തിരുവനന്തപുരം: വീര്യം കുറഞ്ഞ മദ്യത്തിന് സംസ്ഥാന ബജറ്റില്‍ ഏര്‍പ്പെടുത്തിയ നികുതി സ്ളാബില്‍ അതൃപ്തി  വീണ്ടും പരസ്യമാക്കി വി എം സുധീരന്‍ രംഗത്ത്.  നിയമസഭയിൽ ഈ പ്രൊപ്പോസൽ വരുന്നതിന് മുമ്പ് തന്നെ പാർട്ടി തലത്തിലും യുഡിഎഫ് സ്ഥലത്തിലും ഇതിനെക്കുറിച്ച് ചർച്ച നടത്തുകയായിരുന്നു അഭികാമ്യം. ചർച്ച നടത്തി നയം രൂപീകരിച്ച ശേഷം നയത്തിനു രൂപം കൊടുത്തിരുന്നെങ്കിൽ ഈ പ്രശ്നങ്ങൾ ഇല്ലാതാകുമായിരുന്നു.

മദ്യവ്യാപനം തടയുന്നതിന് മുഖ്യമന്ത്രിയുടെയും എക്സൈസ് മന്ത്രിയുടെയും ശ്രദ്ധയിൽപ്പെടുത്തിയിരുന്നു. നിർഭാഗ്യവശാൽ സമൂഹത്തിൽ ഉയർന്നു വന്നിട്ടുള്ള സംശയങ്ങളും ആശങ്കകളും നിലനിൽക്കുന്ന സ്ഥിതിയാണ്. ഫിനാൻസ് ബിൽ അവതരിപ്പിക്കുമ്പോൾ ഈ പ്രൊപ്പോസൽ ഒഴിവാക്കണമെന്നും അദ്ദേഹം ആവശ്യപ്പെട്ടു.

സർക്കാരിന്റെ വിശ്വാസതയ്ക്ക് മങ്ങലിക്കുന്ന തീരുമാനം ഉണ്ടാകാൻ പാടില്ല. തീരുമാനങ്ങൾ സുതാര്യത നിലനിർത്തി, നേരെ ചൊവ്വേ കാര്യങ്ങൾ തുറന്നുപറഞ്ഞ് വിവാദങ്ങൾ ഇല്ലാതെ മുന്നോട്ട് നീക്കേണ്ടിയിരുന്നു. മയക്കുമരുന്നിന്റെ കാര്യത്തിൽ ആഭ്യന്തര വകുപ്പ് നന്നായി പ്രവർത്തിക്കുന്നുവെന്നും സുധീരന്‍ പറഞ്ഞു. വിഡി സതീശൻ പ്രതിപക്ഷ നേതാവായിരിക്കുമ്പോൾ എൽഡിഫിനെ വിമർശിച്ച കാര്യങ്ങൾ ഉൾക്കൊണ്ട് തന്നെ ഇപ്പോൾ നടപടികൾ സ്വീകരിക്കണം. നേരത്തെ പ്രതിപക്ഷം സ്വീകരിച്ച നിലപാടിൽ തന്നെ ഉറച്ചു നിൽക്കണം.  കരിമണൽ ഖനന നയത്തിലും അവ്യക്തത നിലനിൽക്കുന്നു. ഖനനം ഉണ്ടാവില്ലെന്ന് സർക്കാർ പ്രഖ്യാപിക്കണമെന്നും അദ്ദേഹം ആവശ്യപ്പെട്ടു.

തിരുവനന്തപുരം: കെഎസ്ആർടിസിയിലെ സൗജന്യയാത്രയുടെ ഉദ്ഘാടന ചടങ്ങിനിടെ തലയിൽ ചൂട് പായസം വീണ സംഭവത്തിൽ അന്വേഷണം പ്രഖ്യാപിച്ചതിൽ പ്രതികരിച്ച് മന്ത്രി ബിന്ദു കൃഷ്ണ. പായസം വീണതിൽ അസ്വാഭാവികമായി ഒന്നുമില്ല. വീഡിയോ കണ്ട ലോകമെമ്പാടുമുള്ള മനുഷ്യർക്ക് ഇതറിയാമെന്നും മന്ത്രി വ്യക്തമാക്കി. ഒരാൾക്കൂട്ടത്തിൽ സംഭവിക്കാൻ സാദ്ധ്യതയുള്ളത് മാത്രമാണുണ്ടായത്. അതിൽ പരാതിയില്ല. സന്തോഷം പങ്കിടാൻ പായസം കൊണ്ടുവന്നപ്പോൾ കൈതട്ടി തലയിൽ വീണതാണ്.

