ന്യൂഡൽഹി: അധോലോക കുറ്റവാളി ദാവൂദ് ഇബ്രാഹിമിനും ഡി കമ്പനിക്കുമെതിരേ നീക്കം ശക്തമാക്കി ദേശീയ അന്വേഷണ ഏജൻസി.
ദാവൂദ് ഇബ്രാഹിമിനെപ്പറ്റി വിവരം നൽകുന്നവർക്ക് 25 ലക്ഷം രൂപ പാരിതോഷികം എൻഐഎ പ്രഖ്യാപിച്ചു.
ദാവൂദിൻറെ അടുത്ത അനുയായി ഛോട്ടാ ഷക്കീലിനെ കുറിച്ച്‌ വിവരം നൽകിയാൽ 20 ലക്ഷം രൂപയും സംഘത്തിൽപ്പെട്ട അനീസ് ഇബ്രാഹിം, ജാവേദ് പട്ടേൽ, ഇബ്രാഹിം മുഷ്താഖ്, അബ്ദുൾ റസാഖ് മേമൻ എന്നിവരെ പറ്റി വിവരം നൽകിയാൽ 15 ലക്ഷം വീതവും പാരിതോഷികം നൽകുമെന്ന് എൻഐഎ അറിയിച്ചു.
അന്താരാഷ്ട്ര ഭീകര ശൃംഖലയായ ഡി കമ്പനി നിരവധി ക്രിമിനൽ പ്രവർത്തനങ്ങളാണ് നടത്തിവരുന്നത്. വ്യാജ ഇന്ത്യൻ കറൻസി നിർമാണം, ആയുധക്കടത്ത്, മയക്കുമരുന്ന് കടത്ത് തുടങ്ങിയ കുറ്റകൃത്യങ്ങളിൽ ഡി കമ്പനി ഉൾപ്പെട്ടിട്ടുണ്ട്.
1993ലെ മുംബൈ സ്ഫോടന പരമ്പരകളുടെ ആസൂത്രകനും ദാവുദ് ഇബ്രാഹിമായിരുന്നു. നേരത്തെ ദാവൂദ് ഇബ്രാഹിമിനെ ഐക്യരാഷ്ട്രസഭ ആഗോള ഭീകരനായി പ്രഖ്യാപിച്ചിരുന്നു.
