തിരുവനന്തപുരം: മുൻഗണന (ബി.പി.എൽ) റേഷൻ കാർഡ് അനുവദിക്കുന്നതിനുള്ള മാനദണ്ഡങ്ങളിൽ ഇളവ് വരുത്തുന്നത് സർക്കാർ പരിഗണിക്കുന്നു. 1100 ചതുരശ്ര അടി വരെ വിസ്തീർണമുള്ള വീടുകളും 800 സി.സി വരെ എൻജിൻ ശേഷിയുള്ള കാറുകളും മുൻഗണന റേഷൻ കാർഡ് ലഭിക്കാൻ തടസ്സമാകാതിരിക്കാനുള്ള നിർദേശമാണ് ധനകാര്യവകുപ്പിന്റെ പരിഗണനയിലുള്ളത്.
നിലവിൽ 2018-ലെ സംസ്ഥാന ഭക്ഷ്യസുരക്ഷാ ചട്ടപ്രകാരം 1000 ചതുരശ്ര അടി വരെയാണ് വീടിന്റെ പരിധി. കൂടാതെ, സ്വയം ഓടിക്കുന്ന ടാക്സി ഒഴികെയുള്ള നാലോ അതിലധികമോ ചക്രങ്ങളുള്ള വാഹനങ്ങളുടെ ഉടമകൾക്കും മുൻഗണന കാർഡിന് അർഹതയില്ല.
ഇപ്പോൾ നാലുചക്ര വാഹനം ആഡംബരമല്ലെന്ന സാമൂഹിക സാഹചര്യവും ഭിന്നശേഷിക്കാരായ അംഗങ്ങളുടെ യാത്രാസൗകര്യം ഉൾപ്പെടെയുള്ള ആവശ്യങ്ങളും പരിഗണിച്ചാണ് 800 സി.സി വരെയുള്ള വാഹനങ്ങൾക്ക് ഇളവ് നൽകുന്നത് ആലോചിക്കുന്നത്. ഒരേക്കറിലധികം ഭൂമിയുള്ളവരുടെ കാര്യത്തിലും ഭൂമിയുടെ സ്വഭാവം പരിഗണിച്ച് തീരുമാനമെടുക്കാനാണ് നിർദേശം.
മാനദണ്ഡങ്ങളിൽ ഇളവ് വേണമെന്ന വ്യാപക ആവശ്യത്തെ തുടർന്ന് ഭക്ഷ്യമന്ത്രി അനൂപ് ജേക്കബ് സിവിൽ സപ്ലൈസ് കമ്മീഷണറോട് റിപ്പോർട്ട് തേടിയിരുന്നു. ഈ റിപ്പോർട്ടാണ് ഇപ്പോൾ ധനകാര്യവകുപ്പിന്റെ പരിശോധനയിലുള്ളത്. മറ്റ് സർക്കാർ ആനുകൂല്യങ്ങളുമായി മുൻഗണന റേഷൻ കാർഡ് ബന്ധപ്പെട്ടു കിടക്കുന്നതിനാൽ ധനവകുപ്പിന്റെ അനുമതിക്ക് ശേഷമായിരിക്കും സർക്കാർ അന്തിമ തീരുമാനം എടുക്കുക.
സംസ്ഥാനത്ത് നിലവിൽ 5,94,209 അന്ത്യോദയ അന്നയോജന (AAY) കാർഡുകളും 37,73,184 മുൻഗണന വിഭാഗം കാർഡുകളും നിലവിലുണ്ട്. നൂറുദിന കർമപരിപാടിയുടെ ഭാഗമായി പുതുതായി 73,024 മുൻഗണന കാർഡുകൾ കൂടി അനുവദിച്ചിട്ടുണ്ടെന്നും ഇവർക്ക് അടുത്ത മാസം മുതൽ സൗജന്യ റേഷൻ ലഭ്യമാകുമെന്നും സർക്കാർ അറിയിച്ചു.

