തിരുവനന്തപുരം : സെന്‍ട്രല്‍ സ്റ്റേഡിയത്തില്‍ സര്‍ക്കാരിന്റെ സത്യപ്രതിജ്ഞ നടക്കുന്നതിനാല്‍ തിങ്കള്‍ രാവിലെ ഏഴുമുതല്‍ നഗരത്തില്‍ ഗതാഗതക്രമീകരണം. പേരൂര്‍ക്കട, ശാസ്തമംഗലം ഭാഗങ്ങളില്‍നിന്ന് സ്റ്റാച്യുവഴി പോകുന്ന വാഹനങ്ങള്‍ വെള്ളയമ്പലം- വഴുതക്കാട് -വിമന്‍സ് കോളേജ് ജങ്ഷന്‍ തൈക്കാട് വഴി പോകണം. പിഎംജിയില്‍നിന്ന് സ്റ്റാച്യുവഴി പോകേണ്ടവര്‍ എല്‍എംഎസ് മ്യൂസിയം- മാനവീയം റോഡ്ആല്‍ത്തറവഴുതക്കാട് -വിമന്‍സ് കോളേജ് ജങ്ഷന്‍ -തൈക്കാട് വഴി പോകണം. ഓവര്‍ബ്രിഡ്ജില്‍നിന്ന് സ്റ്റാച്യുവഴി പോകേണ്ടവര്‍ ഓവര്‍ബ്രിഡ്ജ് തമ്പാനൂര്‍ -മോഡല്‍ സ്‌കൂള്‍പനവിള- ബേക്കറി ഫ്‌ലൈഓവര്‍വഴി പോകണം.

എംഎല്‍എ/എംപിമാരുടെ വാഹനങ്ങള്‍ ആര്‍ബിഐബേക്കറി ജങ്ഷന്‍- വാന്റോസ് -ജേക്കബ്‌സ് ജങ്ഷന്‍ -ഗേറ്റ്-4 വഴി സെക്രട്ടറിയറ്റിനകത്ത് നിര്‍ത്തിയിടണം. ഉദ്യോഗസ്ഥര്‍, പൊലീസ്, മീഡിയ വാഹനങ്ങള്‍ സംസ്‌കൃത കോളേജ് ഗ്രൗണ്ട്, യൂണിവേഴ്‌സിറ്റി ക്യാമ്പസ്, യൂണിവേഴ്‌സിറ്റി കോളേജ് എന്നിവിടങ്ങളില്‍ നിര്‍ത്താം.

പാര്‍ക്കിങ്

വലിയ വാഹനങ്ങള്‍ ആറ്റുകാല്‍ പാര്‍ക്കിങ് ഗ്രൗണ്ട്, ഐരാണിമുട്ടം ഹോമിയോ റിസര്‍ച്ച് സെന്റര്‍ ഗ്രൗണ്ട്, പൂജപ്പുര ഗ്രൗണ്ട്, ചാക്ക – ലോര്‍ഡ്‌സ് ബൈപാസ് റോഡിന്റെ ഇരുവശങ്ങള്‍, കുഴിവിള -ആക്കുളം റോഡ് (നിഷിനുശേഷം), കൈമനം- പാപ്പനംകോട് റോഡിന്റെ ഇരുവശങ്ങള്‍ എന്നിവിടങ്ങളില്‍ നിര്‍ത്തണം.

ചെറിയ വാഹനങ്ങള്‍ പുത്തരിക്കണ്ടം മൈതാനം, മാഞ്ഞാലിക്കുളം ഗ്രൗണ്ട്, ജാസ് ഹോട്ടലിനുസമീപത്തെ ഗ്രൗണ്ട്, സെന്റ് ജോസഫ്‌സ് സ്‌കൂള്‍ ഗ്രൗണ്ട്, പൂജപ്പുര എല്‍ബിഎസ് ഗ്രൗണ്ട്, എല്‍എംഎസ്, ചാല ബോയ്‌സ്, ഗേള്‍സ് ഹയര്‍ സെക്കന്‍ഡറി സ്‌കൂളുകളുടെ ഗ്രൗണ്ട്, മോഡല്‍ സ്‌കൂള്‍, സംഗീത കോളേജ്, ആര്‍ട്‌സ് കോളേജ്, വിമന്‍സ് കോളേജ്, ജിമ്മി ജോര്‍ജ് ഇന്‍ഡോര്‍ സ്റ്റേഡിയം, ഐരാണിമുട്ടം ഹോമിയോ കോളേജ്, മള്‍ട്ടിലെവല്‍ പാര്‍ക്കിങ് ഗ്രൗണ്ട്, സാഫല്യം കോംപ്ലക്‌സ് (പേ ആന്‍ഡ് പാര്‍ക്കിങ്), വെള്ളയമ്പലം വാട്ടര്‍ അതോറിറ്റി, കവടിയാര്‍ സാല്‍വേഷന്‍ ആര്‍മി സ്‌കൂള്‍, ടാഗോര്‍ തിയറ്റര്‍, പിഎംജി ലോ കോളേജ് റോഡ്, കവടിയാര്‍കുറവന്‍കോണം റോഡ് (ഇടതുവശം), വികാസ് ഭവന്‍ റോഡ്, പരുത്തിപ്പാറകേശവദാസപുരം റോഡ് (ഇടതുവശം) എന്നിവിടങ്ങളിലാണ് പാര്‍ക്ക് ചെയ്യേണ്ടത്.

