ന്യൂഡല്ഹി: ഇന്ത്യയിലെ ഓണ്ലൈന് ഫുഡ് ഡെലിവറി രംഗത്ത് മത്സരം കടുപ്പിക്കാന് ഒരുങ്ങി ഇ-കൊമേഴ്സ് ഭീമന് ഫ്ളിപ്കാര്ട്ട്. രാജ്യത്ത് ഉടന് തന്നെ ഫുഡ് ഡെലിവറി സേവനം ആരംഭിക്കുമെന്ന് ഫ്ളിപ്കാര്ട്ട് ഗ്രൂപ്പ് സി.ഇ.ഒ കല്യാണ് കൃഷ്ണമൂര്ത്തി അറിയിച്ചു. നിലവില് വിപണി നിയന്ത്രിക്കുന്ന സൊമാറ്റോയ്ക്കും സ്വിഗ്ഗിക്കുമെതിരെ ശക്തമായ വെല്ലുവിളിയാകുമെന്നാണ് പുതിയ നീക്കത്തെ വിപണി വിദഗ്ധര് വിലയിരുത്തുന്നത്.
ആദ്യഘട്ടത്തില് തെരഞ്ഞെടുത്ത ഉപഭോക്താക്കള്ക്കു മാത്രമായിരിക്കും സേവനം ലഭ്യമാകുക. അവരുടെ അഭിപ്രായങ്ങളും ഉപയോഗാനുഭവവും വിലയിരുത്തിയശേഷം രാജ്യവ്യാപകമായി സേവനം വ്യാപിപ്പിക്കാനാണ് കമ്പനിയുടെ പദ്ധതി. ഫ്ളിപ്കാര്ട്ടിന്റെ ക്വിക്ക് കൊമേഴ്സ് സേവനമായ ‘ഫ്ളിപ്കാര്ട്ട് മിനിറ്റ്സ്’ അവതരിപ്പിച്ചതും സമാന രീതിയിലായിരുന്നു.
ഫ്ളിപ്കാര്ട്ടിന്റെ പ്രധാന ആപ്പിനൊപ്പം ഫുഡ് ഡെലിവറിക്കായി പ്രത്യേകം വികസിപ്പിക്കുന്ന ആപ്പിലൂടെയും ഭക്ഷണം ഓര്ഡര് ചെയ്യാനാകും. കേന്ദ്ര സര്ക്കാരിന്റെ ഓപ്പണ് നെറ്റ്വര്ക്ക് ഫോര് ഡിജിറ്റല് കൊമേഴ്സ് (ഒ.എന്.ഡി.സി.) പ്ലാറ്റ്ഫോമുമായി സഹകരിച്ചായിരിക്കും സേവനം ഏകോപിപ്പിക്കുക. എന്നാല് പുതിയ പ്ലാറ്റ്ഫോമിന്റെ പേരോ ആദ്യമായി സേവനം ആരംഭിക്കുന്ന നഗരമോ കമ്പനി ഇതുവരെ വെളിപ്പെടുത്തിയിട്ടില്ല.
കുറഞ്ഞ ചെലവില് സേവനം ലഭ്യമാക്കുന്നതിനപ്പുറം വൈവിധ്യമാര്ന്ന റെസ്റ്റോറന്റുകളുടെ ശൃംഖല, കൃത്യതയുള്ള സേവനം, അതിവേഗ ഡെലിവറി, ലളിതമായ ഓര്ഡറിങ് അനുഭവം എന്നിവ ഉറപ്പാക്കുകയാണ് ലക്ഷ്യമെന്ന് കല്യാണ് കൃഷ്ണമൂര്ത്തി പറഞ്ഞു. ഉപഭോക്താക്കള്ക്ക് മികച്ച അനുഭവം നല്കാനാകുന്ന മേഖലകളിലേക്കാണ് ഫ്ളിപ്കാര്ട്ട് പ്രവേശിക്കുന്നതെന്നും മറ്റ് പ്ലാറ്റ്ഫോമുകളില് ലഭ്യമായ ഭൂരിഭാഗം റെസ്റ്റോറന്റുകളെയും ഘട്ടംഘട്ടമായി സ്വന്തം പ്ലാറ്റ്ഫോമില് ഉള്പ്പെടുത്തുമെന്നും അദ്ദേഹം വ്യക്തമാക്കി.
വിപുലമായ ഉപഭോക്തൃ അടിത്തറയും രാജ്യവ്യാപകമായ ലോജിസ്റ്റിക്സ് ശൃംഖലയും ഫ്ളിപ്കാര്ട്ടിന് കരുത്താകുമ്പോള്, ഫുഡ് ഡെലിവറി വിപണിയിലെ മത്സരം കൂടുതല് ശക്തമാകുമെന്നാണ് വിലയിരുത്തല്.