‍ കോഴിക്കോട് മെഡിക്കല്‍ കോളജ് ആശുപത്രിയില്‍ ചികിത്സയിലാണ്. മരിച്ച രണ്ട് പേരുടേയും പേര് രാഹുല്‍ എന്നാണെന്നാണ് പ്രാഥമിക വിവരം.
സ്ഫോടനത്തില്‍ സമീപത്തെ അഞ്ചു വീടുകള്‍ക്ക് കേടുപാടുകള്‍ സംഭവിച്ചു. അനധികൃത പടക്ക നിർമ്മാണ കേന്ദ്രമാണ് എന്നാണ് സൂചന. കുന്നമംഗലെ പൊലീസ് കേസെടുത്ത് അന്വേഷണം ആരംഭിച്ചു.
ശരീരം ആരോഗ്യത്തോടെ സൂക്ഷിക്കുന്നതിന് പ്രതിരോധ ശേഷി കൂട്ടേണ്ടത് വളരെ പ്രധാനമാണ്. മലിനീകരണം, സമ്മർദ്ദം, മോശം ഭക്ഷണക്രമം, കാലാവസ്ഥയിലെ പതിവ് മാറ്റങ്ങൾ എന്നിവയെല്ലാം ശരീരത്തിന്റെ സ്വാഭാവിക പ്രതിരോധ സംവിധാനത്തെ തകരാറിലാക്കുകയും വൈറൽ അണുബാധകൾക്ക് കൂടുതൽ സാധ്യതയുള്ളതാക്കുകയും ചെയ്യും.
പ്രതിരോധശേഷി കൂട്ടുന്നത് സീസണൽ രോഗങ്ങളിൽ നിന്ന് ശരീരത്തെ സംരക്ഷിക്കുന്നു
പ്രതിരോധശേഷി കൂട്ടുന്നത് സീസണൽ രോഗങ്ങളിൽ നിന്ന് ശരീരത്തെ സംരക്ഷിക്കുന്നു. നിങ്ങളുടെ പതിവ് ഭക്ഷണക്രമത്തിൽ ചില ശക്തമായ ഔഷധസസ്യങ്ങൾ ചേർക്കുന്നതിലൂടെ രോഗപ്രതിരോധ ശേഷി വർദ്ധിപ്പിക്കാൻ കഴിയു..
രോഗപ്രതിരോധ ശേഷി വർദ്ധിപ്പിക്കുന്നതിനും വൈറൽ അണുബാധകൾ ഉണ്ടാകാനുള്ള സാധ്യത കുറയ്ക്കാനും സഹായിക്കും.
ചിറ്റമൃതാണ് ആദ്യത്തെ ഔഷധം എന്ന് പറയുന്നത്. ഡെങ്കിപ്പനി, സ്വൈൻ ഫ്ലൂ, മലേറിയ എന്നിവയുടെ ലക്ഷണങ്ങളെ കുറയ്ക്കാൻ ആന്റി പൈറൈറ്റിക് ആയ ചിറ്റമൃതിനു കഴിയും. രോഗപ്രതിരോധ ശേഷി വർദ്ധിപ്പിക്കുന്നതിനും വൈറൽ അണുബാധകൾ ഉണ്ടാകാനുള്ള സാധ്യത കുറയ്ക്കാനും സഹായിക്കും.
രോഗപ്രതിരോധ സംവിധാനത്തെ വർദ്ധിപ്പിക്കാൻ സഹായിക്കുന്ന സസ്യമാണ് അശ്വഗന്ധ
രോഗപ്രതിരോധ സംവിധാനത്തെ വർദ്ധിപ്പിക്കാൻ സഹായിക്കുന്ന സസ്യമാണ് അശ്വഗന്ധ. രോഗപ്രതിരോധ സംവിധാനത്തെ ദുർബലപ്പെടുത്തുന്ന പ്രധാന കാര്യങ്ങളിലൊന്ന് ദീർഘകാല സമ്മർദ്ദമാണ്. അശ്വഗന്ധ നിങ്ങളെ മൊത്തത്തിൽ സുഖപ്പെടുത്താനും സമ്മർദ്ദ നില കുറയ്ക്കാനും കൂടുതൽ ഊർജ്ജം നൽകാനും സഹായിക്കും. ഇത് ശരീരത്തിന്റെ സ്വാഭാവിക പ്രതിരോധശേഷി വർദ്ധിപ്പിക്കുകയും ആളുകളെ രോഗങ്ങളിൽ നിന്ന് സംരക്ഷിക്കുകയും ചെയ്യുന്നു.
