തിരുവനന്തപുരം: എഡിജിപി എം.ആര്.അജിത് കുമാറിനെ സസ്പെന്ഡ് ചെയ്ത് സര്ക്കാര്. ആലപ്പുഴയിലെ ‘രക്ഷാപ്രവര്ത്തന’ കേസ് അട്ടിമറിക്കാന് ശ്രമിച്ചുവെന്ന പരാതിയുമായി ബന്ധപ്പെട്ട് സംസ്ഥാന പൊലീസ് മേധാവി നല്കിയ റിപ്പോര്ട്ട് പരിഗണിച്ചാണ് സര്ക്കാര് നടപടി. കേസ് സംബന്ധിച്ച പ്രത്യേക അന്വേഷണ സംഘത്തിന്റെ (എസ്ഐടി) റിപ്പോര്ട്ട് തുടര്നടപടിക്കായി ഡിജിപി റാവാഡ എ.ചന്ദ്രശേഖര് കഴിഞ്ഞ ദിവസമാണ് ആഭ്യന്തര വകുപ്പിനു കൈമാറിയത്. തുടര്ന്ന് ആഭ്യന്തര സെക്രട്ടറി വഴി റിപ്പോര്ട്ട് ആഭ്യന്തര മന്ത്രി രമേശ് ചെന്നിത്തലയുടെ മുന്നിലെത്തി. മുഖ്യമന്ത്രിയും ആഭ്യന്തരമന്ത്രിയും തമ്മില് ചര്ച്ച നടത്തിയ ശേഷമാണ് സസ്പെഷന് സംബന്ധിച്ച് അന്തിമ തീരുമാനമെടുത്തത്.
പിണറായി വിജയന് മുഖ്യമന്ത്രിയായിരിക്കെ കെഎസ്യു, യൂത്ത് കോണ്ഗ്രസ് നേതാക്കളെ അദ്ദേഹത്തിന്റെ സുരക്ഷാസംഘം തല്ലിച്ചതച്ചതുമായി ബന്ധപ്പെട്ട കേസ് അട്ടിമറിക്കാന് അജിത്കുമാര് ഇടപെട്ടെന്ന് എസ്ഐടി കണ്ടെത്തിയ സാഹചര്യത്തിലാണ് സര്ക്കാര് കടുത്ത നടപടിയിലേക്കു കടന്നത്. അഗ്നിരക്ഷാസേനാ മേധാവി നിതിന് അഗര്വാള് ഈ മാസം 31ന് വിരമിക്കുമ്പോള് അജിത്കുമാറിന് ഡിജിപി പദവി ലഭിക്കുമെന്ന് റിപ്പോര്ട്ടുണ്ടായിരുന്നു.
