എം.ഡി.എം.എ കടത്തിക്കൊണ്ടുവരവേ പോലീസ് പിടിയിലായ യുവാവിനെ ഏഴുവര്‍ഷം കഠിന തടവിനും അമ്പതിനായിരം രൂപ പിഴയും ശിക്ഷ വിധിച്ചു. ഇരവിപുരം തേജസ് നഗര്‍ 123 വയലില്‍ വീട്ടില്‍ ഉമര്‍ മുക്തര്‍ (25) നെ ആണ് ജില്ലാ അഡിഷണല്‍ സെഷന്‍സ് കോടതി ശിക്ഷിച്ചത് . 2022 ഓഗസ്റ്റില്‍ കൊല്ലം നഗരത്തിലെ യുവതീ യുവാക്കള്‍ക്ക് വില്പന നടത്താനായി കടത്തിക്കൊണ്ടുവന്ന 6.79 ഗ്രാം എംഡി എംഎയുമായി
അമൃത കുളത്തിന് സമീപത്ത് നിന്നാണ് ഇരവിപുരം പോലീസും ഡാന്‍സാഫ് ടീമും
ചേര്‍ന്ന് ഇയാളെ പിടികൂടിയത്. ഇരവിപുരം സബ് ഇന്‍സ്‌പെക്ടറായിരുന്ന ജയേഷിന്റെ
നേതൃത്വത്തില്‍ കേസ് രജിസ്റ്റര്‍ ചെയ്ത് എസ് ഐ അരുണ്‍ഷാ അന്വേഷണം പൂര്‍ത്തിയാക്കി
കുറ്റപത്രം സമര്‍പ്പിച്ച കേസിലാണ് ജില്ലാ അഡീഷണല്‍ സെഷന്‍സ് കോര്‍ട്ട് 4 ജഡ്ജി
ഹരിപ്രിയ പി നമ്പ്യാര്‍ വിധി പ്രസ്താവിച്ചത്. ജില്ലാ പോലീസ് മേധാവി ഹേമലത എം
ഐ.പി.എസ് ന്റെ മേല്‍നോട്ടത്തില്‍ നിയമ വൈദഗ്ദ്ധ്യമുള്ള പോലീസ് ഉദ്യോഗസ്ഥരുടെ
ശ്രമഫലമായാണ് കുറഞ്ഞ സമയത്തിനുള്ളില്‍ കുറ്റപത്രം സമര്‍പ്പിച്ച് പ്രതിക്ക് ശിക്ഷ ഉറപ്പാക്കാന്‍
കഴിഞ്ഞത്. സ്‌പെഷ്യല്‍ പബ്ലിക് പ്രോസിക്യൂട്ടര്‍ അഡ്വക്കേറ്റ് അനൂപ് ബി പ്രോസിക്യൂഷന് വേണ്ടി
ഹാജരായി. ഇരവിപുരം എസ്.ഐ സുനില്‍ കുറ്റപത്രം തയ്യാറാക്കാനും എ എസ്.ഐ
മനോരതന്‍പിള്ള പ്രോസിക്യൂഷന് സഹായിയായും പ്രവര്‍ത്തിച്ചു.
