പാലഡ്ക: വൈദ്യുതാഘാതമേറ്റ് മാതാവും മകനും മരിച്ചു. പാലഡ്ക ഗ്രാമപഞ്ചായത്തിലെ വർണബെട്ടു പൊസലായി കെളഗിന മാനെയിൽ മെഴ്‌സി മസ്‌കരേനാസ് (45), മകൻ ഷോൺ മസ്‌കരേനാസ് (18) എന്നിവരാണ് മരിച്ചത്.
ബുധനാഴ്ച വൈകിട്ട് 6.30നും ഏഴിനും ഇടയിലാണ് അപകടമുണ്ടായതെന്നാണ് കരുതുന്നത്. വ്യാഴാഴ്ച രാവിലെ തോട്ടം തൊഴിലാളി സുന്ദര പൂജാരി സ്ഥലത്തെത്തിയപ്പോഴാണ് സംഭവം പുറത്തറിഞ്ഞത്.
നനഞ്ഞ വസ്ത്രങ്ങൾ വീടിന് പുറത്തുള്ള അയലിൽ തൂക്കിയിടുന്നതിനിടെയാണ് ഷോണിന് വൈദ്യുതാഘാതമേറ്റതെന്നാണ് പ്രാഥമിക നിഗമനം. വൈദ്യുതി കണക്ഷനിൽനിന്ന് അയലിലെ കമ്പിയിലേക്ക് വൈദ്യുതി പ്രവഹിച്ചതാകാമെന്ന് സംശയിക്കുന്നു. മകന്റെ നിലവിളി കേട്ട് രക്ഷിക്കാനെത്തിയ മെഴ്‌സിക്കും വൈദ്യുതാഘാതമേറ്റതായാണ് കരുതുന്നത്. ഇരുവരും സംഭവസ്ഥലത്തുതന്നെ മരിച്ചു.
മൂഡ്ബിദ്രിയിലെ ഹോളി റോസറി പി.യു. കോളജിൽ രണ്ടാം വർഷ പ്രീ-യൂണിവേഴ്സിറ്റി വിദ്യാർഥിയായിരുന്നു ഷോൺ. മെഴ്‌സിയുടെ ഭർത്താവ് സൈമൺ മസ്‌കരേനാസ് 15 വർഷം മുമ്പ് മരിച്ചിരുന്നു. അമ്മയും മകനും മാത്രമായിരുന്നു വീട്ടിൽ താമസിച്ചിരുന്നത്.