ന്യൂഡൽഹി: എസ്എഫ്ഐ ഡൽഹി ജില്ലാ സെക്രട്ടറി ഐഷി ഘോഷിനെ അറസ്റ്റ് ചെയ്യാനുള്ള ശ്രമവുമായി ഡൽഹി പൊലീസ് എകെജി സെന്ററിലെത്തി. എന്നാൽ പൊലീസ് നടപടിയെ സിപിഎം നേതാക്കൾ ചോദ്യം ചെയ്തതോടെ സ്ഥലത്ത് നാടകീയ രംഗങ്ങൾ അരങ്ങേറി.

രാഷ്ട്രീയ പാർട്ടികളുടെ ഓഫിസിൽ മുൻകൂർ അനുമതിയില്ലാതെ പൊലീസിന് പ്രവേശിക്കാനാകില്ലെന്ന് സിപിഎം രാജ്യസഭാംഗം ജോൺ ബ്രിട്ടാസ് എംപി പ്രതികരിച്ചു. നെയിം പ്ലേറ്റില്ലാതെയും യൂണിഫോം ധരിക്കാതെയുമാണ് പൊലീസ് എത്തിയതെന്നും ഇത് ചോദ്യം ചെയ്തപ്പോൾ മഴ കാരണം യൂണിഫോം ധരിച്ചില്ലെന്ന മറുപടിയാണ് ഉദ്യോഗസ്ഥർ നൽകിയതെന്നും അദ്ദേഹം ആരോപിച്ചു.

സിപിഎം നേതാക്കളുടെ പ്രതിഷേധത്തെ തുടർന്ന് വനിതാ പൊലീസുകാർ മടങ്ങിയെന്നാണ് വിവരം.

2021-ൽ ബംഗള ഭവന് മുന്നിൽ നടന്ന പ്രതിഷേധവുമായി ബന്ധപ്പെട്ട കേസിലാണ് ഐഷി ഘോഷിനെ അറസ്റ്റ് ചെയ്യാൻ പൊലീസ് ശ്രമിച്ചതെന്ന് എസ്എഫ്ഐ നേതാക്കൾ അറിയിച്ചു. ഈ കേസ് ജൂലൈ 30-ന് കോടതി പരിഗണിക്കാനിരിക്കെയാണ് പൊലീസിന്റെ നടപടി. സംഭവത്തിൽ കൂടുതൽ നിയമനടപടികൾക്കായി കാത്തിരിക്കുകയാണ്.

വടകര: പേരമ്പ്ര ബിആർസിയിലെ അധ്യാപികമാർ ഉൾപ്പെട്ട എംഡിഎംഎ കേസിൽ മറ്റൊരു അധ്യാപിക കൂടി അറസ്റ്റിലായി. കുട്ടോത്ത് സ്വദേശിനിയായ വലിയ പറമ്പിൽ വി.പി. നീഷ്മ (30)യെയാണ് പ്രത്യേക അന്വേഷണ സംഘം (എസ്‌ഐടി) അറസ്റ്റ് ചെയ്തത്.

നേരത്തെ അറസ്റ്റിലായ അധ്യാപികമാരായ കീർത്തനയിലും കാവ്യയിലും നിന്ന് ലഭിച്ച വിവരങ്ങളുടെ അടിസ്ഥാനത്തിലാണ് പ്രതിയെ കസ്റ്റഡിയിലെടുത്തത്. കേസിൽ കൂടുതൽ പേർ ഉൾപ്പെട്ടിട്ടുണ്ടെന്ന വിവരത്തെ തുടർന്ന് വടകര റൂറൽ എസ്.പി. പ്രത്യേക അന്വേഷണ സംഘത്തെ നിയോഗിച്ചിരുന്നു. എസ്‌ഐടിയുടെ നേതൃത്വത്തിലായിരുന്നു അറസ്റ്റ്.

ഇൻസ്റ്റഗ്രാം വഴിയാണ് പ്രതികൾ ലഹരി മാഫിയയുമായി ബന്ധം പുലർത്തിയിരുന്നതെന്നാണ് പൊലീസ് പറയുന്നത്. ആവശ്യക്കാരെ നേരിൽ കാണാതെ സാമൂഹികമാധ്യമ അക്കൗണ്ടുകൾ ഉപയോഗിച്ചാണ് ലക്ഷങ്ങൾ വിലമതിക്കുന്ന എംഡിഎംഎയുടെ ഇടപാടുകൾ നടത്തിയിരുന്നതെന്നും അന്വേഷണസംഘം വ്യക്തമാക്കി.

കേസിൽ കൂടുതൽ പ്രതികളുണ്ടോയെന്നും ലഹരി ശൃംഖലയുടെ വ്യാപ്തി എത്രത്തോളമാണെന്നും പൊലീസ് അന്വേഷണം തുടരുകയാണ്.

സംവിധായകനും നിയമസഭാ തിരഞ്ഞെടുപ്പിൽ എൻഡിഎ സ്ഥാനാർഥിയുമായിരുന്ന അഖിൽ മാരാർ ട്വന്റി 20 വിട്ടു. സാബു എം ജേക്കബുമായുള്ള അഭിപ്രായഭിന്നതയെ തുടർന്നാണ് അഖിൽ ട്വന്റി 20 വിട്ടത്. കഴിഞ്ഞ നിയമസഭാ തിരഞ്ഞെടുപ്പിൽ തൃക്കാക്കര മണ്ഡലത്തിലെ സ്ഥാനാർഥിയായിരുന്നു അഖിൽ മാരാർ.


പാർട്ടി വിട്ടതിന് പിന്നാലെ സാബു എം. ജേക്കബിനെതിരെ കടുത്ത വിമർശനമാണ് അഖിൽ ഉന്നയിച്ചത്. പാർട്ടിയിൽ പ്രവർത്തന സ്വാതന്ത്ര്യം ഇല്ലെന്നും മുന്നോട്ട് സഹകരിച്ച് പോകാൻ ആകുന്നില്ലെന്നും അഖിൽ മാരാർ പറഞ്ഞു.

തിരഞ്ഞെടുപ്പിനു ശേഷം സാബു എം.ജേക്കബ് ഫോൺ വിളിച്ചാൽ പോലും എടുക്കുന്നില്ല. കൊട്ടാരക്കര സീറ്റ്‌ ഉറപ്പ് നൽകിയാണ് തന്നെ ട്വന്റി 20 യിൽ എത്തിച്ചത്. പിന്നീട് തൃപ്പൂണിത്തുറ തരാമെന്ന് പറഞ്ഞ് വഞ്ചിച്ചു. ട്വന്റി 20 സാബുവിന്റെ വ്യക്തിപരമായ നേട്ടത്തിനു വേണ്ടി മാത്രമുള്ള പാർട്ടിയാണെന്നും അഖിൽ മാരാർ‌ പറഞ്ഞു.