പാരിപ്പള്ളി മടത്തറ റോഡില്‍ ജവഹര്‍ ജംഗ്ഷന് സമീപം കോണ്‍ക്രിറ്റ് പ്രവൃത്തികള്‍ ആരംഭിക്കുന്നതിനാല്‍ ടി ജംഗ്ഷനില്‍ കൂടി ഓഗസ്റ്റ് ഒന്ന് മുതല്‍ എട്ടു വരെയുള്ള ഗതാഗതം നിരോധിക്കുമെന്നു അസിസ്റ്റന്റ് എഞ്ചിനീയര്‍ റോഡ് സെക്ഷന്‍ അറിയിച്ചു. മുക്കട ഭാഗത്തേയ്ക്ക് പോകുന്ന വാഹനങ്ങള്‍ പാരിപ്പള്ളി ജംഗ്ഷന്‍ വഴി നാഷണല്‍ ഹൈവേ വഴിയും തിരിച്ചും പോകേണ്ടതാണ്

കേന്ദ്ര കാലാവസ്ഥാവകുപ്പ് ജില്ലയില്‍ നാളെ ഓറഞ്ച് മുന്നറിയിപ്പും ഓഗസ്റ്റ് ഒന്നിന് മഞ്ഞ മുന്നറിയിപ്പും നല്‍കിയിട്ടുണ്ട്. ഒറ്റപ്പെട്ട ഇടങ്ങളില്‍ അതിശക്തമായ മഴയ്ക്കും ഇടിമിന്നലിനുമാണ് സാധ്യത. ജനങ്ങള്‍ ജാഗ്രതാനിര്‍ദ്ദേശങ്ങള്‍ കര്‍ശനമായി പാലിക്കണം. അപകട സാഹചര്യങ്ങളില്‍ ജില്ല (1077) സംസ്ഥാന (1070) കണ്‍ട്രോള്‍ റൂമുകളുമായി ബന്ധപ്പെടണമെന്ന് ജില്ലാ ദുരന്തനിവാരണ അതോറിറ്റി ചെയര്‍പെഴ്‌സനായ ജില്ലാ കളക്ടര്‍ അറിയിച്ചു.

ജാഗ്രത നിര്‍ദേശങ്ങള്‍
ഉരുള്‍പൊട്ടല്‍, മണ്ണിടിച്ചില്‍, മലവെള്ളപ്പാച്ചില്‍ സാധ്യതാ പ്രദേശങ്ങളിലുള്ളവര്‍ അധികൃതരുടെ നിര്‍ദേശാനുസരണം സുരക്ഷിതമായ സ്ഥലങ്ങളിലേക്ക് മാറിതാമസിക്കണം.
നദിക്കരകള്‍, അണക്കെട്ടുകളുടെതാഴ്ച എന്നിവിടങ്ങളില്‍ താമസിക്കുന്നവരും നിര്‍ദേശാനുസരണം മാറി താമസിക്കണം.
ദുരന്തസാധ്യതപ്രദേശങ്ങളില്‍താമസിക്കുന്നവര്‍ പ്രദേശത്ത് ക്യാമ്പുകള്‍ തുറന്നു എന്നുറപ്പാക്കേണ്ടതും പകല്‍സമയത്ത് മാറി താമസിക്കേണ്ടതുമാണ്. ഇതിനായി തദ്ദേശസ്ഥാപന, റവന്യൂ അധികാരികളുമായി ബന്ധപ്പെടാം .
ശക്തമായകാറ്റിന് സാധ്യതയുള്ളതിനാല്‍ അടച്ചുറപ്പില്ലാത്ത വീടുകളില്‍ താമസിക്കുന്നവരും മേല്‍ക്കൂര ശക്തമല്ലാത്ത വീടുകളില്‍ താമസിക്കുന്നവരും പ്രത്യേക ജാഗ്രത പാലിക്കണം.
കാറ്റില്‍ മരങ്ങള്‍ കടപുഴകിവീണും പോസ്റ്റുകള്‍ തകര്‍ന്നുവീണും ഉണ്ടാകാനിടയുള്ള അപകടങ്ങളെയും ശ്രദ്ധിക്കണം.
