പൊള്ളാച്ചി-വാല്പ്പാറ റോഡിലെ 13-ാം ഹെയര്പിന് വളവില് മിനിവാന് കൊക്കയിലേക്ക് മറിഞ്ഞ് മരിച്ച മലയാളികള് മലപ്പുറത്തുനിന്ന് വിനോദയാത്രയ്ക്കെത്തിയ അധ്യാപക സംഘം. മരിച്ചവരില് ഏഴ് സ്ത്രീകളും ഒരു പുരുഷനും ഉള്പ്പെടുന്നു. മലപ്പുറം പാങ് ചേണ്ടി പാറമ്മല് എല്പി സ്കൂളിലെ അധ്യാപകരാണ് അപകടത്തില്പ്പെട്ടത്. അപകടസമയത്ത് വാഹനത്തില് ഡ്രൈവര് ഉള്പ്പെടെ 13 പേരുണ്ടായിരുന്നു എന്നാണ് വിവരം. പരിക്കേറ്റ അഞ്ചുപേരുടെ നില ഗുരുതരമായി തുടരുകയാണ്.
ഇവരെ പൊള്ളാച്ചിയിലെ ആശുപത്രിയില് പ്രവേശിപ്പിച്ചു. വളവില് തെന്നിമാറി നിയന്ത്രണം വിട്ട വാന് സംരക്ഷണ ഭിത്തി തകര്ത്ത് കൊക്കയിലേക്ക് മറിയുകയായിരുന്നു എന്നാണ് പ്രാഥമിക വിവരം. വിനോദയാത്രയുടെ ഭാഗമായി വാല്പ്പാറയിലേക്ക് പോയ സംഘമാണ് അപകടത്തില്പ്പെട്ടത്. അപകടം നടന്ന ഉടന് തന്നെ നാട്ടുകാരും പൊലീസും അഗ്നിരക്ഷാസേനയും ചേര്ന്ന് രക്ഷാപ്രവര്ത്തനം ആരംഭിച്ചു. വിനോദസഞ്ചാരികള് എത്തിയ മിനിവാന് പൂര്ണ്ണമായും തകര്ന്ന നിലയിലാണ്. മൃതദേഹങ്ങള് പോസ്റ്റ്മോര്ട്ടം നടപടികള്ക്കായി പൊള്ളാച്ചി ജില്ലാ ആശുപത്രിയിലേക്ക് മാറ്റി. സംഭവത്തില് തമിഴ്നാട് പൊലീസ് അന്വേഷണം ആരംഭിച്ചിട്ടുണ്ട്.