ഇരുചക്രവാഹനങ്ങള്‍ പുളിമൂട്- ഓവര്‍ബ്രിഡ്ജ് റോഡ് (ഇരുവശങ്ങള്‍), എ കെ ജി സെന്റര്‍ സ്‌പെന്‍സര്‍ റോഡ്, അയ്യന്‍കാളി ഹാള്‍ജേക്കബ്‌സ് (സാഫല്യം) റോഡ്, പബ്ലിക് ലൈബ്രറിക്ക് എതിര്‍വശത്തെ ഗ്രൗണ്ട് എന്നിവിടങ്ങളില്‍ നിര്‍ത്തണം. അനധികൃതമായി പാര്‍ക്ക് ചെയ്യുന്ന വാഹനങ്ങള്‍ റിക്കവറി വാഹനം ഉപയോഗിച്ച് നീക്കും. വിമാനത്താവളത്തിലേക്കും റെയില്‍വേ സ്റ്റേഷനിലേക്കുമുള്ള യാത്രകള്‍ മുന്‍കൂട്ടി ക്രമീകരിക്കണം. ഫോണ്‍: 04712558731, 94979 30055.

കോഴിക്കോട്: ഓടിക്കൊണ്ടിരുന്ന കാറിന് തീപിടിച്ച് ഏഴ് മാസം ഗര്‍ഭിണിയായ യുവതി മരിച്ച സംഭവത്തില്‍ ദുരൂഹത ആരോപിച്ച് ബന്ധുക്കള്‍. കോഴിക്കോട് വ്യാഴാഴ്ച രാത്രിയാണ് അപകടം ഉണ്ടായത്. കാറില്‍ തീപിടിത്തമുണ്ടായതിനെ തുടര്‍ന്ന് ഗര്‍ഭിണിയായ സോന (27) മരിക്കുകയായിരുന്നു.
തീപിടിത്തത്തിന് കാരണം വൈദ്യുത ഷോര്‍ട്ട് സര്‍ക്യൂട്ട് അല്ലെന്നതാണ് പ്രാഥമിക പരിശോധനയില്‍ ലഭിച്ച സൂചന. കാറിന്റെ വൈദ്യുത വയറിങ്ങിലോ ഇന്ധന ടാങ്കിലോ തകരാറുകള്‍ കണ്ടെത്താനായിട്ടില്ലെന്ന് അധികൃതര്‍ അറിയിച്ചു. കൂടുതല്‍ സാമ്പിളുകള്‍ പരിശോധനയ്ക്കായി അയച്ചിട്ടുണ്ടെന്നും ഫൊറന്‍സിക് റിപ്പോര്‍ട്ട് ലഭിച്ച ശേഷമേ തീപിടിത്തത്തിന്റെ കാരണം വ്യക്തമാകൂവെന്നും അന്വേഷണസംഘം അറിയിച്ചു.
സംഭവത്തില്‍ ദുരൂഹതയുണ്ടെന്ന് സോനയുടെ അമ്മാവന്‍ എ.കെ. സത്യന്‍ മാധ്യമങ്ങളോട് പറഞ്ഞു. ഷോര്‍ട്ട് സര്‍ക്യൂട്ടിനെ തുടര്‍ന്നുള്ള തീപിടിത്തമെങ്കില്‍ കാര്‍ ഇത്രയും വേഗത്തില്‍ പൂര്‍ണമായി കത്തിനശിക്കില്ലെന്നാണ് അദ്ദേഹത്തിന്റെ ആരോപണം. കാറിനുള്ളില്‍ അപകടകരമായ എന്തെങ്കിലും വസ്തു ഉണ്ടായിരുന്നിരിക്കാമെന്നും അദ്ദേഹം സംശയം പ്രകടിപ്പിച്ചു. സോനയെ മുന്‍സീറ്റില്‍ ഇരുത്താതെ പിന്നിലിരുത്തിയതും സംശയം വര്‍ധിപ്പിക്കുന്നതായി അദ്ദേഹം പറഞ്ഞു. രജിന്‍ ലാലിനെതിരെ സംശയമുണ്ടെന്നും പോലീസിനും വനിതാ കമ്മീഷനും പരാതി നല്‍കാനൊരുങ്ങുകയാണെന്നും സത്യന്‍ വ്യക്തമാക്കി.