ശക്തമായ മഴപെയ്യുന്ന സാഹചര്യത്തില്‍ നദികള്‍ മുറിച്ചു കടക്കാനോ, നദികളിലോ മറ്റ് ജലാശയങ്ങളിലോ കുളിക്കാനോ മീന്‍പിടിക്കാനോ മറ്റ് ആവശ്യങ്ങള്‍ക്കോ ഇറങ്ങാന്‍ പാടില്ല.
ജലാശയങ്ങള്‍ക്ക് മുകളിലെ മേല്‍പ്പാലങ്ങളില്‍ കയറി കാഴ്ച കാണുകയോ സെല്‍ഫി എടുക്കുകയോ ചിത്രങ്ങള്‍ പകര്‍ത്തുകയോ കൂട്ടം കൂടി നില്‍ക്കുകയോ ചെയ്യരുത്.
മഴശക്തമാകുന്നഅവസരങ്ങളില്‍ അത്യാവശ്യമല്ലാത്തയാത്രകള്‍ പൂര്‍ണമായുംഒഴിവാക്കുക. വെള്ളച്ചാട്ടങ്ങള്‍, ജലാശയങ്ങള്‍, മലയോര മേഖലകള്‍ എന്നിവിടങ്ങളിലേക്കുള്ള വിനോദയാത്രകള്‍ മഴ മുന്നറിയിപ്പ് മാറുന്നത്വരെ പൂര്‍ണമായും ഒഴിവാക്കണം.
ജലാശയങ്ങളോട്‌ചേര്‍ന്ന റോഡുകളിലൂടെ യാത്രകളില്‍ ജാഗ്രത പാലിക്കുക. അറ്റകുറ്റപ്പണികള്‍ നടക്കുന്ന റോഡുകളിലും ജാഗ്രത പാലിക്കുക. അതിശക്തമായ ജലാശയങ്ങള്‍ കരകവിഞ്ഞ് ഒഴുകുന്നയിടങ്ങളില്‍ വാഹനം അടിക്കരുത്.
സ്വകാര്യ-പൊതുഇടങ്ങളില്‍ അപകടാവസ്ഥയില്‍നില്‍ക്കുന്ന മരങ്ങള്‍/പോസ്റ്റുകള്‍/ബോര്‍ഡുകള്‍, മതിലുകള്‍ തുടങ്ങിയവ അധികൃതര്‍ സുരക്ഷിതമാക്കണം. മരങ്ങള്‍ കോതി ഒതുക്കണം.
ദുരന്തസാധ്യത മേഖലയിലുള്ളവര്‍ എമര്‍ജന്‍സി കിറ്റ് അടിയന്തരമായി തയ്യാറാക്കി വയ്‌ക്കേണ്ടതാണ്.

അനധികൃതമായി മാലിന്യംവലിച്ചെറിയുന്നത് ഉള്‍പ്പടെയുള്ള കുറ്റകൃത്യങ്ങള്‍ക്ക് പിഴചുമത്തിയുള്ള കര്‍ശനനടപടികള്‍ തുടരുമെന്ന് ജില്ലാ കലക്ടര്‍ ആനി ജൂല തോമസ്. കലക്ടറേറ്റ് കോണ്‍ഫറന്‍സ് ഹാളില്‍ ചേര്‍ന്ന ജില്ലയിലെ വിവിധ തദ്ദേശസ്ഥാപനങ്ങളിലെ സെക്രട്ടറിമാരുടെ യോഗത്തില്‍ അധ്യക്ഷതവഹിക്കവെ വിവിധ തദ്ദേശസ്ഥാപനങ്ങളില്‍ രജിസ്റ്റര്‍ ചെയ്ത 106 കേസുകളിലായി 525350 രൂപ പിഴ ചുമത്തിയെന്ന് വ്യക്തമാക്കി.
