ദിവസത്തില്‍ ഒരു തവണയെങ്കിലും നാരങ്ങാവെള്ളം കുടിക്കാം. വെറുതെ പറയുന്നതല്ല, ഗുണങ്ങള്‍ ഏറെയാണ്. വിശപ്പും ദാഹവും എല്ലാം അകറ്റാന്‍ ഈ പാനീയത്തിനാകും. മാത്രമല്ല ആരോഗ്യവും സൗഖ്യവും പകരാനും നാരങ്ങാവെള്ളം സഹായിക്കും. വൈറ്റമിന്‍ സി യും ആന്റിഓക്‌സിഡന്റുകളും ധാരാളമടങ്ങിയ നാരങ്ങയില്‍ ഫോളേറ്റ്, പൊട്ടാസ്യം, ബി വൈറ്റമിനുകളും ആവോളമുണ്ട്. ഊര്‍ജമേകുന്നതോടൊപ്പം തന്നെ ഇവയെല്ലാം ഫിറ്റ്‌നെസ് നിലനിര്‍ത്താനും സഹായിക്കും. നാരങ്ങാവെള്ളം കുടിച്ചാല്‍ ലഭിക്കുന്ന ചില ഗുണങ്ങള്‍ താഴെപ്പറയുന്നവയാണ്:

ആന്റി ഓക്‌സിഡന്റുകള്‍
നാരങ്ങ പോലുള്ള സിട്രസ് പഴങ്ങളില്‍ ആന്റി ഓക്‌സിഡന്റായ വൈറ്റമിന്‍ സി ധാരാളം അടങ്ങിയിട്ടുണ്ട്. ഇത് ശരീരകോശങ്ങളെ ഫ്രീറാഡിക്കലുകളില്‍ നിന്ന് സംരക്ഷിക്കുന്നു. ശരീരത്തില്‍ ഇന്‍ഫ്‌ലമേഷന്‍ ഉണ്ടാക്കുകയും കാന്‍സര്‍, ടൈപ്പ് 2 പ്രമേഹം, വൃക്കത്തകരാര്‍, കരള്‍ രോഗങ്ങള്‍ തുടങ്ങിയവയ്ക്ക് കാരണമാകുകയും ചെയ്യുന്ന തന്മാത്രകളാണ് ഫ്രീറാഡിക്കലുകള്‍. കൂടാതെ വൈറ്റമിന്‍ സി പ്രോട്ടീന്റെ ഉപാപചയ പ്രവര്‍ത്തനത്തിലും അരുണ രക്താണുക്കളുടെ ഉല്‍പാദനത്തില്‍ അയണിന്റെ ആഗിരണത്തിനും ഹോര്‍മോണുകളുടെ ഉല്‍പാദനത്തിനും പ്രധാന പങ്കുവഹിക്കുന്നു.

ശരീരഭാരം കുറയ്ക്കും
ശരീരത്തിലെ ജലാംശം കൂട്ടുന്നതുകൊണ്ടു തന്നെ ശരീരഭാരം കുറയാന്‍ സഹായിക്കും.

വൃക്കയില്‍ കല്ല് വരാതെ തടയുന്നു
വൃക്കയിലെ കല്ലിന്റെ രൂപീകരണം നാരങ്ങയിലടങ്ങിയ സിട്രിക് ആസിഡ് തടയുന്നു. സിട്രിക് ആസിഡിലെ ഒരു ഘടകമാണ് സിട്രേറ്റ്. ഇത് മൂത്രത്തിലെ അമ്ലഗുണം കുറക്കും. കൂടാതെ ചെറിയ കല്ലുകളെ ഇത് വിഘടിപ്പിക്കാനും സഹായിക്കും. ഒരു ഗ്ലാസ് വെള്ളത്തില്‍ ഒരു ടീസ്പൂണ്‍ നാരങ്ങാനീര് ചേര്‍ത്ത് കുടിക്കുന്നത് വൃക്കയില്‍ കല്ല് വരാതെ തടയും.

