ദുൽഖർ സൽമാൻ നായകനായി എത്തിയ ലക്കി ഭാസ്കറിന് രണ്ടാം ഭാഗം ഉണ്ടാകുമെന്ന് സ്ഥിരീകരിച്ച് സംവിധായകൻ വെങ്കി അറ്റ്ലൂരി. ദുൽഖറിന്റെ പ്രൊജക്റ്റുകൾ പൂർത്തിയായ ശേഷം ലക്കി ഭാസ്കർ ആയി വരുമെന്നും തന്നെ കാണുന്നവർ ഒക്കെ രണ്ടാം ഭാഗം എപ്പോൾ ഇറങ്ങുമെന്ന് ചോദിക്കാറുണ്ടെന്നും വെങ്കി പറഞ്ഞു. ഐ ആം ഗെയിം റിലീസിന് മുൻപ് ദുൽഖർ നൽകിയ അഭിമുഖത്തിലാണ് വെങ്കി ഇക്കാര്യം പറഞ്ഞത്. ചിത്രത്തിന്റെ രണ്ടാം ഭാഗത്തിനായുള്ള ആശയം മനസ്സിലുണ്ടെന്നും അനുയോജ്യമായ സമയത്ത് സിനിമയുമായി മുന്നോട്ടുപോകുമെന്നും സംവിധായകൻ വ്യക്തമാക്കി.
2024ൽ പുറത്തിറങ്ങിയ ‘ലക്കി ഭാസ്കർ’ വലിയ പ്രേക്ഷക സ്വീകാര്യത നേടിയിരുന്നു. ബാങ്കിങ് മേഖലയിലെ പശ്ചാത്തലത്തിൽ ഭാസ്കർ എന്ന കഥാപാത്രത്തിന്റെ ജീവിതവും സാമ്പത്തിക തട്ടിപ്പുകളുമായിരുന്നു ചിത്രത്തിന്റെ പ്രമേയം. ദുൽഖർ സൽമാന്റെ പ്രകടനത്തിനും ചിത്രത്തിന് മികച്ച പ്രതികരണമാണ് ലഭിച്ചത്.
രണ്ടാം ഭാഗത്തിൽ ദുൽഖർ സൽമാൻ തന്നെ നായകനായി എത്തുമോ എന്നതടക്കമുള്ള കൂടുതൽ വിവരങ്ങൾ ഔദ്യോഗികമായി പുറത്തുവിട്ടിട്ടില്ല. സംവിധായകന്റെ സ്ഥിരീകരണത്തോടെ ‘ലക്കി ഭാസ്കർ 2’നായി കാത്തിരിക്കുകയാണ് ആരാധകർ.
