ശാസ്താംകോട്ട : സ്നേഹത്തിന്റെയും തിരുപ്പിറവിയുടെയും സന്ദേശം പകർന്നു നൽകുന്ന ഈ ക്രിസ്മസ് കാലം ബിഷപ്പ് ജെറോം അഭയകേന്ദ്രത്തിലെ അശരണരും മാനസികരോഗികളുമായ അന്തേവാസികൾക്കൊപ്പമാണ് ബ്രൂക്ക് ഇന്റർനാഷണൽ സ്കൂളിലെ കുട്ടികൾ ആഘോഷിച്ചത്. ശരിക്കും ക്രിസ്മസ് ലോകത്തിന് പകർന്നു നൽകിയ ദാനധർമ്മങ്ങളുടെ മഹത്വത്തെ ഉദ്ഘോഷിക്കുന്നതായിരുന്നു ബ്രൂക്കിന്റെ ആഘോഷങ്ങളെല്ലാം.
കുട്ടികളും മാനേജ്മെന്റും ചേർന്ന് പിരിച്ച ഒരു ലക്ഷം രൂപ കുട്ടികൾ അഭയകേന്ദ്രത്തിലെ അന്തേവാസികൾക്കായി സമർപ്പിച്ചു. പഠനത്തോടൊപ്പം ദാന ധർമ്മങ്ങളുടെയും സഹജീവിസ്നേഹത്തിന്റെയും ഉദാത്ത മാതൃകകളെ ലോകത്തിനു പകർന്നു കൊടുക്കാൻ ബ്രൂക്കിലെ കുട്ടികൾക്ക് ഇനിയും കഴിയട്ടെ എന്ന് ആഘോഷ ചടങ്ങുകളുടെഉദ്ഘാടനം നിർവഹിച്ചുകൊണ്ട് ബ്രൂക്ക് ഡയറക്ടർ ഫാ. ഡോ. ജി അബ്രഹാം തലോത്തിൽ ക്രിസ്മസ് സന്ദേശം നൽകി.തുടർന്ന് കരോൾ ഗാനങ്ങളുടെ സ്നേഹസാന്ത്വനവും അന്തേവാസികൾക്കായി പകർന്നു കൊടുത്താണ് കുട്ടികൾ മടങ്ങിയത്.
