ആറ്റുകാലില്‍ യുവതി ജീവനൊടുക്കിയ സംഭവത്തില്‍ ഭര്‍ത്താവ് അറസ്റ്റില്‍. വര്‍ക്കല സ്വദേശിനി ആരതിയെ (26) ആണ് ആറ്റുകാല്‍ ചിറമുക്ക് കഞ്ഞിപ്പുരയിലെ വാടകവീട്ടില്‍ വെള്ളിയാഴ്ച വൈകിട്ട് മരിച്ചനിലയില്‍ കണ്ടെത്തിയത്. ഭരതന്നൂര്‍ സ്വദേശിയായ ഭര്‍ത്താവ് അതുല്‍ ശ്രീകുമാറിന്റെ ക്രൂരപീഡനത്തില്‍ മനംനൊന്താണ് ആരതിയുടെ മരണമെന്നു ബന്ധുക്കള്‍ ആരോപിച്ചിരുന്നു. ഒന്നര വര്‍ഷം മുമ്പായിരുന്നു ഇവരുടെ വിവാഹം.

അതുല്‍ ശാരീരികമായി ഉപദ്രവിച്ചെന്നു കാട്ടി വെള്ളിയാഴ്ച ആരതി അമ്മയ്ക്ക് വാട്‌സ്ആപ്പില്‍ ചിത്രങ്ങള്‍ അയച്ചിരുന്നു. മര്‍ദനമേറ്റതിന്റെ 13 മുറിപ്പാടുകള്‍ ആരതിയുടെ ശരീരത്തില്‍ കണ്ടെത്തിയതായി പൊലീസ് അറിയിച്ചു. ആത്മഹത്യാക്കുറിപ്പ് വീട്ടില്‍ നിന്ന് കണ്ടെടുത്തു. ആരതിയുടെ അമ്മ ജിനുവിന്റെ പരാതിയില്‍ ഗാര്‍ഹിക പീഡനവും ആത്മഹത്യാ പ്രേരണാക്കുറ്റവുമാണ് അതുലിനെതിരെ ചുമത്തിയത്.

സ്ത്രീധനമായി ലഭിച്ച സ്വര്‍ണം വില്‍ക്കുന്നതുമായി ബന്ധപ്പെട്ട് ഇവര്‍ തമ്മില്‍ വഴക്ക് പതിവായിരുന്നെന്ന് പൊലീസ് പറഞ്ഞു. വ്യാഴാഴ്ചയും വഴക്കുണ്ടായി. വെള്ളിയാഴ്ച മകളെ ഫോണില്‍ വിളിച്ച് കിട്ടുന്നില്ലെന്ന് അമ്മ ജിനു അറിയിച്ചതോടെ വൈകിട്ടോടെ അതുല്‍ വീട്ടിലെത്തി വാതില്‍ തകര്‍ത്ത് അകത്തു കടന്നപ്പോള്‍ ആരതിയെ മരിച്ച നിലയില്‍ കണ്ടെത്തുകയായിരുന്നു. ഭര്‍ത്താവ് വീട്ടിലുണ്ടായിരുന്ന സമയത്താണ് ആരതി ആത്മഹത്യ ചെയ്തതെന്നും ബന്ധുക്കള്‍ ആരോപിക്കുന്നു.

മിയാമി: ഫിഫ ലോകകപ്പിലെ കെ ഗ്രൂപ്പില്‍ പോര്‍ച്ചുഗലും കൊളംബിയയും തമ്മിലുള്ള മത്സരം ഗോള്‍രഹിത സമനില. കൊളംബിയയെ തോല്‍പിച്ചിരുന്നുവെങ്കില്‍ പോര്‍ച്ചുഗലിന് പോയിന്റ് പട്ടികയില്‍ ഒന്നാമതെത്താന്‍ കഴിയുമായിരുന്നു. നിലവില്‍ മൂന്ന് മത്സരങ്ങളില്‍ രണ്ടു ജയവും ഒരു സമനിലയോടും കൂടി കൊളംബിയ ഗ്രൂപ്പ് ചാംപ്യന്‍മാരായി.

കൊളംബിയയുടെ മുന്നേറ്റത്തോടെയാണ് മത്സരത്തിന്റെ ആദ്യ പകുതി തുടങ്ങിയത്. ലൂയിസ് ഡയസും ജോണ്‍ കോര്‍ഡോബയും മികച്ച അവസരങ്ങള്‍ സൃഷ്ടിച്ചെങ്കിലും കൊളംബിയയ്ക്കു വല കുലുക്കാന്‍ സാധിച്ചില്ല. 17-ാം മിനിറ്റില്‍ കൗണ്ടര്‍ ആക്രമണവുമായി മുന്നേറിയ കൊളംബിയ താരം ജോണ്‍ കോര്‍ഡോബ പോര്‍ച്ചുഗലിന്റെ ബ്രൂണോ ഫെര്‍ണാണ്ടസിന്റെ വെല്ലുവിളി മറികടന്നെങ്കിലും ഗോള്‍ കീപ്പര്‍ പോര്‍ച്ചുഗലിന്റെ രക്ഷകനായി. 24-ാം മിനിറ്റില്‍ സൂപ്പര്‍ താരം ക്രിസ്റ്റ്യാനോ റൊണാള്‍ഡോയ്ക്ക് ഗോള്‍ അടിക്കാന്‍ അവസരം ലഭിച്ചുവെങ്കിലും അത് പ്രയോജനപ്പെടുത്താന്‍ കഴിഞ്ഞില്ല.

കൊളംബിയ താരം ജോണ്‍ അരിയാസിന്റെ ഫൗളില്‍ പോര്‍ച്ചുഗലിന് അനുകൂലമായ ഫ്രീകിക്ക് ലഭിച്ചു. എന്നാല്‍ റൊണാള്‍ഡോയുടെ കിക്ക് കൊളംബിയ ഗോളി കമിലോ വര്‍ഗാസ് അനായാസം പിടിച്ചെടുത്തു. ആദ്യ 30 മിനിറ്റുകള്‍ക്കു ശേഷം പോര്‍ച്ചുഗല്‍ മത്സരത്തിലേക്കു ശക്തമായി തിരികെയെത്തിയെങ്കിലും ഗോള്‍ അകന്നുനിന്നു.

39-ാം മിനിറ്റില്‍ പോര്‍ച്ചുഗല്‍ താരം ബ്രൂണോ ഫെര്‍ണാണ്ടസ് ക്ലോസ് റേഞ്ചില്‍ എടുത്ത ഷോട്ട് തകര്‍പ്പനൊരു സേവിലൂടെ കൊളംബിയ ഗോളി വര്‍ഗാസ് രക്ഷപെടുത്തി. പിന്നാലെ ക്രിസ്റ്റ്യാനോ റൊണാള്‍ഡോയും റൂബന്‍ നെവസും ഗോള്‍ ശ്രമങ്ങള്‍ നടത്തിയെങ്കിലും നിരാശയായിരുന്നു ഫലം.