ആയുർവേദത്തിൽ ഏറ്റവും മികച്ച സസ്യങ്ങളിൽ ഒന്നാണ് തുളസി
തുളസിയാണ് മറ്റൊരു സസ്യം. ആയുർവേദത്തിൽ ഏറ്റവും മികച്ച സസ്യങ്ങളിൽ ഒന്നാണ് തുളസി. ഇൻഫ്ലുവൻസ, വൈറസ്, വീക്കം (മറ്റ് കാര്യങ്ങൾക്കൊപ്പം) എന്നിവയ്ക്കെതിരെ പോരാടുന്നതിന് മികച്ച ഗുണങ്ങളുണ്ട്. കൂടാതെ, ശരീരത്തിലെ അണുബാധകൾക്കെതിരെ പോരാടുന്നതിനും ഇത് ഗുണം ചെയ്യും. ശ്വാസകോശത്തിന്റെ പ്രവർത്തനം ആരോഗ്യകരമായി നിലനിർത്താനും തുളസി സഹായിക്കും. തുളസി ചായ പതിവായി കുടിക്കുന്നത് വൈറൽ അണുബാധയ്ക്കുള്ള സാധ്യത കുറയ്ക്കും.
ചൂടുള്ള പാലിലോ ഭക്ഷണത്തിലോ മഞ്ഞൾ കഴിക്കുന്നത് രോഗപ്രതിരോധ സംവിധാനത്തെ മെച്ചപ്പെടുത്തുന്നു
വീടുകളിൽ സാധാരണയായി ഉപയോഗിക്കുന്ന ആയുർവേദ സസ്യമാണ് മഞ്ഞൾ. മഞ്ഞളിലെ പ്രധാന ഘടകമായ കുർക്കുമിൻ ശരീരത്തെ ദോഷകരമായ അണുക്കളെ ചെറുക്കാൻ സഹായിക്കുകയും വീക്കം കുറയ്ക്കുകയും ചെയ്യുന്നു. ചൂടുള്ള പാലിലോ ഭക്ഷണത്തിലോ മഞ്ഞൾ കഴിക്കുന്നത് രോഗപ്രതിരോധ സംവിധാനത്തെ മെച്ചപ്പെടുത്തുന്നു.
ആന്റിഓക്‌സിഡന്റുകളും വിറ്റാമിൻ സിയും നെല്ലിക്കയിൽ അടങ്ങിയിട്ടുണ്ട്
നെല്ലിക്കയാണ് മറ്റൊരു ഔഷധം. ആന്റിഓക്‌സിഡന്റുകളും വിറ്റാമിൻ സിയും നെല്ലിക്കയിൽ അടങ്ങിയിട്ടുണ്ട്. ഇത് രോഗപ്രതിരോധ ശേഷിയെ ശക്തിപ്പെടുത്തുകയും ശരീരത്തെ രോഗങ്ങളെ ചെറുക്കാൻ സഹായിക്കുകയും ചെയ്യുന്നു. ദഹനത്തിനും പോഷകങ്ങൾ ശരീരത്തിലേക്ക് എത്തിക്കുന്നതിനും നെല്ലിക്ക സഹായിക്കുന്നു. നെല്ലിക്ക ജ്യൂസായോ, പൊടിയായോ എല്ലാം കഴിക്കാവുന്നതാണ്.
തിരുവനന്തപുരം: സ്നേഹത്തിൻ്റെയും പ്രത്യാശയുടെയും സന്ദേശം ഓർമ്മിപ്പിച്ച് ലോകമെങ്ങും ഈസ്റ്റർ ദിനമെത്തി. രാത്രി പള്ളികളിൽ പ്രത്യേക പ്രാർത്ഥനകൾ നടന്നു. തിരുവനന്തപുരം പാളയം സെന്റ് ജോസഫ് കത്തീഡ്രലിൽ ഈസ്റ്റർ കുർബാനയ്ക്ക് തിരുവനന്തപുരം ലത്തീൻ അതിരൂപത ആർച്ച് ബിഷപ്പ് തോമസ് ജെ.നെറ്റോ മുഖ്യകാർമികത്വം വഹിച്ചു. ലോകം ഭയപ്പാടിലെന്നും യുദ്ധം എല്ലാവരെയും വേദനിപ്പിക്കുന്നുവെന്നും അദ്ദേഹം പറഞ്ഞു. ലോകത്ത് ഭയം മാറാനും യുദ്ധം അവസാനിക്കാനും ഈ ഉയർപ്പ് ദിനം പ്രാർത്ഥിക്കാമെന്ന് അദ്ദേഹം ഓർമ്മിപ്പിച്ചു.
