കൊച്ചി: എറണാകുളം ജില്ലയിൽ കുട്ടികളെ തട്ടിക്കൊണ്ടുപോകാൻ ശ്രമിച്ചെന്നാരോപിച്ച് രണ്ടിടത്ത് സംഭവങ്ങൾ. കിഴക്കേ കടുങ്ങല്ലൂരിലും ഫോർട്ട്കൊച്ചി അമരാവതിയിലുമാണ് കുട്ടികൾ രക്ഷപ്പെട്ടത്. രണ്ടിടത്തും സമീപത്തെ കടകളിലേക്ക് ഓടിക്കയറിയാണ് കുട്ടികൾ രക്ഷപ്പെട്ടത്.
കിഴക്കേ കടുങ്ങല്ലൂരിൽ ചൊവ്വാഴ്ച വൈകീട്ട് പമ്പുകവലയിലാണ് നാലാം ക്ലാസുകാരിയെ തട്ടിക്കൊണ്ടുപോകാൻ ശ്രമം നടന്നത്. സ്വകാര്യ സ്കൂളിൽനിന്ന് വീട്ടിലേക്ക് മടങ്ങുകയായിരുന്ന കുട്ടിയുടെ കൈയിൽ പിടിച്ച യുവാവ് വീട്ടിൽ കൊണ്ടുപോയിവിടാമെന്ന് പറഞ്ഞെന്നാണ് വിവരം. യുവാവിൽനിന്ന് കുതറിയ കുട്ടി സമീപത്തെ കടയിൽ ഓടിക്കയറി.
പിന്നാലെ യുവാവും കടയിലെത്തി കുട്ടി തന്റെ സഹോദരിയുടെ മകളാണെന്നും കൂടെ വിടണമെന്നും കടക്കാരോട് പറഞ്ഞു. എന്നാൽ യുവാവ് തനിക്ക് പരിചയക്കാരനല്ലെന്ന് കുട്ടി വ്യക്തമാക്കിയതോടെ നാട്ടുകാർ ഇയാളെ തടഞ്ഞുവച്ചു. പഞ്ചായത്തംഗം ശ്രീകുമാർ മുല്ലേപ്പിള്ളി വിവരമറിയിച്ചതിനെ തുടർന്ന് ബിനാനിപുരം പൊലീസ് സ്ഥലത്തെത്തി യു.സി. കോളേജ് സ്വദേശിയായ യുവാവിനെ കസ്റ്റഡിയിലെടുത്തു. കുട്ടിയുടെ രക്ഷിതാക്കൾ പരാതി നൽകാത്തതിനാൽ കേസെടുത്തിട്ടില്ലെന്ന് പൊലീസ് അറിയിച്ചു.
ഫോർട്ട്കൊച്ചി അമരാവതിയിൽ വൈകീട്ട് അഞ്ചോടെയാണ് അഞ്ചാം ക്ലാസുകാരനെ തട്ടിക്കൊണ്ടുപോകാൻ ശ്രമമുണ്ടായത്. ട്യൂഷൻ കഴിഞ്ഞ് വീട്ടിലേക്ക് പോകുകയായിരുന്ന കുട്ടിയെ ബൈക്കിലെത്തിയ രണ്ടുപേർ പിടികൂടി വാഹനത്തിൽ കയറ്റാൻ ശ്രമിച്ചെന്നാണ് പരാതി. കുട്ടി കുതറിയോടി സമീപത്തെ കടയിൽ അഭയം തേടി.
കടക്കാരി കുട്ടിയുടെ പിതാവിനെ വിവരമറിയിച്ചു. തുടർന്ന് പിതാവ് ഫോർട്ട്കൊച്ചി പൊലീസ് സ്റ്റേഷനിൽ പരാതി നൽകി. സംഭവത്തിൽ പൊലീസ് അന്വേഷണം ആരംഭിച്ചു.

ഇടക്കൊച്ചിയിലെ ബേക്കറിയിൽനിന്ന് വാങ്ങിയ ബ്രെഡ്ഡിനുള്ളിൽ ചത്ത പല്ലികളെ കണ്ടെത്തി. തിങ്കളാഴ്ച ഇടക്കൊച്ചി സ്വദേശി ദിവ്യ സുബീഷ്‌ വാങ്ങിയ ബ്രെഡ്ഡിനുള്ളിൽനിന്നാണ്‌ രണ്ട് ചത്ത പല്ലികളെ കിട്ടിയത്. പാമ്പായ്‌മൂലയിൽ പ്രവർത്തിക്കുന്ന ന്യൂക്വാളിറ്റി ബേക്കറിയിൽനിന്നാണ്‌ ബ്രെഡ്‌ വാങ്ങിയത്‌. ഇവിടെത്തന്നെ തയ്യാറാക്കുന്ന ബ്രെഡാണിത്. കടയുടമയെ അറിയിച്ചെങ്കിലും വിഷയം ഗൗരവത്തിലെടുക്കാതെ ഇവരെ പറഞ്ഞയക്കുകയായിരുന്നു.


ബ്രെഡ്‌ കഴിച്ച്‌ ഛർദിയും അവശതയുംതോന്നിയ ദിവ്യ ആശുപത്രിയിൽ ചികിത്സതേടിയിരുന്നു.പരാതിയെത്തുടർന്ന് നഗരസഭ ആരോഗ്യവിഭാഗം ഉദ്യോഗസ്ഥർ എത്തിയെങ്കിലും ബേക്കറി അടച്ചിട്ടനിലയിലായിരുന്നു. പിന്നീട് ഉടമയെ വിളിച്ചുവരുത്തി പരിശോധന നടത്തി 25,000 രൂപ പിഴയിട്ടു. വൃത്തിഹീനമായ സാഹചര്യത്തിലാണ് ബേക്കറിയുടെ പാചകപ്പുര പ്രവർത്തിച്ചിരുന്നത്‌. കൂടുതൽ പരിശോധന നടത്തിയശേഷമേ ബേക്കറി തുറക്കാൻ അനുവാദം നൽകുകയുള്ളൂവെന്ന് ഹെൽത്ത് ഇൻസ്പെക്ടർ എം ലത പറഞ്ഞു.

നീണ്ടകാലത്തെ പ്രണയത്തിനും കാത്തിരിപ്പിനും ഒടുവിൽ ഫുട്ബോൾ ഇതിഹാസം ക്രിസ്റ്റ്യാനോ റൊണാൾഡോയും ദീർഘകാല പങ്കാളി ജോർജീന റോഡ്രിഗസും വിവാഹിതരായി. പോർച്ചുഗലിലെ കാസ്കായിസിൽ ലളിതമായ ചടങ്ങുകളോടെയായിരുന്നു വിവാഹം.
ഇരുവരുടെയും അഞ്ച് മക്കളും വിവാഹച്ചടങ്ങിൽ പങ്കെടുത്തു. വിവാഹമോതിരങ്ങൾ അണിഞ്ഞ ചിത്രം സോഷ്യൽ മീഡിയയിൽ പങ്കുവെച്ചാണ് റൊണാൾഡോ സന്തോഷവാർത്ത ആരാധകരെ അറിയിച്ചത്.
ഏകദേശം പത്ത് വർഷമായി ഒരുമിച്ച് കഴിയുന്ന റൊണാൾഡോയും ജോർജീനയും ഏറെക്കാലമായി വിവാഹിതരാകുമെന്ന അഭ്യൂഹങ്ങൾ നിലനിന്നിരുന്നു. ഒടുവിൽ കാത്തിരിപ്പുകൾക്ക് വിരാമമിട്ടാണ് ഇരുവരും വിവാഹിതരായത്.