പൊലീസിൽ പരാതി കിട്ടിയാൽ അന്വേഷിക്കും. അന്വേഷണം ആവശ്യമില്ലെന്നുപറഞ്ഞ് ഡിജിപിക്ക് കത്ത് നൽകിയിട്ടുണ്ട്’- മന്ത്രി പറഞ്ഞു.കൊല്ലം കെഎസ്ആർടിസി ഡിപ്പോയിൽ ‘പ്രിയദർശിനി’ യാത്ര ഉദ്ഘാടന ചെയ്ത ശേഷം ബസിൽ യാത്ര ചെയ്യവെയാണ് മന്ത്രിയുടെ തലയിൽ പായസം വീണത്. യൂത്ത് കോൺഗ്രസ് ജില്ലാ അദ്ധ്യക്ഷന്റെ നേതൃത്വത്തിൽ നടന്ന പായസവിതരണത്തിനിടെയായിരുന്നു സംഭവം.

ബസിനുള്ളിൽ യുഡിഎഫ് പ്രവർത്തകരുടെയും യാത്രക്കാരുടെയും വലിയ തിരക്കുണ്ടായിരുന്നു. തിക്കിലും തിരക്കിലും പായസം നിറച്ച പാത്രം അറിയാതെ മന്ത്രിയുടെ ദേഹത്ത് വീഴുകയായിരുന്നു.ഉടനെ കൂടെയുണ്ടായിരുന്നവർ ഷാളും മറ്റും ഉപയോഗിച്ച് മന്ത്രിയുടെ മുഖവും തലയും വൃത്തിയാക്കി. തുടർന്ന് ചിന്നക്കടവ് വരെ ബസിൽ യാത്ര ചെയ്ത് മന്ത്രി മടങ്ങുകയായിരുന്നു. പിന്നീട് ടൗണിലെ ഫ്ളാറ്റിലെത്തി കുളിച്ച് വസ്ത്രം മാറിയാണ് ഔദ്യോഗിക പരിപാടികൾക്ക് പോയത്. സംഭവത്തെ തുടർന്ന് ബിന്ദു കൃഷ്ണയ്ക്ക് പൊള്ളലേറ്റില്ലെന്നാണ് വിവരം.

തിരുവനന്തപുരം: മുൻ മുഖ്യമന്ത്രി പിണറായി വിജയന്റെ മകൾ വീണാ വിജയൻ ഉൾപ്പെട്ട മാസപ്പടി കേസിലെ റെയ്ഡിനിടെ ഇഡി ഉദ്യോഗസ്ഥരെ ആക്രമിച്ച കേസിൽ നാടകീയ നീക്കങ്ങൾ. ഒമ്പതാം പ്രതി ഹരീഷ് കുമാറിന് കഴിഞ്ഞ ദിവസം കോടതി ജാമ്യം അനുവദിച്ചതിന് പിന്നാലെ കേസിൽ നേരിട്ട് കക്ഷി ചേരാൻ എൻഫോഴ്സ്‌മെന്റ് ഡയറക്ടറേറ്റ് (ഇഡി) തീരുമാനിച്ചു. ഇതുസംബന്ധിച്ച ഹർജി ഇഡി ഉടൻ കോടതിയിൽ സമർപ്പിക്കും. കേസിൽ ജാമ്യം ലഭിക്കുന്ന ആദ്യ പ്രതിയാണ് ഹരീഷ്.

അതേസമയം, കോടതിയിൽ പ്രതിക്ക് അനുകൂലമായ നിലപാടെടുത്ത പ്രോസിക്യൂഷനെതിരെ പൊലീസ് പരസ്യമായി രംഗത്തെത്തി. പ്രതിയെ വീണ്ടും കസ്റ്റഡിയിൽ വാങ്ങി ചോദ്യം ചെയ്യേണ്ടതില്ലെന്ന് പ്രോസിക്യൂഷൻ കോടതിയെ അറിയിച്ചതാണ് ഹരീഷിന് ജാമ്യം ലഭിക്കാൻ ഇടയാക്കിയത്. ഇതിൽ കടുത്ത അതൃപ്തി രേഖപ്പെടുത്തിയ പൊലീസ്, നിലവിലെ ജില്ലാ പ്രോസിക്യൂട്ടറെ മാറ്റി കേസ് നടത്താൻ സ്‌പെഷ്യൽ പ്രോസിക്യൂട്ടറെ നിയമിക്കണമെന്ന് ആവശ്യപ്പെട്ടു.തുടർനടപടികളുടെ ഭാഗമായി മ്യൂസിയം എസ്എച്ച്ഒ സിറ്റി പൊലീസ് കമ്മീഷണർക്ക് കത്ത് നൽകിയിട്ടുണ്ട്. ഹരീഷിന് ലഭിച്ച ജാമ്യം റദ്ദാക്കണമെന്ന് ആവശ്യപ്പെട്ട് പൊലീസ് ഉടൻ തന്നെ മേൽ കോടതിയിൽ അപ്പീൽ നൽകും.