നിയമസഭാ തെരഞ്ഞെടുപ്പിൽ മനസാക്ഷിക്ക് അനുസരിച്ച് വോട്ട് രേഖപ്പെടുത്തണമെന്ന് വിശ്വാസികളെ ഓർമപ്പെടുത്തി കർദിനാൾ മാർ ബസേലിയോസ് ക്ലിമീസ് കാതോലിക്കാബാവ. മലങ്കര കത്തോലിക്ക സഭ പട്ടം സെൻ്റ് മേരീസ് കതീട്രലിൽ ഈസ്റ്ററിൻ്റെ ഭാഗമായി സംഘടിപ്പിച്ച പ്രാർഥനാ ച്ചടങ്ങിൽ പങ്കെടുക്കുകയായിരുന്നു കർദിനാൾ മാർ ബസേലിയോസ് ക്ലിമീസ് കാതോലിക്കാബാവ. തെരഞ്ഞെടുപ്പിൽ ഫലപ്രദമായി വോട്ട് ചെയ്യണം. ഒരാളും വോട്ട് പാഴാക്കരുത്. പുതിയ നിയമങ്ങളൊക്കെ വരുന്ന കാര്യം നിങ്ങൾക്ക് അറിയാമല്ലോയെന്ന് ഓർമിപ്പിച്ച അദ്ദേഹം ഈ നിയമത്തെക്കുറിച്ച് ആശങ്കയുണ്ടാക്കുന്ന പല കാര്യങ്ങളും പുറത്ത് വരുന്നുണ്ടെന്നും പറഞ്ഞു. സഭയുടെ നേതൃത്വത്തിൽ ക്രൈസ്തവരല്ലാത്തവർക്ക് വേണ്ടിയും സ്‌നേഹ ഭവനം നന്നായി നടത്തിക്കൊണ്ടു പോകുന്ന കാര്യം സകലർക്കും അറിയാവുന്നതാണെന്നും അദ്ദേഹം പറഞ്ഞു.
വാഷിങ്ടൺ: ഇറാൻ സമാധാന കരാറിന് വഴങ്ങിയില്ലെങ്കിൽ കനത്ത നാശമെന്ന് വീണ്ടും യുഎസ് പ്രസിഡന്റ് ഡൊണാൾഡ് ട്രമ്പിന്‍റെ ഭീഷണി. ടെഹ്‌റാനിൽ നടത്തിയ യുഎസ് സൈന്യം ശക്തമായ ആക്രമണത്തിൽ ഇറാനിലെ ഉന്നത സൈനിക നേതാക്കളെ വധിച്ചതായി ട്രംപ് വെളിപ്പെടുത്തി. അതേസമയം ഇറാന്റെ ആണവ വികിരണ മുന്നറിയിപ്പ് പശ്ചിമേഷ്യയിൽ വലിയ ആശങ്ക സൃഷ്ടിച്ചിരിക്കുകയാണ്. തങ്ങൾക്ക് നേരെയുള്ള ആക്രമണം തുടർന്നാൽ മേഖല ആകെ ദുരന്ത ഭൂമി ആകുമെന്നാണ് ഇറാൻ മുന്നറിയിപ്പ് നൽകിയത്. ജിസിസി രാജ്യങ്ങളെ മുഴുവൻ വികരണം ബാധിക്കും എന്നാണ് അറിയിപ്പ്.
സാമൂഹികമാധ്യമമായ ട്രൂത്ത് സോഷ്യലിലൂടെയാണ് ഇറാനിലെ നിരവധി സൈനിക നേതാക്കളെ വധിച്ചതായി ട്രംപ് അവകാശപ്പെട്ടത്. ഇറാനിൽ നടത്തിയ വ്യോമാക്രമണത്തിന്റേതെന്ന് അവകാശപ്പെട്ട് ഒരുമിനിറ്റും എട്ടുസെക്കൻഡും ദൈർഘ്യമുള്ള വീഡിയോദൃശ്യവും യുഎസ് പ്രസിഡന്റ് പങ്കുവച്ചിട്ടുണ്ട്. ഇറാനെ വളരെ മോശമായും അവിവേകത്തോടെയും നയിച്ച നിരവധി സൈനിക നേതാക്കൾ ടെഹ്‌റാനിൽ നടന്ന വൻ ആക്രമണത്തോടെ അവസാനിപ്പിക്കപ്പെട്ടു എന്ന കുറിപ്പോടെയാണ് ട്രംപ് വീഡിയോ പങ്കുവെച്ചത്. നിരവധി തവണ സ്ഫോടനങ്ങൾ നടക്കുന്നത് വീഡിയോയിൽ കാണാം.
എന്നാൽ ആക്രമണത്തിന്റെ ദൃശ്യം പങ്കുവെച്ചിട്ടുണ്ടെങ്കിലും എപ്പോളാണ് ആക്രമണം നടത്തിയതെന്നോ ആരൊക്കെയാണ് കൊല്ലപ്പെട്ടതെന്നോ വ്യക്തമല്ല. നേരത്തെ സമാധാന കരാറിന് ഇറാൻ വവങ്ങണമെന്നും, 48 മണിക്കൂറിനുള്ളിൽ അമേരിക്കയുമായി കരാറിലെത്തിയില്ലെങ്കിൽ ഇറാനുമേൽ നരകം പെയ്തിറങ്ങുമെന്നും ട്രംപ് അന്ത്യശാസനം നൽകിയരുന്നു. ഇതിന് പിന്നാലെയാണ് ഇറാന്റെ ഉന്നത സൈനിക നേതാക്കളെ കൊലപ്പെടുത്തിയെന്ന് ട്രംപ് അവകാശപ്പെട്ടത്.