പല്ലുകളുടെ ആരോഗ്യം മെച്ചപ്പെടുത്തും
പായ്ക്കറ്റില്‍ ലഭ്യമായ മറ്റ് ജ്യൂസുകളിലും സോഡകളിലുമെല്ലാം ധാരാളംം പഞ്ചസാര അടങ്ങിയിട്ടുണ്ട്. അതിനാല്‍ ഇവ കുടിക്കുന്നത് പല്ലുകളുടെ ആരോഗ്യം നശിപ്പിക്കും. മറ്റ് അഡിറ്റീവുകള്‍ ഒന്നും അടങ്ങിയിട്ടില്ലാത്ത വളരെ നാച്വറല്‍ ആയ പാനീയമാണ് നാരങ്ങാവെള്ളം. ദാഹമകറ്റുന്നതിനോടൊപ്പം ഊര്‍ജമേകുകയും ദന്താരോഗ്യവും വായയുടെ ആരോഗ്യവും നിലനിര്‍ത്തുകയും ചെയ്യും.

ദഹനത്തെ എളുപ്പമാക്കും
ഭക്ഷണത്തിന് മുന്‍പ് ഒരു ഗ്ലാസ് നാരങ്ങാവെള്ളം കുടിക്കുന്നത് ദഹനത്തെ എളുപ്പമാക്കും. നാരങ്ങയ്ക്ക് ഉദരത്തില്‍ ഉല്‍പാദിപ്പിക്കപ്പെടുന്ന ഒരു ഡൈജസറ്റീവ് ഫ്‌ലൂയ്ഡ് ആയ ഗ്യാസ്ട്രിക് ആസിഡിന്റെ ഉല്‍പാദനം കൂട്ടാന്‍ കഴിയും. ഭക്ഷണത്തെ വിഘടിപ്പിക്കാനും ദഹിപ്പിക്കാനും സഹായിക്കുന്നത് ഈ ആസിഡ് ആണ്. ദഹനപ്രശ്‌നങ്ങളായ ആസിഡ് റിഫ്‌ലക്‌സ് അകറ്റാനും മലബന്ധമകറ്റാനും നാരങ്ങാവെള്ളം കുടിക്കുന്നതിലൂടെ കഴിയും.

