തിരുവനന്തപുരം.വിഴിഞ്ഞം ഓഹരി കൈമാറ്റത്തിനായി MSC കമ്പനിയെ സ്വാഗതം ചെയ്തുകൊണ്ടുള്ള പ്രതിപക്ഷത്തിന്റെ നിലപാട് വ്യക്തമാക്കുന്ന കൂടുതൽ തെളിവുകൾ പുറത്ത്.
ഇടതു നേതാക്കൾ പങ്കെടുത്ത 2025ലെ കോൺക്ലേവിലെ ദൃശ്യങ്ങളും MSC ഓഹരി നിക്ഷേപത്തെ പുകഴ്ത്തുന്ന ദേശാഭിമാനിയുടെ പത്രത്തിന്റെ ഭാഗങ്ങളുമാണ് പുറത്തായത്.
വാണിജ്യ അടിസ്ഥാനത്തിൽ വിഴിഞ്ഞത്ത് പ്രവർത്തനമാരംഭിച്ചു കഴിഞ്ഞാൽ ഒരു വർഷത്തിനുശേഷം 25% ത്തിൽ ഒഴികെയുള്ള ഓഹരികൾ സ്വകാര്യ നിക്ഷേപത്തിലേക്ക് നൽകാമെന്നും ഉറപ്പു നൽകുന്ന തെളിവുകളും പുറത്ത് വന്നു.

വിഴിഞ്ഞം അന്താരാഷ്ട്ര തുറമുഖത്ത് കുത്തക കമ്പനികൾക്കായുള്ള കച്ചവടമാണ് നടക്കുന്നത് എന്നാണ് എൽഡിഎഫിന്റെ നിലവിലെ നിലപാട്. എന്നാൽ ഒരു വർഷം മുന്നേ ഇങ്ങനെയല്ല . അന്താരാഷ്ട്ര കമ്പനികൾക്ക് നിക്ഷേപങ്ങൾ കൊണ്ടുവരാനായി വിഴിഞ്ഞം കോൺക്ലേവ് എന്ന പേരിൽ 2025 ജനുവരി 28,29 തീയതികളിൽ തിരുവനന്തപുരത്ത് ഇൻവെസ്റ്റ്മെന്റ് മീറ്റ് തന്നെ നടത്തി. അന്നത്തെ മുഖ്യമന്ത്രി പിണറായി വിജയൻ ഉദ്ഘാടനം ചെയ്ത കോൺക്ലേവ് വ്യവസായ മന്ത്രിയായിരുന്ന പി രാജീവ് തുറമുഖ വകുപ്പ് മന്ത്രിയായിരുന്ന വി എൻ വാസവൻ പോർട്ട് എംഡിയായിരുന്ന ദിവ്യ എസ് അയ്യർ തുടങ്ങിയവർ പങ്കെടുത്തിരുന്നു.

25 ശതമാനത്തിൽ ഒഴികെയുള്ള ഓഹരി സ്വകാര്യ കമ്പനികൾക്ക് നൽകാമെന്നാണ് ദേശാഭിമാനിയും ജനയുഗവും അന്ന് പറഞ്ഞത് . കരാറിലെ വ്യവസ്ഥകൾ അംഗീകരിച്ചുകൊണ്ട് ഈ ഓഹരികൾ വിൽക്കാം എന്നും പത്രത്തിൽ അച്ചടിച്ചു വന്നു . എൽഡിഎഫ് സർക്കാർ സംഘടിപ്പിച്ച വിഴിഞ്ഞം കോൺക്ലേവിൽ എംഎസ്സിയുടെ പ്രതിനിധികളും പങ്കെടുത്തു. സ്വകാര്യ നിക്ഷേപങ്ങളെ കുറിച്ചും സ്വകാര്യ നിക്ഷേപത്തിന്റെ സാധ്യതകളെക്കുറിച്ചും ചർച്ച ചെയ്ത കോൺക്ലേവ് ആയിരുന്നു അത് . അന്ന് ഇടത് നേതാക്കൾ പതിനായിരം കോടി രൂപയുടെ നിക്ഷേപവുo ഉണ്ടാകുമെന്ന് വ്യക്തമാക്കിയിരുന്നു.വിഴിഞ്ഞത്തിന്റെ സുസ്ഥിരത ഉറപ്പാക്കാനായി എംഎസ്സി പ്രതിനിധികൾ പറഞ്ഞ വാക്കുകൾ സർക്കാർ റിലീസ് ആയിട്ടും പുറത്തുവന്നിരുന്നു. സർക്കാരുമാറി വിഴിഞ്ഞത്ത് എംഎസ്സിയുടെ നിക്ഷേപം വന്നു. വ്യവസ്ഥകൾ പ്രകാരം 49 % ഓഹരി എം എസ് സിക്ക് കൈമാറാം എന്ന ധാരണയായി . ഇടതുപക്ഷം മലക്കം മറഞ്ഞു സർക്കാർ നടത്തുന്നത് കച്ചവടം ആണെന്ന് ആരോപണവുമായി രംഗത്തെത്തിയതോടെയാണ് പ്രതിപക്ഷത്തെ പ്രതിക്കൂട്ടിൽ ആക്കുന്ന തെളിവുകൾ പുറത്തുവന്നത്.