പതിനാറുകാരിയായ പെൺകുട്ടിയെ പിന്തുടർന്ന് ശല്യം ചെയ്യുകയും മർദ്ദിക്കുകയും ചെയ്ത കേസിൽ പ്രമുഖ ടെലിവിഷൻ താരം രോഹിത് ചന്ദേലിനെ (29) മുംബൈ പോലീസ് അറസ്റ്റ് ചെയ്തു.
വെള്ളിയാഴ്ച ദഹിസറിലെ വസതിയിൽ നിന്ന് പന്ത് നഗർ പോലീസാണ് നടനെ കസ്റ്റഡിയിലെടുത്തത്. തുടർന്ന് പ്രത്യേക പോക്സോ കോടതിയിൽ ഹാജരാക്കിയ പ്രതിയെ പോലീസ് കസ്റ്റഡിയിൽ വിട്ടു.
പരസ്പരം അറിയാവുന്ന പെൺകുട്ടിയെ വ്യത്യസ്ത ഫോൺ നമ്പറുകളിൽ നിന്ന് വിളിച്ച് പ്രതി നിരന്തരം ശല്യം ചെയ്തിരുന്നതായി പരാതിയിൽ പറയുന്നു. ഇതിന് പുറമെ, ജൂലൈ 5-ന് പെൺകുട്ടിയുടെ ഹൗസിംഗ് സൊസൈറ്റിക്ക് സമീപം വെച്ച് പിന്തുടർന്ന് തടഞ്ഞുനിർത്തുകയും ചീത്തവിളിക്കുകയും ചെയ്തു.
പെൺകുട്ടി ഇതിനെ എതിർത്തപ്പോൾ പ്രതി ശാരീരികമായി ഉപദ്രവിച്ചതായും പരാതിയിലുണ്ട്. സംഭവത്തിൽ പോക്സോ നിയമപ്രകാരവും, പിന്തുടർന്ന് ശല്യം ചെയ്യൽ, മർദ്ദിക്കൽ തുടങ്ങിയ ഐപിസി വകുപ്പുകൾ പ്രകാരവും പോലീസ് കേസെടുത്ത് അന്വേഷണം ആരംഭിച്ചു.
‘പാണ്ഡ്യ സ്റ്റോർ’, ‘കാശിബായ് ബാജിറാവു ബല്ലാൽ’, ‘സൈരാബ്’ തുടങ്ങിയ ഹിറ്റ് ടെലിവിഷൻ പരമ്പരകളിലൂടെയും വെബ് സീരീസുകളിലൂടെയും ശ്രദ്ധേയനായ നടനാണ് രോഹിത് ചന്ദേൽ.
‘ഹർ മുഷ്കിൽ കാ ഹൽ – അക്ബർ ബീർബൽ’ എന്ന പരമ്പരയിലൂടെയാണ് താരം അഭിനയരംഗത്തേക്ക് എത്തിയത്. ‘എസ്കേപ്പ് ലൈവ്’, ‘ചന്ദ്രഗുപ്ത മൗര്യ’ തുടങ്ങിയ പ്രൊജക്ടുകളിലും ശ്രദ്ധേയമായ വേഷങ്ങൾ കൈകാര്യം ചെയ്തിട്ടുണ്ട്.