പലരെയും അലട്ടുന്ന ഒരു പ്രശ്‌നമാണ് നെഞ്ചെരിച്ചല്‍. പ്രായഭേദമന്യേ എല്ലാവരെയും ഇത് ബുദ്ധിമുട്ടിക്കാറുണ്ട്. നമ്മുടെ ഭക്ഷണ ശീലങ്ങളില്‍ ചെറിയ ഒരു ശ്രദ്ധ വരുത്തിയാല്‍ നെഞ്ചെരിച്ചലിന് പരിഹാരം കാണാനാകുമെന്നാണ് ആരോഗ്യവിദഗ്ധര്‍ പറയുന്നത്.
ആമാശയത്തിലെ ആസിഡ് തൊണ്ടയിലേക്ക് തികട്ടി വരുന്നതുമൂലം നെഞ്ചിലുണ്ടാകുന്ന പുകച്ചിലാണ് നെഞ്ചെരിച്ചലിന് കാരണം. തുടര്‍ച്ചയായി ഈ പ്രശ്‌നമുണ്ടാകുമ്പോള്‍ അതിനെ ഗ്യാസ്‌ട്രോ-ഈസോഫാഗല്‍ റിഫ്‌ലക്‌സ് ഡിസീസ് എന്ന് വിളിക്കും. ഭക്ഷണ സാധനങ്ങളില്‍ അടങ്ങിയിരിക്കുന്ന ഘടകങ്ങള്‍ മാത്രമല്ല മാനസിക സമ്മര്‍ദം പോലും നെഞ്ചെരിച്ചലിന് കാരണമാകാറുണ്ട്.
നെഞ്ചെരിച്ചിലിന്റെ ലക്ഷണങ്ങള്‍ അനുഭവപ്പെടുന്നത് പലപ്പോഴും ഭക്ഷണം കഴിച്ചതിന് ശേഷമാണ്. നെഞ്ചെരിച്ചില്‍, നെഞ്ചില്‍ അനുഭവപ്പെടുന്ന പുകച്ചില്‍, വായില്‍ പുളിയോ കയ്‌പ്പോ അനുഭവപ്പെടുന്നത്, വയറുവീര്‍ക്കുന്നത്, ഏമ്പക്കം എന്നിങ്ങനെ പോകുന്നു ലക്ഷണങ്ങള്‍. രാവിലെ ഉണ്ടാകുന്ന ശബ്ദമടപ്പ്, തൊണ്ടവേദന, തൊണ്ടയില്‍ എന്തോ കുടുങ്ങിയതുപോലെയുള്ള തോന്നല്‍ എന്നിവയും നെഞ്ചെരിച്ചിലിന്റെ ലക്ഷണങ്ങളില്‍പ്പെടും.
ഇന്ന് പലരും രാത്രി ഏറെ വൈകിയും ഭക്ഷണം കഴിക്കുന്നവരാണ്. അതൊരു ശീലമായി മാറി. ആളുകളുടെ ജോലിസമയവും എളുപ്പത്തില്‍ ലഭ്യമാകുന്ന ഇന്‍സ്റ്റന്റ് ഭക്ഷണങ്ങളും മൂലം രാത്രി പത്തിന് ശേഷമാണ് പലരും ഡിന്നര്‍ കഴിക്കുന്നത്. ഈ ശീലം ദഹനവ്യവസ്ഥയ്ക്ക് പണി തരുമെന്ന് മുന്നറിയിപ്പ് തരുകയാണ് വിദഗ്ധര്‍.
ദഹനത്തെ മാത്രമല്ല ഹൃദയസംബന്ധമായ പ്രശ്‌നങ്ങള്‍ക്കും ഈ ശീലം കാരണമായേക്കും. ഉറങ്ങുന്നതിന് തൊട്ടുമുമ്പ് ഭക്ഷണം കഴിക്കുന്നത് നന്നല്ല. ശരീരം വിശ്രമിക്കാന്‍ തയ്യാറെടുക്കുമ്പോഴാണ് വയറിങ്ങനെ നിറഞ്ഞിരിക്കുന്നത് എന്നോര്‍ക്കണം. ഉറങ്ങാന്‍ കിടക്കുമ്പോള്‍ വയറും അന്നനാളവും ഒരേ തലത്തില്‍ വരികയും ഇത് ആസിഡ് മുകളിലേക്ക് വരുന്നതിന് കാരണമാകുകയും ചെയ്യും. തുടര്‍ച്ചയായ നെഞ്ചെരിച്ചില്‍, തൊണ്ടയില്‍ അസ്വസ്ഥത എന്നിവയിലേക്ക് ഇത് നയിക്കും.
ഉറക്കത്തേയും രാത്രി വൈകിയുള്ള ഈ ഭക്ഷണം കഴിക്കല്‍ പ്രതികൂലമായി ബാധിച്ചേക്കും. ഭക്ഷണം കഴിച്ച ഉടന്‍ ഉറങ്ങുന്നതുമൂലം കുടലില്‍ അസ്വസ്ഥതയുണ്ടാകും. ഇത് ഉറക്കം നഷ്ടപ്പെടുത്തും, നിങ്ങളെ ക്ഷീണിതരാക്കും. രാത്രിയിലെ ശീലങ്ങളില്‍ ചെറിയ മാറ്റങ്ങള്‍ വരുത്തുന്നത് ആരോഗ്യത്തില്‍ വലിയ ഗുണം ചെയ്യും. നേരത്തെ അത്താഴം കഴിക്കുന്നത് ഒരു ശീലമാക്കാം. കൊഴുപ്പും എണ്ണമയവുമുള്ള ഭക്ഷണങ്ങള്‍ ഒഴിവാക്കുന്നതും പതിവായി കഴിക്കാതെ ഇരിക്കുന്നതും നല്ലതാണ്.