ഇന്ന് മാത്രം വിവിധ ജില്ലകളില് നടന്ന നാല് വാഹനാപകടങ്ങളിലായി ഏഴ് പേരുടെ ജീവനാണ് റോഡില് പൊലിഞ്ഞത്. മലപ്പുറത്ത് ദേശീയപാതയില് കാറും ലോറിയും കൂട്ടിയിടിച്ചുണ്ടായ അപകടത്തില് പെരുവള്ളൂര് സ്വദേശികളായ ആരിഫ്, ജംഷീര് എന്നിവരാണ് മരിച്ചത്. കോഴിക്കോട്-തൃശൂര് ദേശീയപാതയില് ഇടിമുഴിക്കലില് വെളുപ്പിന് മൂന്നു മണിയോടെയാണ് അപകടം നടന്നത്. കണ്ണൂര് ഭാഗത്ത് നിന്ന് ചെങ്കല് കയറ്റിവന്ന ലോറിയും കോഴിക്കോട് ഭാഗത്ത് നിന്നും വന്ന കാറും തമ്മില് കൂട്ടിയിടിക്കുകയായിരുന്നു.
കുന്നംകുളത്ത് ബൈക്കില് കാറിടിച്ച് മൂന്നു വയസ്സുള്ള കുട്ടി ഉള്പ്പെടെ ബൈക്ക് യാത്രികരായ മൂന്ന് പേരാണ് മരിച്ചത്. എടക്കഴിയൂര് ഖാദരിയ്യ പള്ളിക്കുസമീപം താഴത്തുവീട്ടില് മുനീര് (33), ഭാര്യ ഷിഫ്ന (26), മകള് എമില് ഐബക്ക് (3) എന്നിവരാണ് മരിച്ചത്. മലപ്പുറം വണ്ടൂരില് പുലര്ച്ചെ മൂന്നിനുണ്ടായ ബൈക്ക് അപകടത്തില് യുവാവ് മരിച്ചു. ഉപ്പട ഉദിരംകുളം മങ്ങാട്ടുതൊടിക പ്രജീഷ് (31) ആണ് മരിച്ചത്. ഗുരുവായൂരിലെ ജോലി സ്ഥലത്തുനിന്നും നാട്ടിലേക്ക് ബൈക്കില് മടങ്ങുമ്പോഴാണ് അപകടം. പുനലൂര്-മൂവാറ്റുപുഴ പാതയില് കാര് വൈദ്യുതി പോസ്റ്റില് ഇടിച്ച് യുവതി മരിച്ചു. കന്യാകുമാരി സ്വദേശി സുമി കാര്ത്തിക(35) ആണ് മരിച്ചത്. എറണാകുളത്ത് വിനോദയാത്ര പോയി മടങ്ങുമ്പോഴാണ് അപകടം.