സോനയും രജിന്‍ ലാലും പ്രണയവിവാഹം ചെയ്തവരാണെന്നും സത്യന്‍ പറഞ്ഞു. രജിന്‍ വിദേശത്തായിരിക്കെ സാമൂഹികമാധ്യമങ്ങളിലൂടെയാണ് ഇരുവരും പരിചയപ്പെട്ടത്. വിവാഹത്തിനുള്ള ഒരുക്കങ്ങള്‍ക്കിടെ രജിന്‍ മറ്റൊരു യുവതിയുമായി ബന്ധത്തിലായതായും പിന്നീട് ആ യുവതിയെ വിവാഹം കഴിക്കാന്‍ തീരുമാനിച്ചതായും അദ്ദേഹം ആരോപിച്ചു. ഇതറിഞ്ഞ സോന ആത്മഹത്യയ്ക്ക് ശ്രമിച്ചിരുന്നുവെന്നും തുടര്‍ന്ന് പോലീസ് സ്റ്റേഷനില്‍ നടന്ന ചര്‍ച്ചയ്ക്കുശേഷമാണ് രജിന്‍ സോനയെ വിവാഹം ചെയ്യാന്‍ സമ്മതിച്ചതെന്നും അദ്ദേഹം കൂട്ടിച്ചേര്‍ത്തു. കുടുംബങ്ങളുടെ എതിര്‍പ്പിനെ മറികടന്ന് 2023-ലാണ് ഇരുവരും വിവാഹിതരായത്.
സോനയുടെ ആശുപത്രി പരിശോധന കഴിഞ്ഞ് മടങ്ങുന്നതിനിടെയാണ് അപകടമുണ്ടായത്. കക്കറമുക്ക് റോഡിലെ എടോളിത്താഴെ രാത്രി 9.15ഓടെ സഞ്ചരിച്ചുകൊണ്ടിരുന്ന കാറില്‍ നിന്ന് പുക ഉയരുന്നത് ശ്രദ്ധയില്‍പെട്ടതോടെ വാഹനം നിര്‍ത്തിയതായി പറയുന്നു. കാര്‍ ഓടിച്ചിരുന്നത് സോനയുടെ ഭര്‍ത്താവ് രജിന്‍ ലാലായിരുന്നു. സോന പിന്‍സീറ്റിലായിരുന്നു ഇരുന്നത്. വാഹനം നിര്‍ത്തിയതിന് പിന്നാലെ തീ പടരുകയും രജിന്‍ ലാല്‍ രക്ഷപ്പെടാന്‍ സമീപത്തെ തോട്ടിലേക്ക് ചാടുകയുമായിരുന്നു.
നാട്ടുകാര്‍ ഉടന്‍ രക്ഷാപ്രവര്‍ത്തനം ആരംഭിച്ചെങ്കിലും തീ അതിവേഗം പടര്‍ന്നതിനാല്‍ സോനയെ പുറത്തെടുക്കാന്‍ കഴിഞ്ഞില്ല. പിന്നീട് അഗ്നിരക്ഷാസേന എത്തിയാണ് തീയണച്ചത്. അതിനുമുമ്പേ കാര്‍ പൂര്‍ണമായും കത്തിനശിച്ചിരുന്നു. ഗുരുതരാവസ്ഥയിലായ സോനയെ പേരാമ്പ്ര താലൂക്ക് ആശുപത്രിയിലെത്തിച്ചെങ്കിലും രക്ഷിക്കാനായില്ല.