തൃശൂര്: വസ്ത്ര വ്യാപാരിയുടെ വീട് കുത്തിത്തുറന്ന് 50 പവന് കവര്ച്ച നടത്തിയ സംഭവത്തില് രണ്ട് സ്ത്രീകള് ഉള്പ്പെടെ മൂന്നുപേര് അറസ്റ്റില്. തൃശൂര് തോളൂരില് ആണ് സംഭവം. പീച്ചി പാണഞ്ചേരി പുളിക്കല് സന്തോഷ് (കല്ക്കി, 44), മണലൂര് എങ്ങണ്ടി വീട്ടില് സജിത(46), ശ്രീനാരായണപുരം കോതപറമ്പ് കാരിയെഴുത്ത് അഖില (35) എന്നിവരാണ് പിടിയിലായത്. പറപ്പൂര് സെന്ററില് തുണിക്കട നടത്തുന്ന നാലകത്ത് സക്കീറിന്റെ വീട്ടില് 20നാണ് മോഷണം നടന്നത്.
മകളുടെ കല്യാണ ആവശ്യങ്ങള്ക്കും മറ്റുമായി സൂക്ഷിച്ചുവച്ച ആഭരണങ്ങളാണ് കവര്ച്ച ചെയ്തത്. ഓണക്കാലമായതിനാല് കടയടക്കാന് വൈകിയ വീട്ടുടമ രാത്രി ഒരു മണിക്ക് വീട്ടില് എത്തിയപ്പോഴാണ് മോഷണ വിവരം അറിയുന്നത്. തുടര്ന്ന് പൊലീസ് നടത്തിയ അന്വേഷണത്തിലാണ് സംഘത്തിലെ പ്രധാനിയായ സന്തോഷിനെ വലപ്പാട് ബീച്ച് പരിസരത്തു നിന്ന് പിടികൂടിയത്.
ഇയാള് ജില്ലയിലും പുറത്തും ഒട്ടനവധി മോഷണക്കേസുകളിലെ പ്രതിയാണെന്നും കര്ണാടകയിലെ സ്വര്ണക്കൊള്ള കേസിലും ഇയാള്ക്ക് ബന്ധമുണ്ടെന്നും പൊലീസ് പറഞ്ഞു. മോഷണ മുതലുകള് വില്ക്കുന്നത് ഉള്പ്പെടെയുള്ള കാര്യങ്ങള്ക്കായി പ്രതിയെ സഹായിച്ച കുറ്റത്തിനാണ് മറ്റു രണ്ട് പേരെ അറസ്റ്റ് ചെയ്തത്. ഇനി ഒരാളെ കൂടി പിടികൂടാനുണ്ടെന്ന് പൊലീസ് അറിയിച്ചു.
