മധുര: തടി കുറയ്ക്കാൻ യൂട്യൂബ് വീഡിയോയിൽ കണ്ട മരുന്ന് കഴിച്ച യുവതിക്ക് ദാരുണാന്ത്യം. തമിഴ്നാട് മധുര മീനാമ്പൽപുരത്തെ കലൈയരസി (19) ആണ് മരിച്ചത്. യൂട്യൂബ് വീഡിയോയിൽ കണ്ട മരുന്ന് കഴിച്ചതിന് പിന്നാലെയായിരുന്നു സംഭവം.

ശരീരഭാരം കുറയ്ക്കാൻ ബോറാക്സ് എന്ന രാസവസ്തു ഉപയോഗിച്ചുള്ള മരുന്ന് കഴിച്ചാൽ മതിയെന്ന് ഒരു യൂട്യൂബ് വീഡിയോയിൽ കണ്ടിരുന്നതായി കലൈയരസി പറഞ്ഞതായി പൊലീസ് വൃത്തങ്ങൾ പറഞ്ഞു. വീഡിയോയിൽ പറഞ്ഞതുപ്രകാരം, ജനുവരി 16ന് ഈസ്റ്റ് മാസി സ്ട്രീറ്റിലെ ഒരു മരുന്നുകടയിൽ നിന്ന് അവർ ഉത്പന്നം വാങ്ങി.

പിറ്റേന്ന് രാവിലെ ഒമ്പതോടെ കലൈയരസി ഈ മരുന്ന് കഴിക്കുകയും പിന്നാലെ ഛർദിയും വയറിളക്കവും ഉണ്ടാവുകയും ചെയ്തു. ഉടൻ മാതാപിതാക്കൾ മുനിച്ചലൈയിലെ സ്വകാര്യ ആശുപത്രിയിൽ പ്രവേശിപ്പിച്ചു. ഡിസ്ചാർജായെങ്കിലും വൈകുന്നേരത്തോടെ ബുദ്ധിമുട്ട് കൂടുകയും അടുത്തുള്ള ക്ലിനിക്കിൽ ചികിത്സ തേടുകയും ചെയ്തു.

എന്നാൽ രാത്രി 11 മണിയോടെ നില വീണ്ടും വഷളാവുകയും യുവതിയെ രാജാജി സർക്കാർ ആശുപത്രിയിൽ പ്രവേശിപ്പിക്കുകയും ചെയ്തെങ്കിലും മരിച്ചിരുന്നു. സംഭവത്തിൽ കലൈയരസിയുടെ പിതാവിന്റെ പരാതിയിൽ സെല്ലൂർ പൊലീസ് കേസ് രജിസ്റ്റർ ചെയ്തിട്ടുണ്ട്. അന്വേഷണം പുരോഗമിക്കുകയാണെന്ന് പൊലീസ് അറിയിച്ചു.

പിഎച്ച്ഡി വിദ്യാര്‍ഥി ജീവനൊടുക്കി. ഐഐടി കാന്‍പുറിലെ എര്‍ത്ത് സയന്‍സ് വിദ്യാര്‍ഥിയായ രവിസ്വരൂപം ഈശ്വര(25)മാണ് ജീവനൊടുക്കിയത്. ഇന്നലെ ഉച്ചയോടെ കോളജ് ക്യാംപസ് കെട്ടിടത്തിന്‍റെ ആറാം നിലയില്‍ നിന്ന് രവി ചാടുകയായിരുന്നു. മൂന്ന് മാസം ഗര്‍ഭിണിയായ ഭാര്യയും മകളുമാണ് രവിക്കുള്ളത്. ഉത്കണ്ഠയ്ക്കും വിഷാദത്തിനും ചികില്‍സയിലായിരുന്ന രവിക്ക് രണ്ട് വര്‍ഷം മുന്‍പ് സ്കിസോഫ്രീനിയ സ്ഥിരീകരിച്ചിരുന്നു. 

രാജസ്ഥാനിലെ ചുരു സ്വദേശിയായ രവി 2023 ജൂലൈയിലാണ് പിഎച്ച്ഡിക്ക് ഐഐടി കാന്‍പുരില്‍ എത്തിയത്. മാനസിക സമ്മര്‍ദത്തിന് രവി ചികില്‍സയിലായിരുന്നു. തിങ്കളാഴ്ചയും ഡോക്ടറെ കണ്ടിരുന്നു. ഇന്നലെ വൈകുന്നേരം കൗണ്‍സിലറുമായി കൂടിക്കാഴ്ച നിശ്ചയിച്ചിരുന്നു. ഇതിന് മണിക്കൂറുകള്‍ മാത്രം ശേഷിക്കെയാണ് രവി ജീവനൊടുക്കിയത്. ഉടന്‍ തന്നെ ആശുപത്രിയില്‍ എത്തിച്ചുവെങ്കിലും മരണം സംഭവിച്ചിരുന്നു. കുറച്ച് ദിവസങ്ങളായി രവി കടുത്ത വിഷാദത്തിലായിരുന്നുവെന്ന് സുഹൃത്തുക്കള്‍ പറയുന്നു.