കുണ്ടറ: ഓണ്‍ലൈന്‍ ഷോപ്പിംഗില്‍ വഞ്ചിക്കപ്പെട്ടതിന്റെ ഞെട്ടലിലാണ് വെള്ളിമണ്‍ സ്വദേശി മോഹനന്‍പിള്ള. യൂട്യൂബില്‍ കണ്ട പരസ്യം കണ്ട് ഓര്‍ഡര്‍ ചെയ്ത സിസിടിവി ക്യാമറയ്ക്ക് പകരം അദ്ദേഹത്തിന് ലഭിച്ചത് മണ്ണ് നിറഞ്ഞ പാഴ്‌സല്‍. വര്‍ഷങ്ങളായി ഓണ്‍ലൈന്‍ വഴി സാധനങ്ങള്‍ വാങ്ങാറുള്ള മോഹനന്‍പിള്ളയ്ക്ക് ഇതാദ്യമായാണ് ഇത്തരമൊരു ദുരനുഭവം ഉണ്ടായത്.
999 രൂപ മുടക്കി ഓര്‍ഡര്‍ ചെയ്ത സാധനം അഞ്ച് ദിവസത്തിന് ശേഷം വീട്ടിലെത്തിയപ്പോഴാണ് താന്‍ വലിയൊരു ചതിയില്‍ അകപ്പെട്ടെന്ന് അദ്ദേഹം തിരിച്ചറിഞ്ഞത്. ആകാംക്ഷയോടെ പാഴ്‌സല്‍ തുറന്നു നോക്കിയപ്പോള്‍ കണ്ടത് നിറയെ മണ്ണാണ്.
സംഭവം ശ്രദ്ധയില്‍പ്പെട്ട ഉടന്‍ തന്നെ പാഴ്‌സല്‍ എത്തിച്ച ഡെലിവറി ബോയിയെ അദ്ദേഹം ബന്ധപ്പെട്ടെങ്കിലും, തനിക്ക് ഇതിനെക്കുറിച്ച് യാതൊരു വിവരവുമില്ലെന്നായിരുന്നു മറുപടി. എങ്കിലും, എന്തെങ്കിലും ബുദ്ധിമുട്ടുണ്ടെങ്കില്‍ അന്വേഷിക്കാന്‍ ആവശ്യമായ ‘ഫ്രം അഡ്രസ്സ്’ നല്‍കാന്‍ ഡെലിവറി ബോയ് തയ്യാറായിട്ടുണ്ട്. കുണ്ടറ പോലീസ് സ്റ്റേഷനില്‍ അദ്ദേഹം പരാതി നല്‍കി.