വിവിധ തദ്ദേശസ്ഥാപനങ്ങളിലെ സെക്രട്ടറിമാരുടെ യോഗത്തില്‍ ഖരമാലിന്യ നിര്‍മാര്‍ജനപ്രവര്‍ത്തനങ്ങളുടെ ഏകോപനത്തിന് ജില്ലാതലത്തില്‍ പ്രത്യേക സെല്‍ആരംഭിക്കണമെന്ന് നിര്‍ദേശിച്ചു. അനധികൃത മാലിന്യനിക്ഷേപകേന്ദ്രങ്ങള്‍ കണ്ടെത്തി നടപടി സ്വീകരിക്കണം. വിവിധ പഞ്ചായത്തുകളില്‍ സ്ഥാപിച്ച എം സി എഫുകളുടെ പ്രവര്‍ത്തനം കുറ്റമറ്റരീതിയില്‍ എന്നുറപ്പാക്കണം.
വന്‍കിടസ്ഥാപനങ്ങള്‍ മാലിന്യങ്ങളുടെ ഉറവിടസംസ്‌കരണം നടത്തണം. പരിശോധനകളും മാലിന്യസംസ്‌ക്കരണ സംവിധാനങ്ങളും തദ്ദേശസ്ഥാപനങ്ങള്‍ ഒരുക്കണം. അജൈവമാലിന്യങ്ങള്‍ തദ്ദേശസ്ഥാപനങ്ങള്‍ ചുമതലപ്പെടുത്തുന്ന ഏജന്‍സികള്‍ക്ക് കൈമാറണം. മാലിന്യനിര്‍മാര്‍ജനത്തിന് തദ്ദേശസ്ഥാപന തലത്തില്‍ ആരംഭിച്ച നൂതനപദ്ധതികളുടെവിവരങ്ങള്‍ കൈമാറണം.
വിനോദസഞ്ചാര-തീര്‍ത്ഥാടന കേന്ദ്രങ്ങള്‍, ജലാശയങ്ങള്‍, ബീച്ചുകള്‍ എന്നിവിടങ്ങളിലെ മാലിന്യസംസ്‌കരണത്തിന് പുതിയ പദ്ധതികള്‍ തയ്യാറാക്കും; പരാതിപരിഹാരം വേഗത്തിലാക്കാന്‍ സംവിധാനമൊരുക്കും. ഹരിതകര്‍മസേനയുടെ വാതില്‍പ്പടി മാലിന്യശേഖരണപ്രക്രിയ കൂടുതല്‍ഇടങ്ങളിലേക്ക് വ്യാപിപ്പിക്കും. ശുചിത്വമിഷന്‍ മുഖേന ലഭിക്കുന്ന വിവിധ ഫണ്ടുകള്‍ പ്രയോജനപ്പെടുത്തണമെന്നും ജില്ലാ കലക്ടര്‍ ഓര്‍മിപ്പിച്ചു.
തദ്ദേശസ്വയംഭരണ വകുപ്പ് ജോയിന്റ് ഡയറക്ടര്‍ എസ്. സുബോധ്, ഡെപ്യൂട്ടി ഡയറക്ടര്‍ അജയകുമാര്‍, ജില്ലാ മെഡിക്കല്‍ ഓഫീസര്‍ എ എല്‍ ഷീജ, തദ്ദേശസ്വയംഭരണസ്ഥാപനസെക്രട്ടറിമാര്‍ തുടങ്ങിയവര്‍ പങ്കെടുത്തു.

ജില്ലയില്‍ ടിപ്പര്‍ ലോറികളുടെയും ടിപ്പിംഗ് മെക്കാനിസം ഉപയോഗിച്ച് പ്രവര്‍ത്തിക്കുന്ന മറ്റ് വാഹനങ്ങളുടെയും ഗതാഗത സമയക്രമം പുതുക്കി നിശ്ചയിച്ചതായി ജില്ലാ ദുരന്ത നിവാരണ അതോറിറ്റി ചെയര്‍പേഴ്സണ്‍ കൂടിയായ ജില്ലാ കലക്ടര്‍ അറിയിച്ചു. പുതുക്കിയ ക്രമീകരണമനുസരിച്ച് രാവിലെ 7.45 മുതല്‍ 9.30 വരെയും വൈകുന്നേരം 3.30 മുതല്‍ 4.30 വരെയും ഈ വാഹനങ്ങള്‍ക്ക് റോഡിലിറങ്ങുന്നതിന് നിയന്ത്രണമുണ്ടാകും.