കൊടുങ്ങല്ലൂര്‍: കൊടുങ്ങല്ലൂര്‍ പറമ്പിക്കുളങ്ങര ശ്രീകൃഷ്ണസ്വാമി ക്ഷേത്രത്തില്‍ ജന്മാഷ്ടമി ആഘോഷത്തിനിടയിലെ ഹൃദയസ്പര്‍ശിയായ രംഗം സോഷ്യല്‍ മീഡിയയില്‍ കണ്ടത് നിരവധിപേര്‍. ജന്മാഷ്ടമി ആഘോഷത്തിനിടെ അരങ്ങേറിയത് കേരളീയരുടെ മനസ്സ് നിറച്ച അപൂര്‍വമായൊരു സ്‌നേഹനിമിഷമായിരുന്നു. ആദ്യം അഭിനയിക്കുകയാണെന്ന് കരുതിയവര്‍ക്ക് തെറ്റി. കൃഷ്ണന്റെ വേഷം ധരിച്ച കുട്ടി ഫോട്ടോയ്ക്ക് പോസ് ചെയ്യുന്നതിനിടെയാണ് കുചേലന്റെ വേഷം ധരിച്ച അപ്പൂപ്പന്‍ അപ്രതീക്ഷിതമായി കുട്ടിയുടെ അടുത്തേക്ക് എത്തിയത്. പെട്ടെന്ന് തന്റെ മുന്നിലേക്ക് കുചേല വേഷധാരി എത്തിയതോടെ കുട്ടി ആദ്യം അമ്പരന്നു. എന്നാല്‍ അടുത്ത നിമിഷം സ്‌നേഹത്തോടെ തന്നെ വിളിച്ചെത്തിയ അപ്പൂപ്പനെ കുട്ടി കെട്ടിപ്പിടിക്കുകയും കരഞ്ഞുപോകുകയും ചെയ്തു. കൃഷ്ണനും കുചേലനും തമ്മിലുള്ള ആത്മബന്ധത്തിന്റെ ഓര്‍മപ്പെടുത്തലായി മാറുകയായിരുന്നു ആ നിമിഷം.
രംഗം കണ്ടവരെയും ഇത് കണ്ണീരിലാഴ്ത്തി. ”എന്തോ എവിടെയോ ഒരു സാന്നിധ്യം ഫീല്‍ ചെയ്തു. ശരിക്കും കുചേലന്‍ കണ്ണനെ കാണാന്‍ വന്നതുപോലെ തോന്നി” എന്നായിരുന്നു പലരുടെയും പ്രതികരണം. ജന്മാഷ്ടമി ആഘോഷങ്ങള്‍ക്കിടെ കണ്ട ഏറ്റവും ഹൃദയസ്പര്‍ശിയായ കാഴ്ചകളിലൊന്നാണിതെന്നും നിരവധി പേര്‍ സമൂഹമാധ്യമങ്ങളില്‍ കുറിച്ചു.
ശ്രീകൃഷ്ണനും കുചേലനും തമ്മിലുള്ള സൗഹൃദത്തിന്റെ ആഴം ഓര്‍മിപ്പിച്ച ഈ ദൃശ്യം വീണ്ടും വീണ്ടും കണ്ട് കണ്ണുനിറഞ്ഞവരും ഏറെയാണ്. പശ്ചാത്തലത്തില്‍ മുഴങ്ങുന്ന കുചേലവൃത്തം കഥകളിപ്പദത്തിലെ വരികള്‍ക്ക് ഈ നിമിഷത്തിന്റെ വൈകാരികത ഒന്നുകൂടി വര്‍ധിപ്പിച്ചു. അപ്രതീക്ഷിതമായി സംഭവിച്ച ആ നിമിഷം, ഒരു വേഷപ്പകര്‍ച്ചയ്ക്കപ്പുറം കൃഷ്ണനും കുചേലനും തമ്മിലുള്ള സ്‌നേഹത്തിന്റെ നേര്‍ചിത്രമായി മാറുകയായിരുന്നു.