അഞ്ചൽ: ഓടിക്കൊണ്ടിരുന്ന ടോറസ് ലോറിയുടെ ടയർ ഊരിത്തെറിച്ച് വീട്ടിലേക്ക് പാഞ്ഞുകയറി ഉറങ്ങിക്കിടന്ന കുഞ്ഞിന് പരിക്കേറ്റു. തിരുവനന്തപുരം–ചെങ്കോട്ട അന്തർസംസ്ഥാന പാതയിൽ കുളത്തൂപ്പുഴ മൈലമൂട് ക്ഷേത്രത്തിന് സമീപം ചൊവ്വാഴ്ച രാത്രി 11.30ഓടെയായിരുന്നു അപകടം.
തമിഴ്നാട്ടിൽ നിന്ന് നിർമാണ സാമഗ്രികൾ ശേഖരിക്കാൻ പോയ ടോറസ് ലോറിയുടെ പിൻവശത്തെ ടയറുകളിലൊന്നാണ് യാത്രയ്ക്കിടെ ഇളകിത്തെറിച്ചത്. നിയന്ത്രണം വിട്ട ടയർ പാതയോരത്തെ നസീം മൻസിലിൽ അബ്ദുൽ സലാമിന്റെ വീട്ടിലേക്ക് ഉരുണ്ടുകയറുകയായിരുന്നു.
അബ്ദുൽ സലാമിന്റെ ഭാര്യയും മകന്റെ കുഞ്ഞും ഉറങ്ങിക്കിടന്നിരുന്ന കിടപ്പുമുറിയുടെ ജനലിൽ ടയർ ശക്തമായി ഇടിച്ചു. ഇടിയുടെ ആഘാതത്തിൽ ജനൽച്ചില്ലുകൾ തകർന്നുവീണ് കുഞ്ഞിന്റെ ദേഹത്ത് പതിച്ചതോടെയാണ് പരിക്കേറ്റത്.
പരിക്കേറ്റ കുഞ്ഞിനെ ഉടൻ കുളത്തൂപ്പുഴയിലെ സ്വകാര്യ ആശുപത്രിയിൽ പ്രവേശിപ്പിച്ച് ചികിത്സ നൽകി. പരിക്ക് ഗുരുതരമല്ലെന്ന് ആശുപത്രി അധികൃതർ അറിയിച്ചു.
അതേസമയം, ടയർ നഷ്ടപ്പെട്ട ലോറി 100 മീറ്ററിലധികം മുന്നോട്ട് നീങ്ങിയ ശേഷമാണ് ഡ്രൈവർ നിയന്ത്രണവിധേയമാക്കി നിർത്തിയത്. വിവരമറിഞ്ഞെത്തിയ കുളത്തൂപ്പുഴ പൊലീസ് മേൽനടപടികൾ സ്വീകരിച്ചു. തുടർന്ന് നഷ്ടപരിഹാരം നൽകി വിഷയം ഒത്തുതീർപ്പാക്കിയതായി പൊലീസ് അറിയിച്ചു.

കാണാതായ മലപ്പുറം സ്വദേശി വ്ലോഗർ ദിൽഷാദിനെ കണ്ടെത്തി. മേഘാലയില്‍ നിന്നാണ് കണ്ടെത്തിയത്. ബൈക്ക് അപകടത്തില്‍ പെട്ട് മേഘാലയയിലെ ആശുപത്രിയില്‍ ചികിത്സയിലാണ് ദില്‍ഷാദ്. ആരോഗ്യനില മെച്ചപ്പെടുന്ന സാഹചര്യത്തിൽ നാട്ടിലെത്തിക്കും. വനമേഖലയോട് ചേർന്ന ഭാഗത്ത് നിന്നാണ് കണ്ടെത്തിയത്.

‘യാത്ര ടുഡേ’ എന്ന യൂട്യൂബ് ചാനലിന്റെ ഉടമയാണ് ഇദ്ദേഹം. മലപ്പുറം ചെലേമ്പ്ര സ്വദേശിയായ ദില്‍ഷാദ് ഈ മാസം ആറിനാണ് വീട്ടില്‍ നിന്നും യാത്ര പോയത്. 22ാം തീയതി വരെ സോഷ്യല്‍ മീഡിയയില്‍ സജീവമായിരുന്നു. തുടർന്ന് യാതൊരു വിവരവുമില്ലെല്ലാത്തതിനെ തുടർന്ന് കുടുംബം തേഞ്ഞിപ്പലം പോലീസില്‍ പരാതി നല്‍ക്കുകയായിരുന്നു.

തിരുവനന്തപുരം: സംസ്ഥാനത്തെ സ്കൂളുകളില്‍ ഓണാവധി ആഗസ്ത് 22 മുതല്‍ 30 വരെ. ഒമ്പത് ദിവസം മാത്രമാണ് ഓണാവധി നൽകിയിരിക്കുന്നത്. 31ന് സ്കൂള്‍ തുറക്കുമെന്ന് വിദ്യാഭ്യാസ വകുപ്പ് അറിയിച്ചു. ആഗസ്ത് 14 മുതൽ 20 വരെ ഓണപരീക്ഷകള്‍ നടക്കും. 21നാണ് ഓണാഷോഷം. പരീക്ഷ നടക്കുന്ന ഏതെങ്കിലും ദിവസം അവധി വന്നാൽ ആ പരീക്ഷ 21ന് നടത്താൻ നിർദേശമുണ്ട്. എൽപി, യുപി, ഹൈസ്കൂൾ വിദ്യാർഥികൾക്ക് 13ന് പരീക്ഷ ആരംഭിക്കും.