തിരുവനന്തപുരം: കേരളത്തിൽ സ്വകാര്യ മേഖലയ്ക്ക് കരിമണൽ ഖനനത്തിന് അനുമതി നൽകിയത് എൽ.ഡി.എഫ് സർക്കാരാണെന്ന കോൺഗ്രസ് നേതാവ് വി.എം. സുധീരന്റെ ആരോപണത്തിന് കടുത്ത ഭാഷയിൽ മറുപടി നൽകി പിണറായി വിജയൻ. സുധീരന്റെ വാദങ്ങൾ പൂർണ്ണമായും തള്ളിക്കളഞ്ഞ പിണറായി വിജയൻ, രാജ്യത്ത് സ്വകാര്യ മേഖലയ്ക്ക് കരിമണൽ കൊള്ളയ്ക്ക് ആദ്യമായി അവസരമൊരുക്കിയത് കേന്ദ്രം ഭരിച്ച കോൺഗ്രസ് സർക്കാരാണെന്ന് ഫേസ്ബുക്ക് കുറിപ്പിലൂടെ തുറന്നടിച്ചു. കഴിഞ്ഞ പത്ത് വർഷമായി കരിമണൽ ലോബിക്കെതിരെ വിട്ടുവീഴ്ചയില്ലാത്ത നിലപാടാണ് എൽ.ഡി.എഫ് സർക്കാരുകൾ സ്വീകരിച്ചിട്ടുള്ളതെന്നും, നിലവിലെ യു.ഡി.എഫ് സർക്കാരിന്റെ കരിമണൽ നയത്തെ വിമർശിക്കുന്നതിനിടയിൽ സുധീരൻ വസ്തുതകൾക്ക് നിരക്കാത്ത കാര്യങ്ങളാണ് വിളിച്ചുപറയുന്നതെന്നും പിണറായി വിജയൻ കുറ്റപ്പെടുത്തി.

പൊതുമേഖലയിൽ അധിഷ്ഠിതമായ ‘റെയർ എർത്ത് ഇടനാഴി’ എന്ന എൽ.ഡി.എഫിന്റെ സുപ്രധാന ആശയത്തെ അട്ടിമറിച്ച് കരിമണൽ ഖനനം പൂർണ്ണമായി സ്വകാര്യവൽക്കരിക്കാൻ ശ്രമിച്ചത് യു.ഡി.എഫ് ആണെന്ന് അദ്ദേഹം ചൂണ്ടിക്കാട്ടി. കേന്ദ്രത്തിലെ കോൺഗ്രസ് നയങ്ങളെ പിൻപറ്റി 2001-2006 കാലഘട്ടത്തിൽ കേരളം ഭരിച്ച എ.കെ. ആന്റണി – ഉമ്മൻ ചാണ്ടി സർക്കാരുകളാണ് സംസ്ഥാനത്ത് സ്വകാര്യ കമ്പനികൾക്ക് ഖനനാനുമതി നൽകിയതെന്ന് ഓർമ്മിപ്പിച്ചു. അക്കാലത്ത് സുനാമി ദുരന്തത്തിന് ശേഷം തീരദേശത്ത് ശക്തമായ ജനകീയ പ്രതിഷേധങ്ങൾ അരങ്ങേറിയിട്ടും, അവയെയെല്ലാം കാറ്റിൽപ്പറത്തിക്കൊണ്ട് സ്വകാര്യ കരിമണൽ മാഫിയയ്ക്ക് ഒത്താശ പാടാനാണ് യു.ഡി.എഫ് സർക്കാർ ശ്രമിച്ചതെന്നും തന്റെ ഫേസ്ബുക്ക് കുറിപ്പിലൂടെ തുറന്നുകാട്ടി.