പ്രായം കൂടുന്തോറും തലച്ചോറിന് സ്വാഭാവികമായ മാറ്റങ്ങൾ സംഭവിക്കുകയും ഓർമ്മശക്തിയിലും ശ്രദ്ധയിലുമെല്ലാം ചെറിയ തോതിൽ കുറവുണ്ടാകുകയും ചെയ്യാറുണ്ട്. എന്നാൽ നമ്മുടെ ദൈനംദിന ശീലങ്ങളും ജീവിതശൈലിയിലെ തിരഞ്ഞെടുപ്പുകളും ഓർമ്മശക്തി, ഏകാഗ്രത, തലച്ചോറിന്റെ പ്രവർത്തനം എന്നിവ സംരക്ഷിക്കുന്നതിൽ നിർണായക പങ്ക് വഹിക്കുന്നു. തലച്ചോറിന്റെ ആരോഗ്യം മെച്ചപ്പെടുത്താൻ ചെയ്യേണ്ട കാര്യങ്ങൾ ഇതാണ്.
- ശാരീരികമായി സജീവമായിരിക്കുക
പതിവായുള്ള ശാരീരിക അധ്വാനം തലച്ചോറിലേക്കുള്ള രക്തചംക്രമണം വർദ്ധിപ്പിക്കുകയും പുതിയ നാഡീബന്ധങ്ങൾ രൂപപ്പെടാൻ സഹായിക്കുകയും ചെയ്യുന്നു. വേഗത്തിലുള്ള നടപ്പ്, സൈക്ലിംഗ്, നീന്തൽ തുടങ്ങിയ വ്യായാമങ്ങൾ ദിവസവും കുറഞ്ഞത് 30 മിനിറ്റെങ്കിലും ചെയ്യുന്നത് തലച്ചോറിന്റെ കാര്യക്ഷമത നിലനിർത്തും. - പോഷകസമ്പന്നമായ ഭക്ഷണം കഴിക്കുക
തലച്ചോറിന്റെ ആരോഗ്യത്തിന് സമീകൃതമായ ആഹാരം അത്യാവശ്യമാണ്. സംസ്കരിച്ച ഭക്ഷണങ്ങൾ, അമിതമായ മധുരം, അനാരോഗ്യകരമായ കൊഴുപ്പുകൾ എന്നിവ ഒഴിവാക്കി, പോഷകഗുണമുള്ള ഭക്ഷണങ്ങൾ കഴിക്കുന്നത് മസ്തിഷ്ക പ്രവർത്തനങ്ങളെ പിന്തുണയ്ക്കും.
- ഗുണനിലവാരമുള്ള ഉറക്കം ഉറപ്പാക്കുക
തലച്ചോറിന് നന്നായി പ്രവർത്തിക്കാനും, ഓർമ്മകൾ ശേഖരിക്കാനും, മാലിന്യങ്ങൾ പുറന്തള്ളാനും കൃത്യമായ ഉറക്കം ആവശ്യമാണ്. മുതിർന്നവർ രാത്രിയിൽ 7 മുതൽ 9 മണിക്കൂർ വരെ തടസ്സമില്ലാത്ത ഉറക്കം ലഭിക്കുന്നുണ്ടെന്ന് ഉറപ്പുവരുത്തണം.
- മാനസിക വ്യായാമങ്ങളിൽ ഏർപ്പെടുക
മാനസിക ഉത്തേജനം തലച്ചോറിന്റെ ശേഷി വർദ്ധിപ്പിക്കുന്നു. വായന, പസിലുകൾ പോലുള്ള ഗെയിമുകൾ, പുതിയ കാര്യങ്ങൾ പഠിക്കൽ, സംഗീതോപകരണങ്ങൾ വായിക്കൽ തുടങ്ങിയ പ്രവർത്തനങ്ങൾ തലച്ചോറിന്റെ ആയുസ്സ് വർദ്ധിപ്പിക്കാൻ സഹായിക്കും.
- സമ്മർദ്ദം കൃത്യമായി നിയന്ത്രിക്കുക
ദീർഘകാലത്തെ വിട്ടുമാറാത്ത മാനസിക സമ്മർദ്ദം ഓർമ്മശക്തിയെയും ഏകാഗ്രതയെയും മസ്തിഷ്ക പ്രകടനത്തെയും പ്രതികൂലമായി ബാധിക്കും. വ്യായാമം, ധ്യാനം, റിലാക്സേഷൻ വിദ്യകൾ എന്നിവയിലൂടെ മാനസികസമ്മർദ്ദം അകറ്റേണ്ടത് ആവശ്യമാണ്.
- സാമൂഹികബന്ധങ്ങൾ നിലനിർത്തുക
മറ്റുള്ളവരുമായുള്ള ഇടപഴകലുകൾ തലച്ചോറിനെ ഉത്തേജിപ്പിക്കുകയും വൈകാരികമായ ആരോഗ്യം നൽകുകയും ചെയ്യുന്നു. നല്ല സംഭാഷണങ്ങളും സൗഹൃദങ്ങളും മാനസികാരോഗ്യവും പ്രതിരോധശേഷിയും മെച്ചപ്പെടുത്തും.
- രക്തസമ്മർദ്ദം, പ്രമേഹം, കൊളസ്ട്രോൾ എന്നിവ നിയന്ത്രിക്കുക
ഉയർന്ന രക്തസമ്മർദ്ദം, പ്രമേഹം, കൊളസ്ട്രോൾ എന്നിവ തലച്ചോറിലേക്ക് രക്തമെത്തിക്കുന്ന ധമനികളെ തകരാറിലാക്കുകയും, സ്ട്രോക്ക്, ഡിമെൻഷ്യ എന്നിവയ്ക്കുള്ള സാധ്യത വർദ്ധിപ്പിക്കുകയും ചെയ്യുന്നു. അതിനാൽ കൃത്യമായ ആരോഗ്യപരിശോധനകളും ചികിത്സയും ഉറപ്പാക്കുക.
- ശരീരത്തിൽ ആവശ്യത്തിന് വെള്ളമുണ്ടെന്ന് ഉറപ്പാക്കുക
ചെറിയ തോതിലുള്ള നിർജ്ജലീകരണം പോലും ഏകാഗ്രത, മൂഡ്, ഓർമ്മശക്തി എന്നിവയെ ബാധിക്കാം. തലച്ചോറിന്റെ മികച്ച പ്രവർത്തനത്തിനായി ദിവസവും ധാരാളം വെള്ളം കുടിക്കേണ്ടതുണ്ട്.
